ମହାମାରୀ କରୋନା ସମୟରେ ଅନେକ କ୍ରିକେଟରଙ୍କ ଘରକୁ ନୂଆ ଅତିଥି ଆସିଛନ୍ତି। ଭାରତୀୟ ଖେଳାଳି ହାର୍ଦ୍ଦିକ ପାଣ୍ଡ୍ୟାଙ୍କ ଠାରୁ ଆରମ୍ଭ କରି ବିରାଟ କୋହଲି ବାପା ହେବାର ସୌଭାଗ୍ୟ ଅର୍ଜନ କରିଛନ୍ତି। ଏବେ ଓ୍ବେଷ୍ଟଇଣ୍ଡିଜର ଅଲ୍ରାଉଣ୍ଡର ଏବଂ କେକେଆର୍ ଖେଳାଳି ସୁନୀଲ ନାରିନେ ପିତା ହେବାର ଆନନ୍ଦ ପାଇଛନ୍ତି। ସୋମବାର ତାଙ୍କ ସ୍ତ୍ରୀ ଆଞ୍ଜେଲିଆ ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି। ସୁନୀଲ ନିଜର ଏହି ଖୁସିକୁ ପ୍ରଶଂସକଙ୍କ ସହ ବାଣ୍ଟିଛନ୍ତି। ଏଥିସହ ସେ ପୁଅର ଏକ ଫଟୋ ଇନ୍ଷ୍ଟାଗ୍ରାମ୍ରେ ଶେୟାର କରିଛନ୍ତି।
ଫଟୋରେ ପୁଅର ମୁହଁ ସ୍ପଷ୍ଟ ଦେଖାଯାଉ ନାହିଁ। ଏହାକୁ ଶେୟାର କରି ସେ କ୍ୟାପଶନରେ ଲେଖିଛନ୍ତି, ତୁମେ ଆମ ହୃଦୟର ଏମିତି ଏକ ଖାଲି ସ୍ଥାନ ପୂରଣ କରିଛ, ଯାହା ଖାଲି ଥିଲା ବୋଲି ଆମେ କେବେ ଜାଣି ନ ଥିଲୁ। ତୁମର ଏହି ଛୋଟ ମୁହଁରେ ଆମେ ଭଗବାନଙ୍କ କୃପା ଦେଖିପାରୁଛୁ। ଆମେ ତୁମକୁ ବହୁତ ଭଲ ପାଉଛୁ ବୋଲି ସେ ଲେଖିଛନ୍ତି। ଏହା ଜଣାପଡ଼ିବା ପରେ ସୁନୀଙ୍କ ନିକଟକୁ ପ୍ରଶଂସାର ସୁଅ ଛୁଟୁଛି।
ସୁନୀଲ ବାପା ହେବାକୁ ଯାଉଥିବା ନେଇ ଗତ ଅକ୍ଟୋବରରେ ଜଣାଇଥିଲେ।
