ପ୍ୟାରିସ,୨୭।୭: କରୋନା ଭାଇରସର ସଂକ୍ରମଣ ବିକଶିତ ଦେଶର ସ୍ବାସ୍ଥ୍ୟ ବ୍ୟବସ୍ଥା ଉପରେ ବି ବହୁ ପ୍ରଭାବ ପକାଇଛି। ଫ୍ରାନ୍ସରେ କରୋନା ସଂକ୍ରମଣ ଏକ ପ୍ରକାର ଦେଶର ଅର୍ଥନୀତିକୁ ଦୋହଲାଇ ଦେଇଥିବା ବେଳେ ଏଠାରେ ସଂକ୍ରମଣ ଓ ମୃତ୍ୟୁ ହାର ସମସ୍ତଙ୍କୁ ଚିନ୍ତାରେ ପକାଇ ଦେଇଛି। ଏବେ ଫ୍ରାନ୍ସ ସରକାର କରୋନା ଟେଷ୍ଟ ମାଗଣାରେ କରିବାକୁ ନିଷ୍ପତ୍ତି ନେଇଥିବା ସୂଚନା ମିଳିଛି। ସ୍ବାସ୍ଥ୍ୟମନ୍ତ୍ରୀ ଓଲିଓ୍ବର ଓ୍ବେରନ କହିଛନ୍ତି ଯେଉଁମାନେ ପୂର୍ବରୁ ଘରୋଇ ହସ୍ପିଟାଲରେ ଅର୍ଥ ଦେଇ କରୋନା ଟେଷ୍ଟ କରାଇଛନ୍ତି ସେମାନଙ୍କ ଅର୍ଥ ଫେରାଇ ଦେବାକୁ ମଧ୍ୟ ବ୍ୟବସ୍ଥା କରାଯାଉଛି। ନିକଟରେ ଏକ ସାକ୍ଷାତ୍କାରରେ ନିଜେ ସ୍ବାସ୍ଥ୍ୟମନ୍ତ୍ରୀ ଏହା କହିଛନ୍ତି। ତେବେ ଯୁବବର୍ଗଙ୍କୁ ସେ କରୋନା ମହାମାରୀକୁ ଏତେ ହାଲୁକା ଭାବେ ନ ନେବାକୁ ପରାମର୍ଶ ଦେଇଛନ୍ତି। ସୂଚନାଯୋଗ୍ୟ, ଏବେ ଫ୍ରାନ୍ସରେ ୨ଲକ୍ଷରୁ ଅଧିକ ଲୋକ କରୋନାରେ ସଂକ୍ରମିତ ହୋଇଥିବା ବେଳେ ୩୦ ହଜାରରୁ ଅଧିକ ସଂକ୍ରମିତଙ୍କ ମୃତ୍ୟୁ ହୋଇ ସାରିଲାଣି। ଯାହା ଏବେ ସରକାରଙ୍କ ପାଇ’ଁଚିନ୍ତାର କାରଣ ପାଲଟିଛି।
