ଛତ୍ରପୁର,୪ା୭(ଡି.ଏନ୍.ଏ.): ଭୁବନେଶ୍ୱର ପରେ ପ୍ରଥମ ଥର ପାଇଁ ଗଞ୍ଜାମ ଜିଲାରେ କୋଭାକ୍ସିନ ପହଞ୍ଚିଛି। ବ୍ରହ୍ମପୁର ସହର ସମେତ ଗଞ୍ଜାମ ଜିଲା ପାଇଁ ୧ ଲକ୍ଷ ୪୦ ହଜାର କୋଭାକ୍ସିନ ପହଞ୍ଚିବା ପରେ ଏହାକୁ ରବିବାର ଟିକାଦାନ କେନ୍ଦ୍ରକୁ ପଠାଇ କାର୍ଯ୍ୟ ଆରମ୍ଭ ହୋଇଛି। ସୋମବାରଠାରୁ ଗଞ୍ଜାମରେ ଆରମ୍ଭ ହେବ ଏହି କୋଭାକ୍ସିନର ଟିକାଦାନ। ସେହିପରି ଜିଲାକୁ ପୂର୍ବରୁ ଦିଆଯାଉଥିବା କୋଭିଶିଲ୍ଡ ୮୫ ହଜାର ଡୋଜ୍ ପହଞ୍ଚିଛି। ଜିଲାର ମୁଖ୍ୟ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ପରିସରରେ ରହିଥିବା ଟିକା ସଂରକ୍ଷଣ କେନ୍ଦ୍ର ପରିସରରେ ଭ୍ୟାକ୍ସିନ ପହଞ୍ଚିବା ପରେ ଏହାକୁ ଜିଲାର ସମସ୍ତ ଟିକାଦାନ କେନ୍ଦ୍ରକୁ ପଠାଯାଉଛି। ଯାହାକି ଏଣିକି ଜିଲାରେ ପ୍ରଥମ ଡୋଜ୍ ଟିକା ନେବା ପାଇଁ ଆସୁଥିବା ବ୍ୟକ୍ତି ବିଶେଷଙ୍କ ପାଇଁ କୋଭାକ୍ସିନ ଟିକା ଦିଆଯିବ। ଯେଉଁମାନେ ପୂର୍ବରୁ କୋଭିଶିଲ୍ଡ ଟିକା ନେଇଥିଲେ ସେମାନଙ୍କୁ ଦ୍ବିତୀୟ ଡୋଜ ମଧ୍ୟ କୋଭିଶିଲ୍ଡ ଦିଆଯିବ ବୋଲି ସୂଚନା ଦିଆଯାଇଛି। ଅପରପକ୍ଷରେ ରବିବାର ସନ୍ଧ୍ୟା ସୁଦ୍ଧା ଟିକା କେନ୍ଦ୍ର ସମ୍ପର୍କରେ ସମ୍ପୂର୍ଣ୍ଣ ସୂଚନା ଦିଆଯିବ ବୋଲି ଗଣମାଧ୍ୟମକୁ କୁହାଯାଇଛି। ଟିକା
ଅଭାବ ଯୋଗୁ ଗଞ୍ଜାମରେ ଟିକାକରଣ ବନ୍ଦ ଥିଲା।
