ବେଙ୍ଗାଲୁରୁ,୬।୫ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶନିବାର କର୍ନାଟକର ବାଦାମିରେ ଏକ ସାଧାରଣ ସଭାରେ ଉଦବୋଧନ ଦେଇ କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ସେ କହିଛନ୍ତି କର୍ନାଟକକୁ ନମ୍ବର -୧ କରିବା ପାଇଁ ଭାରତୀୟ ଜନତା ପାର୍ଟି ଆପଣଙ୍କ ସମ୍ମୁଖରେ ଏକ ରୋଡମ୍ୟାପ ଆଣିଛି। ଅପରପକ୍ଷରେ କଂଗ୍ରେସ ନିଷ୍ପତ୍ତି ନେଇଛି,ଏହା ପୁରୁଣା ଅଭ୍ୟାସ ଛାଡିବ ନାହିଁ, ନିର୍ବାଚନ ପ୍ରସଙ୍ଗରେ ଏହି ଦଳ ତୃଷ୍ଟିକରଣ, ତାଲାବନ୍ଦ ଏବଂ ଅନ୍ୟକୁ ଗାଳଗୁଲଜ କରିବା ଜାରି ରଖିବ।
ସେ କହିଛନ୍ତି ଭୋଟ ବ୍ୟାଙ୍କକୁ ସନ୍ତୁଷ୍ଟ କରିବା, ଭାଜପାର କଲ୍ୟାଣ ନୀତି ଉପରେ ଅଭିଯୋଗ ଆଣିବା, ଓବିସି ଏବଂ ଲିଙ୍ଗାୟତ ସମ୍ପ୍ରଦାୟଙ୍କୁ ଅପମାନ କାର୍ଯ୍ୟ ନେଇ ରାଜ୍ୟରେ କଂଗ୍ରେସର ଏହି କୂଟନୀତି ଲୋକଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି। ଏହୀ ପୁରୁଣା ରରାଜନୈତିକ ଦଳର କୁକର୍ମ ଯୋଗୁ ଆଜି ଦେଶ ଗତ ୭୦ ବର୍ଷ ଧରି ପଛୁଆ ରହିଥିଲା। ମାତ୍ର ଭାଜପା ସରକାର ଆସିବା ପରଠାରୁ ଦେଶର ବିକାଶ ଧାରା ଜାରି ରହିଛି।
୨୦୧୪ ବର୍ଷ ପୂର୍ବରୁ ଗୋଟିଏ ଜିବି ଇଣ୍ଟରନେଟର ମୂଲ୍ୟ ୩୦୦ ଟଙ୍କା ଥିଲା, କିନ୍ତୁ ଆଜି ଏହା ଜିବି ପିଛା ୧୦ ଟଙ୍କାକୁ ଖସି ଆସିଛି। ଦେଶରେ ଏକ ସୁଦୃଢ଼ ସଂଯୋଗ ଏବଂ ଉତ୍କୃଷ୍ଟ ଭିତ୍ତିଭୂମି ନିଶ୍ଚିତ କରିଛି ଭାଜପା।
କେନ୍ଦ୍ରରୁ କଲ୍ୟାଣକାରୀ ଯୋଜନାର ଗୋଟିଏ ଟଙ୍କାରୁ ୮୫ ପଇସା ଖାଉଥିବା କଂଗ୍ରେସର ଏହି କୁକର୍ମ ଯୋଗୁଁ ଆମ ଦେଶ ଏତେ ଦଶନ୍ଧି ଧରି ପଛୁଆ ରହିଥିଲା। ଏହାର ଶାସନ କାଳରେ କଂଗ୍ରେସ ଦ୍ୱାରା ଅଧିକ ଶକ୍ତିଶାଳୀ ହୋଇଥିବା ଏହି ଦୁର୍ନୀତି ରୋଗଗୁଡିକର ସ୍ଥୟୀ ଚିକିତ୍ସା ବର୍ତ୍ତମାନ ଭାଜପା କରୁଛି।
