ବିମାନରେ କରୋନା ସଂକ୍ରମଣକୁ ନେଇ ଦୁଇଟି ଅଧ୍ୟୟନ କରାଯାଇଛି। ଯେଉଁଥିରୁ ଆଶ୍ଚର୍ଯ୍ୟ କରିଦେଲା ଭଳି କଥା ଜାଣିବାକୁ ମିଳିଛି। ଶୁକ୍ରବାର ପ୍ରକାଶିତ ଏହି ଅଧ୍ୟୟନରୁ ଲଣ୍ଡନରୁ ଭିଏତନାମା ଯିବାକୁ ଥିବା ବିମାନରେ ଜଣେ ସଂକ୍ରମିତ ମହିଳାଙ୍କ ଯୋଗୁ ୧୫ ଜଣ ଲୋକ ସଂକ୍ରମିତ ହୋଇଥିଲେ ବୋଲି ଜଣାପଡ଼ିଛି।
ରିପୋର୍ଟରୁ ପ୍ରକାଶ, ଗଳାରେ କଷ୍ଟ ଅନୁଭବ କରିବା ଏବଂ କଫରେ ପୀଡ଼ିତ ଜଣେ ମହିଳା ବିମାନରେ ନିଜ ଘର ଭିଏତନାମାକୁ ଯାଉଥିଲେ। ୧୦ ଘଣ୍ଟା ପରେ ଯେତେବେଳେ ଏହି ବିମାନ ଅବତରଣ କଲା ସେତେବେଳେ ଅନ୍ୟ ୧୫ ଜଣ ସଂକ୍ରମିତ ହୋଇସାରିଥିଲେ। ଭିଏତନାମାର ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ହାଇଜିନ୍ର ଗବେଷକମାନେ ଏହି ଅଧ୍ୟୟନ କରି କହିଛନ୍ତି।
ଗବେଷକମାନେ କୁହନ୍ତି, ବହୁଦୂର ବିମାନ ଯାତ୍ରାରେ କରୋନା ଭୂତାଣୁ ସଂକ୍ରମଣ ଆଶଙ୍କା ଅଧିକ ରହିବା ବାସ୍ତବିକ କଥା। ଜଣଙ୍କଠାରୁ ଅନ୍ୟମାନଙ୍କୁ ଖୁବ୍ ତୀବ୍ର ବେଗରେ ଏହା ସଂକ୍ରମିତ କରିଥାଏ। ଦୂରରେ ବସିଲେ ମଧ୍ୟ ବିମାନରେ କରୋନା ସଂକ୍ରମଣ ଆଶଙ୍କା କମିବ ନାହିଁ। ଅଧ୍ୟୟନରେ କୁହାଯାଇଛି, କରୋନା ରୋକିବା ପାଇଁ ବିମାନଯାତ୍ରୀମାନଙ୍କ ସ୍କ୍ରିନିଂ ଏବଂ ସ୍ବାସ୍ଥ୍ୟାବସ୍ଥା ଯାଞ୍ଚ କରାଯିବା ଜରୁରୀ ଅଟେ।
ଆଉ ଏକ ଘଟଣା ହେଉଛି, ହକଂକଂର। ଏଠାରେ ଏକ ଦମ୍ପତି ବିମାନରେ ଯାତ୍ରା କରିଥିଲେ। ସେହି ବିମାନରେ ଦୁଇ କର୍ମଚାରୀ କରୋନା ସଂକ୍ରମିତ ହୋଇଥିଲେ। ଯେତେବେଳେ ମାସ୍କ ବ୍ୟବହାର ବାଧ୍ୟତାମୂଳକ ନ ଥିଲା। ତେଣୁ ଏହି ୪ ଜଣ କରୋନା ସଂକ୍ରମିତ ହୋଇଥିଲେ। ପରୀକ୍ଷାରୁ ଜଣାପଡ଼ିଥିଲା ସମସ୍ତଙ୍କର ସମାନ ରିପୋର୍ଟ ଆସିଛି। ତେଣୁ ବିମାନ ଯାତ୍ରା ସମୟରେ କରୋନା ସଂକ୍ରମଣ ଅଧିକ ବୋଲି ଗବେଷକମାନେ ପରୀକ୍ଷା କରି କହିଛନ୍ତି।
