କେନ୍ଦୁଝର, ୨୨ା୧୦ (ସ୍ବ.ପ୍ର.)-କେନ୍ଦୁଝର ଡେଲି ମାର୍କେଟରେ ପ୍ରତିବର୍ଷ ଭଳି ଚଳିତ ବର୍ଷ ଦୁର୍ଗାପୂଜା ଅନୁଷ୍ଠିତ ହେବ। ଏଥିପାଇଁ ସମସ୍ତ ପ୍ରକାର ପ୍ରସ୍ତୁତି ଶେଷ ହୋଇଛି। ଦୀର୍ଘ ୫୫ ବର୍ଷ ହେଲା ଏହି ପୂଜା ଅନୁଷ୍ଠିତ ହୋଇଆସୁଛି। ତେବେ ବିନା ଭକ୍ତ, ବାଜା ଓ ସାଂସ୍କୃତିକ କାର୍ଯ୍ୟକ୍ରମରେ ଚଳିତ ବର୍ଷ ଏହି ପୂଜା ଆୟୋଜନ କରିବା ପାଇଁ କମିଟି ପକ୍ଷରୁ ନିଷ୍ପତ୍ତି ନିଆଯାଇଛି। ତେବେ ମୂର୍ତ୍ତିର ଉଚ୍ଚତା ହ୍ରାସ କରାଯାଇ ୪.୫ ଫୁଟ୍ ରଖାଯାଇଥିବାରୁ ପୂର୍ବ ଭଳି ମେଢ଼ ଓ ସାଜସଜ୍ଜା ହୋଇ ପାରିବ ନାହିଁ ା ପୂର୍ବରୁ ମେଢ଼ର ଉଚ୍ଚତା ପାଖାପାଖି ୧୪ ଫୁଟ୍ ରହୁଥିଲା ଏବଂ ମୂର୍ତ୍ତିର ଉଚ୍ଚତା ପାଖାପାଖି ୯ ଫୁଟ୍ ରହୁଥିଲା ା ଏଣୁ ଚଳିତ ବର୍ଷ ଦେବୀ ରୁପା ମୁକୁଟ ବଦଳରେ ଜରି ମୁକୁଟ ପିନ୍ଧିବେ ବୋଲି କମିଟି ପକ୍ଷରୁ କୁହାଯାଇଛି। ବଡ଼ ମୂର୍ତ୍ତି ନିର୍ମାଣ କରିବା ସୁବିଧା ଓ ଆକର୍ଷଣୀୟ ହୋଇଥାଏ। କିନ୍ତୁ ଛୋଟ ମୂର୍ତ୍ତି କରିବା ସୁବିଧା ନୁହେଁ ଏବଂ ସେଭଳି ସୌନ୍ଦର୍ଯ୍ୟମୟ ହୋଇପାରେ ନାହିଁ ା ବଡ଼ ମୂର୍ତ୍ତି ଅନୁସାରେ ରୁପା ମୁକୁଟ ଓ ଅନ୍ୟାନ୍ୟ ସାମଗ୍ରୀ ପ୍ରସ୍ତୁତ ହୋଇଥିଲା ା ଏଣୁ ଛୋଟ ମୁହଁରେ ସେସବୁ ହେବ ନାହିଁ ବୋଲି ମୂର୍ତ୍ତିକାର ବିଷ୍ଣୁ ଚରଣ ନାୟକ କହିଛନ୍ତି ା
ଦେବୀ ଦୁର୍ଗାଙ୍କ ମୂର୍ତ୍ତି ଆଗରୁ ବଡ଼ ହୋଇଥାଏ। ଏଣୁ ପୋଷାକ, ସାଜସଜ୍ଜା ଭଲ ଭାବରେ ହୋଇଥାଏ। ଏବେ କରୋନା କଟକଣା ପାଇଁ ପୂଜା ରୀତିନୀତି ପାରମ୍ପରିକ ଶୈଳୀରେ ଅନୁଷ୍ଠିତ ହେବ ବୋଲି ସମ୍ପାଦକ ଗୌରାଙ୍ଗ ଚରଣ ମିଶ୍ର କହିଛନ୍ତି ା କୋଭିଡ୍- ୧୯ କଟକଣା ମଧ୍ୟରେ ପୂଜାର୍ଚ୍ଚନା ଅନୁଷ୍ଠିତ ହେବ। ୭ଜଣରୁ ଅଧିକ ପୂଜା ସ୍ଥଳରେ ରହିବେ ନାହିଁ। ଭକ୍ତଙ୍କ ପାଇଁ ପୂଜାର୍ଚ୍ଚନା ବ୍ୟବସ୍ଥା କରାଯାଇନାହିଁ ବୋଲି କହିଛନ୍ତି ା ବିନା ଶୋଭାଯାତ୍ରା ଓ ବାଜାରେ ଭସାଣି ଉତ୍ସବ ଦଶହରା ପରଦିନ ଅନୁଷ୍ଠିତ ହେବ ା ବୈତରଣୀ ନଦୀରୁ କଳସରେ ପାଣି ଅଣାଯିବ ା ସବୁ ବର୍ଷ ଦଶଟି କଳସରେ ପାଣି ବୁହା ହୋଇ ଆସୁଥିବା ବେଳେ ଚଳିତ ବର୍ଷ ୫ଟି କଳସରେ ପାଣି ଅଣାଯିବ ା ଏଥିପାଇଁ ୭ ଜଣ ହିଁ ସାମିଲ ହେବେ। ଚଳିତ ବର୍ଷ ବ୍ୟୟ ପାଖାପାଖି ୧ ଲକ୍ଷ ଟଙ୍କା ହେବ ା ତେବେ ପୂର୍ବ ବର୍ଷ ପାଖାପାଖି ୩ ଲକ୍ଷ ଟଙ୍କା ଖର୍ଚ୍ଚ ହୋଇଥିଲା ା
