ଲଣ୍ଡନ,୩୧ା୫: ଦ୍ୱିତୀୟ ବିଶ୍ୱଯୁଦ୍ଧ ପରେ ପୃଥିବୀ ପାଇଁ ସବୁଠୁ ଘାତକ ସାବ୍ୟସ୍ତ ହୋଇଥିବା କୋଭିଡ୍-୧୯ ଭୂତାଣୁର ଉତ୍ପତ୍ତିକୁ ନେଇ ଖୋଳତାଡ଼ ଜାରି ରହିଥିବାବେଳେ ବ୍ରିଟେନର ଗବେଷକମାନେ ଏହା ଉପରୁ ପରଦା ହଟାଇଛନ୍ତି। ନୋଭେଲ କରୋନା ଭାଇରସ୍ର କୌଣସି ପୂର୍ବଜ ନାହିଁ। ଚାଇନା ବୈଜ୍ଞାନିକମାନେ ଉହାନ୍ ଲାବ୍ରେ କୋଭିଡ୍ ଭୂତାଣୁ ତିଆରି କରିଥିଲେ। ଏହା ପରେ ସେମାନେ ରିଭର୍ସ ଇଞ୍ଜିନିୟରିଂ ଭର୍ସନରେ ଏହି ଘାତକ ଭାଇରସ୍କୁ ଲୁଚାଇବା ପାଇଁ ଉଦ୍ୟମ କରିଥିଲେ, ଯେମିତି ଲାଗିବ ଏହା ବାଦୁଡ଼ିଠାରୁ ପ୍ରାକୃତିକ ରୂପେ କ୍ରମବିକଶିତ ହୋଇଛି। ଏହି ନୂଆ ପ୍ରଘଟ ପରେ ଏହାକୁ ଅସ୍ବୀକାର କରିଆସୁଥିବା ବେଜିଂ ପାଇଁ ଅଡ଼ୁଆ ସ୍ଥିତି ଉପୁଜିଛି।
କୋଭିଡ୍-୧୯ ଅଦ୍ୟାବଧି ବିଶ୍ୱର ୧୭୦,୬୯୬,୧୫୦ ଜଣଙ୍କୁ ସଂକ୍ରମିତ କରିଛି। ରବିବାର ରାତି ସୁଦ୍ଧା ଏହି ଭାଇରସ୍ରେ ଆକ୍ରାନ୍ତ ହୋଇ ୩,୫୫୦,୨୩୪ ଜଣଙ୍କ ମୃତ୍ୟୁ ଘଟିଥିବା ଓ୍ବାଲେର୍ଡାମିଟର ପକ୍ଷରୁ ଓ୍ବେବ୍ସାଇଟ୍ରେ ଅପ୍ଡେଟ୍ କରାଯାଇଛି। ଏହି ଭୂତାଣୁ ଯୋଗୁ ସାରା ବିଶ୍ୱର ଅର୍ଥନୀତି ଉଜୁଡ଼ିଯାଇଛି। ଭାରତ ସମେତ ବିଭିନ୍ନ ଦେଶର ସ୍ବାସ୍ଥ୍ୟସେବା ଭିତ୍ତିଭୂମି ସଂକ୍ରମିତଙ୍କ ବୋଝ ସମ୍ଭାଳି ନ ପାରି ଭୁଶୁଡ଼ିପଡ଼ିଛି। ତେଣୁ କରୋନାର ମୂଳ କେଉଁଠି ତାହା ଜାଣିବା ପାଇଁ ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ସମେତ ଶକ୍ତିଶାଳୀ ଆମେରିକା ଏବଂ ଅନ୍ୟ ବହୁଳ ପ୍ରଭାବିତ ଦେଶଗୁଡ଼ିକ ଆଗ୍ରହ ପ୍ରକାଶ କରିଛନ୍ତି। ଏହିକ୍ରମରେ ନିକଟରେ ଆମେରିକାର ଏକ ଗୋଇନ୍ଦା ରିପୋର୍ଟ ପ୍ରକାଶ ପାଇଥିଲା। ୨୦୧୯ ନଭେମ୍ବରରେ ଉହାନ୍ ଇନ୍ଷ୍ଟିଚ୍ୟୁଟ୍ ଅଫ୍ ଭାଇରୋଲୋଜିର ଅନେକ ଗବେଷକ ଅସୁସ୍ଥ ହୋଇପଡ଼ିଥିବା ନେଇ ଉକ୍ତ ରିପୋର୍ଟରେ ଦର୍ଶାଯାଇଥିଲା। ଆମେରିକା ରାଷ୍ଟ୍ରପତି ଜୋ ବାଇଡେନ୍ ଗୋଇନ୍ଦା ଅଧିକାରୀମାନଙ୍କୁ କରୋନାର ଜନ୍ମ ବୃତ୍ତାନ୍ତ ଖୋଜିବା ପାଇଁ ନିର୍ଦ୍ଦେଶ ଦେବା ପରେ ଚାଇନା ହଡ଼ବଡ଼େଇ ଯାଇଥିଲା। ଆମେରିକା କୌଣସି ଗମ୍ଭୀର ବୈଜ୍ଞାନିକ ଅଧ୍ୟୟନ ଉପରେ ବିଶ୍ୱାସ କରେନାହିଁ। ମହାମାରୀକୁ ନେଇ କେବଳ ଦୋଷାରୋପ ଓ ରାଜନୀତି କରିବା ଆମେରିକାର ଏକମାତ୍ର ଲକ୍ଷ୍ୟ ବୋଲି କହି ଚାଇନା ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଝାଓ ଲିଜିଆନ୍ ଶୁକ୍ରବାର ତମାମ ଅଭିଯୋଗକୁ ଖଣ୍ଡନ କରିଥିଲେ।
ତେବେ ଏହାର ଦୁଇଦିନ ପରେ ବ୍ରିଟେନର ଗବେଷକମାନେ ଯେଉଁ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆଣିଛନ୍ତି ତାହା ଚାଇନାର ଘାତକ କାରନାମା ଓ ଅସଲ ଚେହେରା ଉପରୁ ପରଦା ହଟାଇବାରେ ସକ୍ଷମ ହୋଇପାରେ ବୋଲି କୁହାଯାଉଛି।
ବ୍ରିଟିଶ୍ ପ୍ରଫେସର ଅଙ୍ଗସ୍ ଡାଲ୍ଗ୍ଲେଇଶ୍ ଏବଂ ନରଓ୍ବେର ବୈଜ୍ଞାନିକ ଡକ୍ଟର ବିର୍ଗର ସୋରେନ୍ସେନ ମିଳିତ ଭାବେ ଏକ ଗବେଷଣା କରିଥିଲେ। ସେମାନଙ୍କ ଗବେଷଣାମୂଳକ ନୂଆ ରିପୋର୍ଟ ରବିବାର ‘ଡେଲି ମେଲ୍’ରେ ପ୍ରକାଶ ପାଇଛି। ଉକ୍ତ ରିପୋର୍ଟରେ ଦର୍ଶାଯାଇଛି ଯେ, ସାର୍ସ-କୋଭ୍-୨ ଭାଇରସ୍ର କୌଣସି ବିଶ୍ୱସନୀୟ ପ୍ରାକୃତିକ ପୂର୍ବଜ ନାହିଁ। ଉହାନ୍ ଲାବ୍ରେ ଗବେଷଣାରତ ଚାଇନା ବୈଜ୍ଞାନିକମାନେ ‘ଗେନ୍ ଅଫ୍ ଫଙ୍କଶନ୍’ ନାମକ ଏକ ପ୍ରକଳ୍ପକୁ ନେଇ କାମ କରୁଥିଲେ। ସେମାନେ ବିଭିନ୍ନ ଗୁମ୍ଫାରେ ରହୁଥିବା ବାଦୁଡ଼ିଗୁଡ଼ିକୁ ନେଇ ଗବେଷଣା ଜାରି ରଖିଥିବାବେଳେ କରୋନାର ଉତ୍ପତ୍ତି ହୋଇଥିଲା ବୋଲି ଏହି ରିପୋର୍ଟରେ ଦାବି କରାଯାଇଛି। ବୈଜ୍ଞାନିକମାନେ ଗୁମ୍ଫାରେ ରହୁଥିବା ଏକ ନିର୍ଦ୍ଦିଷ୍ଟ ପ୍ରଜାତିର ବାଦୁଡ଼ିକୁ ପରୀକ୍ଷାନିରୀକ୍ଷା କରୁଥିବାବେଳେ ପ୍ରାକୃତିକ କରୋନା ଭାଇରସ୍ର ‘ବ୍ୟାକ୍ବୋନ୍’ ବାହାରିଥିଲା ଏବଂ ସେଥିରୁ କିଛି ଅଂଶ ଏକ ନୂଆ ‘ସ୍ପାଇକ୍’ ସହ ଯୋଡ଼ିବାରୁ ତାହା ଘାତକ ଓ ଅଧିକ ସଂକ୍ରାମକ କୋଭିଡ୍-୧୯ର ରୂପ ନେଇଥିଲା। ଉକ୍ତ ଗବେଷଣାମୂଳକ ନିବନ୍ଧରେ ଆହୁରି ଉଲ୍ଲେଖ କରାଯାଇଛି ଯେ, କୋଭିଡ୍-୧୯ ନମୁନାରେ ଏକ ‘ୟୁନିକ୍ ଫିଙ୍ଗରପ୍ରିଣ୍ଟ’ ଦେଖିବାକୁ ମିଳିଛି, ଯାହା ଲାବରେଟୋରିରେ କୌଶଳରେ କାର୍ଯ୍ୟ ସମ୍ପାଦନ ବେଳର ହୋଇଥାଇପାରେ। ତେବେ ଚାଇନାର ଯେଉଁ ବୈଜ୍ଞାନିକମାନେ ଏହାକୁ ନେଇ କିଛି କହିଛନ୍ତି, ସେମାନଙ୍କ ମୁହଁ ବନ୍ଦ କରାଯାଇଛି। ଏପରି କି ଅନେକ ବୈଜ୍ଞାନିକଙ୍କ ଠିକଣା ମିଳୁନାହିଁ। ଲାବ୍ ପକ୍ଷରୁ ଜାଣିଶୁଣି ସମସ୍ତ ତଥ୍ୟକୁ ନଷ୍ଟ କରାଯାଇଛି ବୋଲି ୨୨ ପୃଷ୍ଠା ସମ୍ବଳିତ ଉକ୍ତ ଅଧ୍ୟୟନରେ ଅଭିଯୋଗ ଅଣାଯାଇଛି। ଏହି ରିପୋର୍ଟ ପ୍ରକାଶ ପାଇବା ପରେ ସାରା ବିଶ୍ୱକୁ ବିପର୍ଯ୍ୟୟ ମୁହଁକୁ ଠେଲିଦେଇଥିବା କରୋନା ଭାଇରସ୍ର ଜନ୍ମଦାତା ଚାଇନା ବୋଲି ହେଉଥିବା ବିତର୍କକୁ ଏବେ ବଳ ମିଳିଛି।
