କଟକ ଅଫିସ,୨୦।୯: କଳା କ୍ଷେତ୍ରରେ କଟକର ପରିଚୟ ଭିନ୍ନ । କୁହାଯାଏ ୬୦ ଦଶକରେ ଏହିଠାରୁ ହିଁ ମେଲୋଡ଼ି କାର୍ଯ୍ୟକ୍ରମ ଆରମ୍ଭ ହୋଇଥିଲା। ପରବର୍ତ୍ତୀ ସମୟରେ ଯାହା ସମଗ୍ର ରାଜ୍ୟର ପୂରପଲ୍ଲୀକୁ ବ୍ୟାପିଥିଲା। ସେତେବେଳ ସମୟରେ ମଞ୍ଚ ଉପରେ ସ୍ବର୍ଗତଃ ଅକ୍ଷୟ ମହାନ୍ତି(ଖୋକା ଭାଇ) ପଦଟିଏ ନ ଗାଇଲେ ସେଠାକାର ଯାନିଯାତରା ପରିପୂର୍ଣ୍ଣ ହୁଏନି। ଦୋଳ ହେଉ କି ଦଶହରା, ଦୀପାବଳି ହେଉ କି ଡଙ୍ଗାଭସା। ବିଭିନ୍ନ ପର୍ବପର୍ବାଣୀରେ ଲୋକଙ୍କୁ ମନୋରଞ୍ଜନର ଖୋରାକ୍ ଯୋଗାଉଥିବା ମେଲୋଡ଼ି କଳାକାର ଏବେ କିନ୍ତୁ ହାତ ବାନ୍ଧି ବସିଛନ୍ତି…
ସମଗ୍ର ସ୍ତରକୁ ହାନି ପହଞ୍ଚାଇଛି ମହାମାରୀ କରୋନା। କଳାକାରମାନେ ମଧ୍ୟ ଏଥିରୁ ବାଦ୍ ପଡିନାହାନ୍ତି। କଳା ପରିବେଷଣ କରି ପେଟ ପୋଷୁଥିବା କଳାକାର ନିଜ ପ୍ରତିଭାକୁ ପ୍ରଦର୍ଶନ କରିବାର ସୁଯୋଗ ବି ନାହିଁ। ମାର୍ଚ୍ଚ ଶେଷ ସପ୍ତାହରୁ ଏ ପର୍ଯ୍ୟନ୍ତ ଗୋଟିଏ ହେଲେ ବି ଉତ୍ସବ କି ମହୋତ୍ସବ ଆୟୋଜନ କରାଯାଇନାହିଁ। ମେଲୋଡି କଳାକାରଙ୍କୁ ଅର୍ଥାଭାବ ଗ୍ରାସ କରିସାରିଲାଣି ବୋଲି ‘ସାଗର ସଙ୍ଗମ’ର ମାଲିକ ମହମ୍ମଦ ଆବିଦ୍ କହିଛନ୍ତି। ଚଳିତବର୍ଷ ଦଶହରା ଉପରେ ପ୍ରତିବନ୍ଧକ ଲାଗିସାରିଛି। ଏଭଳି ସ୍ଥିତିରେ ସୁଧାର ନ ଆସିବା ପର୍ଯ୍ୟନ୍ତ ଆସନ୍ତା କାଳୀପୂଜା, ବାଲିଯାତ୍ରା ଓ କାର୍ତ୍ତିକଶ୍ୱର ପୂଜା ମଧ୍ୟ ଜାକଜକମରେ ହେବନି ବୋଲି ପୂର୍ବାନୁମାନ କରାଯାଉଛି।
କରୋନା କଟକଣା ଆରମ୍ଭ ହେବା ପରେ କିଛି ମାସ ବିବାହ ଋତୁ ମଧ୍ୟ ଥିଲା। ବିବାହ କାର୍ଯ୍ୟକ୍ରମରେ ମେଲୋଡ଼ି ଆୟୋଜନ ଦେଖିବାକୁ ମିଳେ। ଏହାଛଡା କଲେଜର ବାର୍ଷିକୋତ୍ସବ ଓ ବିଭିନ୍ନ ମହୋତ୍ସବ ମଧ୍ୟ ଏପ୍ରିଲରୁ ଜୁନ୍ ଭିତରେ ଆୟୋଜନ କରାଯାଏ। ହେଲେ ଚଳିତବର୍ଷ ଗୋଟିଏ ହେଲେ ବି କାର୍ଯ୍ୟକ୍ରମ କରାଯାଇନାହିଁ। ମାର୍ଚ୍ଚ ୧୧ ତାରିଖରେ ଶେଷଥର ପାଇଁ ମେଲୋଡି କାର୍ଯ୍ୟକ୍ରମ କରିଥିଲୁ ବୋଲି ଆବିଦ୍ କହିଛନ୍ତି। ଏହି ତାରିଖ ସୁଦ୍ଧା ୭ଟି କାର୍ଯ୍ୟକ୍ରମର ଆଡଭାନ୍ସ ରାଶି ଗ୍ରହଣ କରିଥିଲୁ। ହେଲେ ସମସ୍ତ କାର୍ଯ୍ୟକ୍ରମ ବାତିଲ ହେବା ଯୋଗୁ ଟଙ୍କା ଫେରାଇବାକୁ ପଡ଼ିଥିଲା। ପରେ ପ୍ରାୟ ୨ମାସ ପାର୍ଟିର କଳାକାରମାନଙ୍କୁ କିଛି ଆର୍ଥିକ ସହାୟତା ଦିଆଯାଇଥିଲା। ଯାହା ଖୁବ୍ କମ୍ ଥିଲା। ଏହାପରେ ସହାୟତା ଦେବା ସମ୍ଭବପର ହୋଇ ନ ଥିଲା। ମଞ୍ଚରେ ନିଜ ପ୍ରତିଭାକୁ ପ୍ରଦର୍ଶନ କରୁଥିବା କଳାକାରମାନେ ଏବେ ପେଟ ପୋଷିବାକୁ ଭିନ୍ନ ବାଟ ବାଛି ସାରିଲେଣି ବୋଲି ଆବିଦ୍ କୁହନ୍ତି। କିଛି କଳାକାର ମଧ୍ୟ ଗଁାକୁ ଚାଲି ଯାଇଛନ୍ତି। ଆମେ କେବେ ତାଙ୍କୁ ଡାକରା ପଠାଇବୁ ବୋଲି ଅପେକ୍ଷା କରି ରହିଛନ୍ତି। ପ୍ରାୟ ସମୟ ଫୋନ୍ କରି କାର୍ଯ୍ୟକ୍ରମ ବିଷୟରେ ପଚାରୁଥିବାବେଳେ ତାଙ୍କୁ ଉତ୍ତର ଦେଇପାରୁନାହୁଁ ବୋଲି ଆବିଦ୍ କହିଥିଲେ। ସେହିପରି ହବିବ୍ ମେଲୋଡି ପାର୍ଟିର ମୁଖ୍ୟ ମହମ୍ମଦ ସାହିଦ୍ କହିଛନ୍ତି, ଏପରି ସ୍ଥିତିରେ ପେଟ ପୋଷିବା ଚିନ୍ତାଜନକ ବିଷୟ ହୋଇଛି। ବର୍ଷକୁ ୨୦ରୁ ୨୫ଟି କାର୍ଯ୍ୟକ୍ରମ ହେଲେ ସମସ୍ତେ ଅଳ୍ପବହୁତେ ଅର୍ଥ ରୋଜଗାର କରୁଥିଲେ। ହେଲେ ଏବେ ରୋଜଗାରର ମାଧ୍ୟମ ନାହିଁ।
