ଦାରିଙ୍ଗବାଡି,୨୫।୬(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକର ସିମନବାଡି ଫିଡ଼ରରେ ବାରମ୍ବାର ବିଦ୍ୟୁତ ବିଭ୍ରାଟ ଦେଖାଯାଉଛି । ଏହାର ସମାଧାନ ପାଇଁ ରାଜ୍ୟ ସରକାର ସିମନବାଡି ଫିଡ଼ର ପାଇଁ ସିମନବାଡି ଠାରେ ଲକ୍ଷାଧିକ ଟଙ୍କା ବିନିମୟରେ ଏକ ୩୩ /୧୧ କେଭି ସବଷ୍ଟେସନ ସ୍ଥାପନ କଲେ । କାର୍ଯ୍ୟ ସରିବାର ଦୀର୍ଘ ଦିନ ବିତିଯାଇଥିଲେ ମଧ୍ୟ କର୍ମଚାରୀ ଅଭାବ ଆଳ ଦେଖାଇ ଉକ୍ତ ସବଷ୍ଟେସନକୁ କାର୍ଯ୍ୟକ୍ଷମ କରିବାରେ ଅହେତୁକ ବିଳମ୍ବ କରିବା ସହ ଟାଳଟୁଳ ନୀତି ଅବଲମ୍ବନ କରାଯାଉଥିବା ନେଇ ଅଭିଯୋଗ ହେଉଛି ।
ଫଳରେ ସିମନବାଡି ଫିଡ଼ର ଉପରେ ନିର୍ଭର କରୁଥିବା ସିମନବାଡି ସମେତ ଶ୍ରାନିକେତା, କିରିକୁଟି, ତିଲୋରୀ, ବୁଡ଼ାଗୁଡା, ଗୁମିକିଆ, କୋଟଗଡ଼ ବ୍ଲକ ପକାରୀ,ବାଲିଗୁଡା ବ୍ଲକ ଋତୁଙ୍ଗିଆ ପଞ୍ଚାୟତର ହଜାର ହଜାର ଉପଭୋକ୍ତା ହଇରାଣ ହେଉଛନ୍ତି । ବିଦ୍ୟୁତ ଖୁଣ୍ଟ, ତାର ଥାଇ ମଧ୍ୟ ବାରମ୍ବର ବିଦ୍ୟୁତ ଘଣ୍ଟା ଘଣ୍ଟା ଧରି ଅଚକ ଯୋଗୁଁ ସେ ଡିବିରୀ, ଲଣ୍ଠନ ଓ ମହମବତୀ ଭାରସାରେ ଦିନ ରାତି ବିତୁଛି । ବାରମ୍ବାର ବିଦ୍ୟୁତ କାଟ ଯୋଗୁଁ ଜରୁରୀକାଳୀନ ସେବା ତଥା କ୍ଷୁଦ୍ର ବ୍ୟାଙ୍କ, ସ୍ୱାସ୍ଥ୍ୟକେନ୍ଦ୍ର, ଶିକ୍ଷା ବିଭାଗ ତଥା ସରକାରୀ ଓ ବେସରକାରୀ କାର୍ଯ୍ୟରେ ବାଧା ସୃଷ୍ଟି ହେଉଛି । ବିଶେଷ କରି ସଂଧ୍ୟା ନଇଁ ଆସିଲେ ବ୍ୟବସାୟିକ ଅନୁଷ୍ଠାନ ଗୁଡିକ ଅନ୍ଧାର କାରଣରୁ ବନ୍ଦ କରିଦେଉଛନ୍ତି । ଫଳରେ ଗ୍ରାହକମାନେ ବିଶେଷ କରି ଶ୍ରମିକମାନେ ନିଜ କାମଧନ୍ଦା ସାରି ମାର୍କେଟରୁ ରାସନ ପାଇଁ ଯିବା ବେଳେ ବ୍ୟବସାୟୀ ଅନୁଷ୍ଠାନ ଗୁଡିକ ବନ୍ଦ ରହୁଛି ।
ଏନେଇ ସିମନବାଡି ଗ୍ରାମର ଅମରେନ୍ଦ୍ର ପ୍ରଧାନ ଉକ୍ତ ସବଷ୍ଟେସନକୁ କାର୍ଯ୍ୟକ୍ଷମ କରିବା ପାଇଁ ଜିଲାପାଳଙ୍କ ଅଭିଯୋଗ ପ୍ରକୋଷ୍ଠରେ ଏକାଧିକ ଥର ଅଭିଯୋଗ ପତ୍ର ଦେବାପରେ ଜିଲାପାଳ ବେଦ ଭୂଷଣଙ୍କ ପ୍ରତିକ୍ରିୟା ନିଆଯାଇଥିଲା । ସେ ଖୁବ ଶୀଘ୍ର କାର୍ଯ୍ୟକ୍ଷମ କରାଯିବ ବୋଲି କହିଥିଲେ ମଧ୍ୟ ତାହା କାର୍ଯ୍ୟକ୍ଷମ କରିବାରେ ଅବହେଳା କରାଯାଉଥିବା ଅଭିଯୋଗ ହେଉଛି । ଏନେଇ ଜିଲା ସହକାରୀ ନିର୍ବାହୀ ଯନ୍ତ୍ରୀ ମାନସ ରଞ୍ଜନ ମହାରଣାଙ୍କ ପ୍ରତିକ୍ରିୟା ନିଆଯାଇଥିଲା ସେ ମଧ୍ୟ ଷ୍ଟାଫ୍ ଅଭାବ ବୋଲି କହିବା ସହ ଗୋଟିଏ ସପ୍ତାହ ମଧ୍ୟରେ ଏହାର କାର୍ଯ୍ୟକ୍ଷମ ହେବ କହିଥିଲେ ।ସେ ପ୍ରତିକ୍ରିୟା ଦେବାର ୩ ମାସ ବିତିଗଲାଣି କିନ୍ତୁ କାର୍ଯ୍ୟକ୍ଷମ ହୋଇପାରିଲା ନାହିଁ । ଆସନ୍ତା ୧୫ ଦିନ ମଧ୍ୟରେ କାର୍ଯ୍ୟକ୍ଷମ କରିବାକୁ ଆମେ ପ୍ରୟାସ କରୁଛୁ ବୋଲି କହିଛନ୍ତି ।
