ନୟାଗଡ଼ ଅଫିସ,୨୪।୬: ରାସ୍ତା ନିର୍ମାଣ ପାଇଁ ଜାତୀୟ ଗ୍ରୀନ୍ ଟ୍ରିବ୍ୟୁନାଲର ସବୁଜ ସଙ୍କେତ ପାଇବା ପରେ ନୟାଗଡ଼ ଜିଲା ପ୍ରଶାସନ ୧ ବନାମ ୧୭ ଖଣ୍ଡ ଗାଁ ମଧ୍ୟରେ ଲାଗି ରହିଥିବା ବିବାଦୀୟ ବଳଭଦ୍ରପୁର ଓ ଢ଼ିପମାଳ ୩ କି.ମି. ରାସ୍ତାକୁ ନିର୍ମାଣ କରିବାରେ ସଫଳ ହୋଇଛି । ଗତ ୨୧ ତାରିଖରେ ଆରମ୍ଭ ହୋଇଥିବା ଗୁଡୁପାଲିର ଗ୍ରାମ୍ୟ ଜଙ୍ଗଲ ମଧ୍ୟ ଦେଇ ରାସ୍ତା କାମ ୨୩ ତାରିଖରେ ଶେଷ ହୋଇଛି । ରାସ୍ତା ନିର୍ମାଣ ପାଇଁ ୧୪୪ ଧାରା ଜୁନ ୧୬ରୁ ଅନର୍ଦ୍ଦିଷ୍ଟ ସମୟ ପାଇଁ ଲାଗୁ ହୋଇଛି । ୩ ଦିନ ଧରି ୩ ମାଜିଷ୍ଟ୍ରେଟଙ୍କ ଉପସ୍ଥିତିରେ ୭ ପ୍ଲାଟୁନ୍ ଫୋର୍ସ ମୁତୟନ କରାଯାଇ ରାସ୍ତା ନିର୍ମାଣ କରାଯାଇଥିଲା । ଘଟଣା ସ୍ଥଳରେ ଉପଜିଲାପାଳ ଲଗ୍ନଜିତ ରାଉତ୍, ନୂଆଗାଁ ତହସିଲଦାର, ନୂଆଗାଁ ବିଡିଓ, ନୟାଗଡ଼ର ଅତିରିକ୍ତ ଏସ୍ପି ଉମାକାନ୍ତ ମଲ୍ଲିକ ଓ ବିଦ୍ୟୁତ୍ ପଣ୍ଡା, ନୟାଗଡ଼ ଏସ୍ଡିପିଓ ଶୁଭେନ୍ଦୁ ସିଂ, ୩ ଡିଏସ୍ପି, ସଦର ଥାନା ଆଇଆଇସି ଦୀପକ ଖଣ୍ଡାୟତରାୟ ପ୍ରମୁଖ ଉପସ୍ଥିତ ଥିଲେ ।
ବଳଭଦ୍ରପୁର ଓ ଢ଼ିପମାଳକୁ ରାସ୍ତା ନିର୍ମାଣ ବିବାଦର ମୂଳ କାରଣ ଥିଲା। ଜଙ୍ଗଲ ମଧ୍ୟରେ ରାସ୍ତା ବନ୍ଦ କରିବା ଓ ରାସ୍ତା କରିବା ପରି ଦାବି ନେଇ ମାଳିସାହି, ଢ଼େଙ୍କେଣା ଓ ଖଣ୍ଡୁଗାଁ ଆଦି ୩ ପଞ୍ଚାୟତର ୧ ବନାମ୧୭ ଖଣ୍ଡ ଗାଁର ଲୋକଙ୍କ ମଧ୍ୟରେ ୫ ବର୍ଷ ହେଲା ବିବାଦ ଲାଗି ରହିଛି । ପ୍ରଶାସନ ପକ୍ଷରୁ ବିଭିନ୍ନ ସମୟରେ ଉଭୟ ଗାଁକୁ ବୁଝାଶୁଝା କରିଥିଲେ ମଧ୍ୟ ସୁଫଳ ମିଳି ନ ଥିଲା ।
ରାସ୍ତା ନିର୍ମାଣରେ ବଳିପଡ଼ିଲା ୫୦୦ ଛୋଟ ଗଛ
ଗୁଡୁପାଙ୍ଗି ଗାଁ ସଭାପତି ଦିଲ୍ଲୀପ ନାୟକ କୁହନ୍ତି, ପ୍ରଶାସନ ପକ୍ଷରୁ ୩ ଦିନ ହେଲା ନିର୍ମାଣ ଚାଲିଥିବା ବଳଭଦ୍ରପୁର ଓ ଢ଼ିପମାଳ ୩ କି.ମି. ରାସ୍ତାରେ ପ୍ରାୟ ୫୦୦ ଛୋଟ ଗଛ ନଷ୍ଟ ହୋଇଛି । ଗତ ବର୍ଷ ଏଠାରେ ଚାରା ରୋପଣ ହୋଇଥିଲା। ରାସ୍ତା ନିର୍ମାଣ ନେଇ ପୋଲିସର ଅନୁରୋଧ କ୍ରମେ ଗାଁ ଲୋକମାନେ ନୀରବ ଅଛନ୍ତି । ତେବେ ଗଛ ନଷ୍ଟ କରି ଜଙ୍ଗଲ ମଧ୍ୟରେ ରାସ୍ତା ନେବା ଠିକ ହେଲା ନାହିଁ ବୋଲି ସେ କହିଛନ୍ତି ।
ଗଛ ନଷ୍ଟ ହେବା ନେଇ ୧୭ ଖଣ୍ଡ ଗାଁର କେତେଜଣ ଲୋକ ନିଜ ନାମ ଗୋପନ ରଖି କହିଛନ୍ତି, ଜଙ୍ଗଲରେ ପୂର୍ବରୁ ରାସ୍ତା ଥିଲା । ଏହି ରାସ୍ତାରେ ଯିବା ଆସିବା କରାଯାଉଥିଲା । ଗୁଡୁପାଙ୍ଗି ଲୋକ ରାସ୍ତା ନିର୍ମାଣକୁ ବିରୋଧ କରି ଗଛ ଲଗାଇ ଦେଇଥିଲେ । ଗଛ ପ୍ରଶାସନର ହସ୍ତକ୍ଷେପ ପରେ ପୁଣି ରାସ୍ତା ଫିଟିଛି । ୧୮ ଖଣ୍ଡ ଗାଁ ପାଇଁ ଏହା ଶୁଭ ଖବର । ୧୭ ଖଣ୍ଡ ଗାଁ ତରଫରୁ ଦେବରାଜ ବରାଡ କୁହନ୍ତି, ପ୍ରଶାସନ ପକ୍ଷରୁ ରାସ୍ତା କାର୍ଯ୍ୟ ଆରମ୍ଭ ହୋଇ ଶେଷ ହେବା ପରେ ଖୁସି ଲାଗୁଛି । ୧୭ ଖଣ୍ଡ ଗାଁ ଲୋକଙ୍କ ବହୁ ଦିନର ଦାବି ପୂରଣ ହୋଇଛି । ତେବେ ଗୁଡୁପାଙ୍ଗି ସହ ଆମର ସମ୍ପର୍କ ଭଲ ରହିବ ବୋଲି କହିଛନ୍ତି । ସଦର ଥାନା ଆଇଆଇସି ଦୀପକ ଖଣ୍ଡାୟତରାୟ କୁହନ୍ତି, ୩ କି.ମି. ରାସ୍ତାର ପ୍ରାରମ୍ଭିକ କାର୍ଯ୍ୟ ଶେଷ ହୋଇଛି । ବଳଭଦ୍ରପୁରରୁ ଢ଼ିପମାଳକୁ ରାସ୍ତା ଫିଟିଛି। ରଥଯାତ୍ରା ପାଇଁ ଫୋର୍ସ ଚାଲି ଯାଇଥିବାରୁ ପରବର୍ତ୍ତୀ ସମୟରେ ରାସ୍ତାର ପୂର୍ଣ୍ଣାଙ୍ଗ କାମ କରାଯିବ ବୋଲି ସେ କହିଛନ୍ତି।
ଗାଁ
