ଓ୍ବାଶିଂଟନ୍,୨୯ା୫: ବାହ୍ୟ ଋଣ ବୋଝରେ ନଇଁ ପଡ଼ିଥିବା ଆମେରିକା ଅର୍ଥନୀତିକୁ ଟ୍ରାକ୍କୁ ଫେରାଇ ଆଣି ଖିଲାପି ଅବସ୍ଥା ଏଡ଼ାଇବା ପାଇଁ ରାଷ୍ଟ୍ରପତି ଜୋ ବାଇଡେନ୍ ଓ ତାଙ୍କ ରିପବ୍ଲିକ୍ ବିରୋଧୀମାନେ ରବିବାର ଡେଟ୍ ସିଲିଂ ବୃଦ୍ଧି କରିବା ସକାଶେ ସହମତି ପ୍ରକାଶ କରିଛନ୍ତି। ବାଇଡେନ୍ ଏହାକୁ ଏକ ‘କମ୍ପ୍ରମାଇଜ୍’ ଭାବେ ଅଭିହିତ କରିଥିବାବେଳେ ହାଉସ୍ ସ୍ପିକର କେଭିନ୍ ମ୍ୟାକ୍କାର୍ଥି କହିଛନ୍ତି, ଆମେରିକାବାସୀଙ୍କ ପାଇଁ ଏହା ଏକ ଯୋଗ୍ୟ ଡିଲ୍। ଅନେକ ସପ୍ତାହ ଧରି ତିକ୍ତତାପୂର୍ଣ୍ଣ ଆଲୋଚନା ପରେ ବର୍ତ୍ତମାନ ବିଭାଜିତ କଂଗ୍ରେସ ଡିଲ୍କୁ ଅନୁମୋଦନ କରିବା ଜରୁରୀ। କାରଣ ଡିଲ୍ ସମ୍ପନ୍ନ ହୋଇ ନ ପାରିଲେ ଜୁନ୍ ୫ ସୁଦ୍ଧା ଆମେରିକା ନିଜ ସରକାରୀ ଷ୍ଟାଫ୍ଙ୍କୁ ଦରମା ଓ ଅବସରପ୍ରାପ୍ତ କର୍ମଚାରୀମାନଙ୍କୁ ପେନ୍ସନ ଦେଇପାରିବ ନାହିଁ ବୋଲି ଟ୍ରେଜେରି ପକ୍ଷରୁ ସତର୍କ କରାଯାଇଛି। ପୂର୍ବରୁ ଏହି ଡେଡ୍ଲାଇନ୍ ରହିଥିଲା ଜୁନ୍ ୧।
ସଂଗୃହୀତ ଟିକସଠାରୁ ଖର୍ଚ୍ଚ ଅଧିକ ହେଉଥିବାରୁ ସରକାର ଚଳାଇବା ପାଇଁ ଅର୍ଥ ଋଣ କରିବାକୁ ପଡ଼ିବ। ରିପବ୍ଲିକାନ୍ମାନେ ୩୧.୪ ଟ୍ରିଲିୟନ୍ ଡେଟ୍ ସୀମାକୁ ବୃଦ୍ଧି କରିବା ବଦଳରେ ଶିକ୍ଷା ଓ ଅନ୍ୟ ସାମାଜିକ କାର୍ଯ୍ୟକ୍ରମଗୁଡ଼ିକରେ ଖର୍ଚ୍ଚ କାଟ୍ କରାଯାଉ ବୋଲି ଦାବି କରୁଛନ୍ତି। ଡିଲ୍ର ବିସ୍ତୃତ ବିବରଣୀ ଆନୁଷ୍ଠାନିକ ଭାବେ ଜାରି କରାଯାଇନାହିଁ। କିନ୍ତୁ କେତେକ ଅନ୍ତର୍ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁସାରେ ସରକାରଙ୍କ ଅଣପ୍ରତିରକ୍ଷା ବ୍ୟୟରେ ୨ ବର୍ଷ ପର୍ଯ୍ୟନ୍ତ କିଛି ପରିବର୍ତ୍ତନ ଅଣାଯିବ ନାହିଁ। ୨୦୨୫ରେ ଏଥିରେ ୧% ବୃଦ୍ଧି କରାଯିବ। ସ୍ବଳ୍ପ ଆୟକାରୀ ଲୋକଙ୍କୁ ଖାଦ୍ୟ କିଣିବା ପାଇଁ ସହାୟତା ପ୍ରଦାନକାରୀ ସରକାରୀ ଯୋଜନାରେ ମଧ୍ୟ କେତେ ପରିବର୍ତ୍ତନ ଅଣାଯିବ ତାହା ମଧ୍ୟ ସ୍ପଷ୍ଟ ହୋଇନାହିଁ।
ରାଷ୍ଟ୍ରପତି ବାଇଡେନ୍ ଏକ ବିବୃତିରେ କହିଛନ୍ତି, ଉକ୍ତ ଚୁକ୍ତିନାମା ଏକ ସାଲିସ, ଯାହାକି ଦେଶ ପାଇଁ ଶୁଭଙ୍କର। କାରଣ ଏହାଦ୍ୱାରା ବିପଦପୂର୍ଣ୍ଣ ଖିଲାପିରୁ ସୃଷ୍ଟି ହେବାକୁ ଯାଉଥିବା ଆର୍ଥିକ ମାନ୍ଦାବସ୍ଥା, ରିଟାୟାରମେଣ୍ଟ ଆକାଉଣ୍ଟଗୁଡ଼ିକର ବିପର୍ଯ୍ୟୟ ଓ ଅନେକ ଲକ୍ଷ ନିଯୁକ୍ତି ଛଟେଇକୁ ଏଡ଼ାଯାଇପାରିବ। ହାଉସ୍ ସ୍ପିକର ମ୍ୟାକ୍କାର୍ଥି କହିଛନ୍ତି, ଖର୍ଚ୍ଚରେ ଐତିହାସିକ ହ୍ରାସ ଓ ସଂସ୍କାର ଲୋକଙ୍କୁ ଦାରିଦ୍ର୍ୟରୁ ଶ୍ରମଶକ୍ତିକୁ ଉଠାଇବ। ନୂଆ ଟିକସ କିମ୍ବା ସରକାରଙ୍କ ନୂଆ କାର୍ଯ୍ୟକ୍ରମ ରହିବ ନାହିଁ। ବୁଧବାର କଂଗ୍ରେସରେ ଏହା ଉପରେ ଭୋଟ କରାଯିବ। ଜୁନ୍ ୫ ପୂର୍ବରୁ ଡିଲ୍କୁ କଂଗ୍ରେସ ଅନୁମୋଦନ ନ କଲେ ଆର୍ଥିକ ବଜାର ଦୋହଲିଯିବ। ଆମେରିକା ରିସେସନ୍ ଭିତରକୁ ଚାଲିଯିବ। ୪୩୫ ଆସନ ବିଶିଷ୍ଟ ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସରେ ବିରୋଧୀ ରିପବ୍ଲିକାନ୍ସଙ୍କ ସଂଖ୍ୟା ୨୨୨ ଏବଂ ଶାସକ ଡେମୋକ୍ରାଟ୍ସଙ୍କ ସଂଖ୍ୟା ୨୧୩। ସେହିପରି ଉଚ୍ଚ ସଦନ ସିନେଟ୍ର ମୋଟ ୧୦୦ ଆସନ ମଧ୍ୟରୁ ଡେମୋକ୍ରାଟ୍ସଙ୍କ ଦଖଲରେ ୫୧ ଆସନ ଥିବାବେଳେ ରିପବ୍ଲିକାନ୍ସଙ୍କ ଦଖଲରେ ୪୯ ରହିଛି। ତେଣୁ ଏହି ଡିଲ୍ ସମ୍ପର୍କିତ ବିଲ୍ ପାରିତ ହେବା ପାଇଁ ଉଭୟ ଶାସକ ଓ ବିରୋଧୀଙ୍କ ସମର୍ଥନ ଜରୁରୀ। ଆଇନରେ ପରିଣତ କରିବା ପୂର୍ବରୁ ହାଉସ୍ ମେମ୍ବରମାନେ ୭୨ ଘଣ୍ଟା ଭିତରେ ଏହାକୁ ଭଲ ଭାବେ ପଢ଼ନ୍ତୁ ବୋଲି ପରାମର୍ଶ ଦେଇଛନ୍ତି।
