ଦାରିଙ୍ଗବାଡି,୧୭।୭(ଅରୁଣ ସାହୁ):ବାଲେଶ୍ୱର ଫକୀର ମୋହନ ସ୍ବୟଂଶାସିତ ମହାବିଦ୍ୟାଳୟରେ ଜଣେ ଛାତ୍ରୀଙ୍କୁ ନ୍ୟାୟ ଦାବିରେ ପ୍ରଦେଶ କଂଗ୍ରେସ କମିଟିର ରାଜ୍ୟ ଶାଖା ପକ୍ଷରୁ ୧୨ ଘଣ୍ଟିଆ ବନ୍ଦ ଡାକରା ଦିଆଯାଇଛି। ଏହାର ପ୍ରଭାବରେ କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ଅଞ୍ଚଳରେ ମଧ୍ୟ ବ୍ଲକ କଂଗ୍ରେସ କମିଟି ପକ୍ଷରୁ ବନ୍ଦ ପାଳନ କରାଯାଇଥିଲା। ତେବେ ଦାରିଙ୍ଗବାଡିର ଚାରିଛକଠାରେ ବ୍ଲକିଂ କରି ବ୍ୟାନର ବାନ୍ଧି ରାସ୍ତାରୋକୋ କରିଥିଲେ। ତେବେ ସ୍ଥାନୀୟ ଜି. ଉଦୟଗିରି ବିଧାୟକ ପ୍ରଫୁଲ ଚନ୍ଦ୍ର ପ୍ରଧାନଙ୍କ ଫଟୋକୁ ବ୍ୟାନରରୁ ହଟାଯାଇ ବିରୋଧ କରାଯାଇଥିଲା। କିଛି ସମୟ ପରେ ଜି. ଉଦୟଗିରି ବିଧାୟକ ପ୍ରଫୁଲ ଚନ୍ଦ୍ର ପ୍ରଧାନ ଦାରିଙ୍ଗବାଡି ଆସି ପହଞ୍ଚିଥିଲେ। ସେହି ସମୟରେ ଦଳର ବରିଷ୍ଠ କର୍ମୀ ସୁରେନ୍ଦ୍ର ସାହୁ ବିଧାୟକଙ୍କୁ ଗୋ ବ୍ୟାକ କହି ଏଠାରୁ ଚାଲିଯିବାକୁ କହିଥିଲେ। ଆଉ କିଛି କଂଗ୍ରେସ କର୍ମୀ ବିଧାୟକ ପ୍ରଧାନଙ୍କ ସପକ୍ଷରେ ଯୁକ୍ତି ବଢିଥିବା ବେଳେ ଅଧିକାଂଶ ବିଧାୟକଙ୍କୁ ବିରୋଧ କରିଥିଲେ।
ପରେ ଏକ ଖବରଦାତା ସମ୍ମିଳନୀରେ ବିଧାୟକ ପ୍ରଧାନ ନିଜ ପ୍ରତିକ୍ରିୟାରେ ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ବିଗିଡିଯିବା ସମ୍ପର୍କରେ କହିବା ସହ ଭାଜପା ସମର୍ଥିତ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦର ଜଣେ ଛାତ୍ରୀଙ୍କୁ ବାଲେଶ୍ୱର ଏଫଏମ ବିଶବିଦ୍ୟାଳୟରେ ସରକାର ସୁରକ୍ଷା ଦେବାରେ ବିଫଳ ବୋଲି କହିଥିଲେ। ପରେ ଖବରଦାତାମାନଙ୍କ ପ୍ରଶ୍ନରେ ତାଙ୍କୁ ବିରୋଧ କରାଯିବା ଘଟଣାକୁ ସେ ଗୁରୁତ୍ୱ ଦେଇ ନ ଥିଲେ। ସେ କହିଥିଲେ, ମୋର ଫଟୋ କଟାଯାଇଛି, ଏଥିରେ କିଛି କଥା ନାହିଁ। କାରଣ ମୁଁ ଦାରିଙ୍ଗବାଡି ଆସିଛି, ମୋର ଫୋଟର କିଛି ଆବଶ୍ୟକତା ନାହିଁ।
ଦଳରେ କନ୍ଦଳ ଓ ଦୁଇ ଫାଳ ହୋଇଯିବା ଘଟଣାରେ ବିଧାୟକ କହିଥିଲେ ଯେ, ଏହା ଆମ ଘରୋଇ ସମସ୍ୟା, ଆଲୋଚନା ମାଧ୍ୟମରେ ଆମେ ସମାଧାନ କରିବୁ। ବିଧାୟକ ଆନ୍ଦୋଳନ ସ୍ଥାନରେ ବହୁତ କମ ସମୟ ରହି ଫେରିଯିବା ପରେ ଦୁଇଗୋଷ୍ଠୀ ମଧ୍ୟରେ ଘଟଣାକୁ ନେଇ ଗଣ୍ଡଗୋଳ ହୋଇଥିଲା। ପୋଲିସ ପହଞ୍ଚି ସେମାନଙ୍କୁ ବୁଝାସୁଝା କରିଥିଲା।
