ଶିମଲା,୧୧।୧୨ : ସୁଖବିନ୍ଦର ସିଂ ସୁଖୁ ହିମାଚଳ ପ୍ରଦେଶର ୧୫ ତମ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି। ଏପରି କରି କଂଗ୍ରେସ ଭାଜପାର ଚା’ ବାଲାର ଜବାବ କ୍ଷୀର ବାଲାରେ ଦେଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚା’ ବିକ୍ରି କରୁଥିଲେ। ସେହିପରି ହିମାଚଳ ପ୍ରଦେଶର ନୂଆ ମୁଖ୍ୟମନ୍ତ୍ରୀ ହୋଇଥିବା ସୁଖବିନ୍ଦର ସିଂ ଛୋଟା ଶିମଲାରେ ଏକ ଦୁଗ୍ଧ କାଉଣ୍ଟରରେ କ୍ଷୀର ବିକ୍ରି କରୁଥିଲେ। ଜାତୀୟ ରାଜନୀତିରେ ସୁଖବିନ୍ଦର ସିଂ ସୁଖୁଙ୍କ ନାମ ଏପର୍ଯ୍ୟନ୍ତ ପ୍ରସିଦ୍ଧ ହୋଇ ନ ଥାଇପାରେ, କିନ୍ତୁ ହିମାଚଳ ପ୍ରଦେଶର ରାଜନୀତିରେ ତାଙ୍କର ସ୍ଥିତି ସୁଦୃଢ଼।
ନାଦୌନ ବିଧାନସଭା ନିର୍ବାଚନମଣ୍ଡଳୀରୁ ଚତୁର୍ଥ ଥର ପାଇଁ ବିଧାୟକ ଭାବରେ ନିର୍ବାଚିତ ହୋଇଥିବା ସୁଖବିନ୍ଦର ସିଂ ସୁଖୁ ମଧ୍ୟ ହିମାଚଳ ପ୍ରଦେଶ କଂଗ୍ରେସ ନିର୍ବାଚନ ପ୍ରଚାର କମିଟିର ସଭାପତି। ସେ ୨୦୦୩, ୨୦୦୭, ୨୦୧୭ ଏବଂ ବର୍ତ୍ତମାନ ୨୦୨୨ ରେ ସେ ଚତୁର୍ଥ ଥର ପାଇଁ ବିଧାୟକ ହୋଇଛନ୍ତି। ସେ ୨୬ ମାର୍ଚ୍ଚ ୧୯୬୪ ରେ ହମିରପୁର ଜିଲାର ନାଦୌନ ତହସିଲର ସେରା ଗ୍ରାମରେ ଜନ୍ମଗ୍ରହଣ କରିଥିଲେ। ସୁଖୁଙ୍କ ପିତା ରସିଲ ସିଂ ହିମାଚଳ ସଡକ ପରିବହନ ନିଗମ ଶିମଲାରେ ଡ୍ରାଇଭର ଥିବାବେଳେ ମାତା ସଂସାର ଦେଈ ଗୃହିଣୀ।
ଚାରି ଭାଇଭଉଣୀଙ୍କ ମଧ୍ୟରେ ସୁଖଙ୍କ ସ୍ଥାନ ଦ୍ୱିତୀୟ। ୧୯୯୮ ରେ, ସେ କମଲେଶ ଠାକୁରଙ୍କୁ ବିବାହ କରିଥିଲେ। ତାଙ୍କର ଦୁଇ ଝିଇ ଅଛନ୍ତି। ସୁଖବିନ୍ଦର ସିଂ ସୁଖୁ ମଧ୍ୟ ଶିମଲାରେ ଏଲଏଲବି ଅଧ୍ୟୟନ କରିଛନ୍ତି। ସେ କଲେଜରେ ଶ୍ରେଣୀ ପ୍ରତିନିଧୀ, ଛାତ୍ର କେନ୍ଦ୍ରୀୟ ସଂଘର ସାଧାରଣ ସମ୍ପାଦକ ଏବଂ ଛାତ୍ର କେନ୍ଦ୍ରୀୟ ସଂଘର ସଭାପତି ହୋଇଥିଲେ। ସେ ନିଜର ରାଜନୈତିକ କ୍ୟାରିୟର କଂଗ୍ରେସର ଛାତ୍ର ସଂଗଠନ ଏନଏସୟୁଆଇରୁ ଆରମ୍ଭ କରିଥିଲେ। ସେ ୧୯୮୮ ରୁ ୧୯୯୫ ପର୍ଯ୍ୟନ୍ତ ଏନଏସୟୁଆଇର ରାଜ୍ୟ ସଭାପତି ଥିଲେ। ତା’ପରେ ୧୯୯୫ରେ ତାଙ୍କୁ ଯୁବ କଂଗ୍ରେସର ରାଜ୍ୟ ସାଧାରଣ ସମ୍ପାଦକ କରାଯାଇଥିଲା। ୧୯୯୮ ରୁ ୨୦୦୮ ପର୍ଯ୍ୟନ୍ତ ସେ ଯୁବ କଂଗ୍ରେସର ରାଜ୍ୟ ସଭାପତି ଥିଲେ।
୨୦୦୮ ରେ ସେ ରାଜ୍ୟ କଂଗ୍ରେସର ସାଧାରଣ ସମ୍ପାଦକ ହୋଇଥିଲେ। ଏଥି ସହିତ, ୨୦୧୩ ରୁ ୨୦୧୯ ପର୍ଯ୍ୟନ୍ତ ସେ ରାଜ୍ୟ କଂଗ୍ରେସର ସଭାପତି ଦାୟିତ୍ୱ ଗ୍ରହଣ କରିଥିଲେ। ଦୁଇଥର ଶିମଲା ମ୍ୟୁନିସିପାଲିଟି କର୍ପୋରେଶନର କାଉନସିଲର ଭାବରେ ସୁଖବିନ୍ଦର ସିଂ ସୁଖୁ ନିର୍ବାଚିତ ହୋଇଥିଲେ। ରାଜ୍ୟରେ ବିଧାନସଭା ନିର୍ବାଚନ ପୂର୍ବରୁ ତାଙ୍କୁ ହିମାଚଳ ପ୍ରଦେଶ କଂଗ୍ରେସ ନିର୍ବାଚନ ପ୍ରଚାର କମିଟିର ସଭାପତି ଏବଂ ଟିକେଟ ବଣ୍ଟନ କମିଟିର ସଦସ୍ୟ କରାଯାଇଥିଲା।
