ନୂଆଦିଲ୍ଲୀ,୨୯।୧୨: ମଧ୍ୟ ଏସିଆ ଦେଶ ଉଜବେକିସ୍ତାନରରେ ଏକ ଭାରତୀୟ କଫ୍ ସିରପ୍ ପିଇ ୧୮ଜଣ ଶିଶୁଙ୍କ ମୃତ୍ୟୁ ଘଟିଛି। ଉଜବେକିସ୍ତାନର ସ୍ବାସ୍ଥ୍ୟ ମନ୍ତ୍ରଣାଳୟ ଦାବି କରିଛି, ଏହା ଏକ ଭାରତୀୟ ଫାର୍ମାସ୍ୟୁଟିକାଲ କମ୍ପାନୀର କାଶ ସିରପ ଡକ -୧ ମ୍ୟାକ୍ସ ପିଇ ଶିଶୁଙ୍କ ମୃତ୍ୟୁ ଘଟିଥିବା କୁହାଯାଇଛି। ବର୍ତ୍ତମାନ ଏହି ପ୍ରସଙ୍ଗରେ ଭାରତରେ ରାଜନୀତି ତୀବ୍ର ହୋଇଛି। କଂଗ୍ରେସ ନେତା ଜୟରାମ ରମେଶ ମେଡ ଇନ ଇଣ୍ଡିଆ କଫ୍ ସିରପ୍କୁ ମାରାତ୍ମକ ବୋଲି ମଧ୍ୟ କହିଛନ୍ତି।
ରମେଶ ଟୁଇଟ୍ କରି କହିଛନ୍ତି, ମେଡ ଇନ ଇଣ୍ଡିଆ ସିରପ୍ ମାରାତ୍ମକ ମନେହୁଏ। ପୂର୍ବରୁ ଗାମ୍ବିଆରେ ୭୦ ପିଲାଙ୍କର ମୃତ୍ୟୁ ହୋଇଥିଲା ଏବଂ ବର୍ତ୍ତମାନ ଉଜବେକିସ୍ତାନରେ ୧୮ ଜଣ ଶିଶୁ ମୃତ୍ୟୁବରଣ କରିଛନ୍ତି। ମୋଦି ସରକାର ଭାରତ ବିଷୟରେ ଗର୍ବ କରିବା ବନ୍ଦ କରି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ୍।
ସୂଚନାଯୋଗ୍ୟ, ଆଫ୍ରିକୀୟ ରାଷ୍ଟ୍ର ଗାମ୍ବିଆରେ ଭାରତୀୟ ସିରପ୍ ପିଇ ୬୬ ଶିଶୁଙ୍କ ମୃତ୍ୟୁ ଘଟିବାର କିଛି ମାସ ପରେ ଉଜ୍ବେକିସ୍ତାନରୁ ମଧ୍ୟ ଅନୁରୂପ ଅଭିଯୋଗ ଆସିଛି। ଉତ୍ତର ପ୍ରଦେଶରେ ମାରିଓନ୍ ବାୟୋଟେକ୍ ପକ୍ଷରୁ ପ୍ରସ୍ତୁତ ଡୋକ୍-୧ ମ୍ୟାକ୍ସ ସିରପ୍ ସେବନ କରି ଉଜ୍ବେକିସ୍ତାନର ୧୮ ଶିଶୁ ଆଖି ବୁଜିଦେଇଥିବା ସେଠାକାର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ମାରିଓନ୍ ବାୟୋଟେକ୍ ପ୍ରାଇଭେଟ୍ ଲିମିଟେଡ୍ ୨୦୧୨ରେ ଉଜ୍ବେକିସ୍ତାନରେ ପଞ୍ଜୀକୃତ ହୋଇଛି। ଏହି ଫାର୍ମାସ୍ୟୁଟିକାଲ୍ କମ୍ପାନୀର ଡୋକ୍-୧ ମ୍ୟାକ୍ସ ସିରପ୍ ୟୁପିର ନୋଏଡାରେ ପ୍ରସ୍ତୁତ କରାଯାଉଛି। ଉଜ୍ବେକିସ୍ତାନ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ମଙ୍ଗଳବାର ଜାରି ଏକ ବିବୃତିରେ କୁହାଯାଇଛି ଯେ, ଦେଶର ଶ୍ୱାସକ୍ରିୟାଜନିତ ରୋଗରେ ପୀଡ଼ିତ ୨୧ ଶିଶୁ ଏହି ସିରପ ପିଇଥିବାବେଳେ ସେମାନଙ୍କ ମଧ୍ୟରୁ ୧୮ ଜଣଙ୍କ ମୃତ୍ୟୁ ଘଟିଲାଣି। ରୋଗୀଣା ଶିଶୁମାନେ ହସ୍ପିଟାଲରେ ଚିକିତ୍ସିତ ହେବା ପୂର୍ବରୁ ନିଜ ଘରେ ୨-୭ ଦିନ ଧରି ଡୋକ୍-୧ ମ୍ୟାକ୍ସ ସିରପ ପିଇଥିଲେ। ସେମାନେ ଦିନକୁ ୨.୫-୫ ଏମ୍ଏଲ୍ ଲେଖାଏ ୩ରୁ ୪ ଥର ଏହାକୁ ସେବନ କରୁଥିଲେ, ଯାହାକି ଶିଶୁଙ୍କ ପାଇଁ ଔଷଧ ସେବନ ମାତ୍ରାର ମାନକଠାରୁ ଅଧିକ।
ପାରାସିଟାମଲ ଏହି ସିରପ୍ର ମୁଖ୍ୟ ଉପାଦାନ ହୋଇଥିବାବେଳେ ମା’ବାପାମାନେ ଭୁଲ୍ରେ ଆଣ୍ଟାଇ-କୋଲ୍ଡ ଉପଚାର ରୂପେ ନିଜ ପିଲାଙ୍କୁ ଡୋକ୍-୧ ମ୍ୟାକ୍ସ ଦେଇଥିଲେ। ଔଷଧ ଦୋକାନୀମାନଙ୍କ ପରାମର୍ଶ କ୍ରମେ ସେମାନେ ଏପରି କରିଥିଲେ। ସିରପ୍ ପିଇବା ପରେ ଶିଶୁମାନଙ୍କ ସ୍ବାସ୍ଥ୍ୟରେ ଅବନତି ପରିଲକ୍ଷିତ ହୋଇଥିଲା। ଲାବରେଟୋରିରେ ପ୍ରାରମ୍ଭିକ ଅଧ୍ୟୟନରୁ ଜଣାପଡ଼ିଛି ଯେ ଡୋକ୍-୧ ମ୍ୟାକ୍ସ ସିରପ୍ର ଏହି ସିରିଜରେ ଏଥିଲେନ୍ ଗ୍ଲାଇକୋଲ୍ ରହିଛି। ଏହି ଉପାଦାନ ବିଷାକ୍ତ ହୋଇଥିବାରୁ ସେବନ କରୁଥିବା ରୋଗୀଙ୍କଠାରେ ବାନ୍ତି ହେବା, ମୂର୍ଚ୍ଛା ହେବା, ମାଂସପେଶୀର ଅନିୟନ୍ତ୍ରିତ ସଙ୍କୋଚନ, ହୃତ୍ଘାତଜନିତ ସମସ୍ୟା ଏବଂ କିଡ୍ନୀ ଅକାମି ହୋଇଯିବା ଭଳି ଗମ୍ଭୀର ପରିବର୍ତ୍ତନ ଦେଖିବାକୁ ମିଳିପାରେ ବୋଲି ଉଜ୍ବେକିସ୍ତାନ ସ୍ବାସ୍ଥ୍ୟ ମନ୍ତ୍ରଣାଳୟ କହିଛି। ଶିଶୁ ମୃତ୍ୟୁ ପାଇଁ ଦାୟୀ ୭ ଜଣ କର୍ମଚାରୀଙ୍କୁ ଦାୟିତ୍ୱରେ ଅବହେଳା ଲାଗି ସେମାନଙ୍କ ଚାକିରିରୁ ବହିଷ୍କାର କରାଯାଇଛି। ଏଥିସହ ଡୋକ୍-୧ ମ୍ୟାକ୍ସ ସିରପ୍ ଓ ଟାବ୍ଲେଟ୍ ବିକ୍ରିକୁ ଉଜ୍ବେକିସ୍ତାନର ସବୁ ଔଷଧ ଦୋକାନରେ ନିଷେଧ କରାଯାଇଛି। ବିନା ପ୍ରେସ୍କ୍ରିପ୍ଶନରେ କୌଣସି ଦୋକାନରୁ ନିଜ ପିଲାଙ୍କ ପାଇଁ ଔଷଧ ନ କିଣିବା ପାଇଁ ଅଭିଭାବକମାନଙ୍କୁ ମନ୍ତ୍ରଣାଳୟ ପରାମର୍ଶ ଦେଇଛି। ପ୍ରକାଶ ଯେ ଗତ ଅକ୍ଟୋବରରେ ହରିୟାଣାର ମେଡେନ୍ ଫାର୍ମା ନିର୍ମିତ ୪ କଫ ସିରପ ପିଇବା ପରେ ଗାମ୍ବିଆର ୬୬ ଶିଶୁଙ୍କ ମୃତ୍ୟୁ ଘଟିଥିବା ଅଭିଯୋଗ ହେବା ପରେ ବିଶ୍ୱ ସ୍ବାସ୍ଥ୍ୟ ସଙ୍ଗଠନ ଭାରତୀୟ ଔଷଧକୁ ନେଇ ଚିନ୍ତା ବ୍ୟକ୍ତ କରିଥିଲା।
