ନୂଆଦିଲ୍ଲୀ,୨୭।୧୦: କଂଗ୍ରେସ ବାଣ୍ଟିବ ବିବାହ କାର୍ଡ। ଆଗାମୀ ଭାଲେଣ୍ଟାଇନ ଡେ ପାଇଁ ଅଛି ସ୍ପେଶିଆଲ ପ୍ଲାନ। ନିମନ୍ତ୍ରଣ କାର୍ଡକୁ ଗୋଲାପୀ ଓ କମଳା ରଙ୍ଗରେ ସଜ୍ଜା ଯାଇଛି। ଅତିଥିଙ୍କୁ ସାଦରେ ନିମନ୍ତ୍ରଣ କରିବା ସହ ଦର୍ଶନଭିଳାଷୀ ଭାବରେ ପ୍ରଧାନମନ୍ତ୍ରୀ ମୋଦି-କେସିଆରଙ୍କ ନାଁ ରହିଛି। ବିବାହ ମଣ୍ଡପର ସ୍ଥାନ ରହିଛି କେସିଆର ଫାର୍ମ ହାଉସ।
ତେବେ ଆଗକୁ ପାଞ୍ଚଟି ରାଜ୍ୟରେ ବିଧାନସଭା ନିର୍ବାଚନ ପାଖେଇ ଆସୁଥିବାରୁ ସବୁ ରାଜନୈତିକ ଦଳ ପ୍ରଚାର ପାଇଁ ଲାଗିପଡିଛନ୍ତି। ଏହି ସମୟରେ ତେଲଙ୍ଗାନା କଂଗ୍ରେସ ଏହି ବିବାହ କାର୍ଡକୁ ପ୍ରଚାର ପତ୍ର ଭାବେ ରାଜ୍ୟସାରା ବାଣ୍ଟିବା ଆରମ୍ଭ କରିଛି। ଏଥିରେ ବର-କନ୍ୟା ଅଛନ୍ତି ଭାଜପା-ବିଆରଏସ। ଭାରତ ରାଷ୍ଟ୍ର ସମିତି (ବିଆରଏସ) ଏବଂ ଭାଜପା ମଧ୍ୟରେ ଥିବା ଅଘୋଷିତ ମେଣ୍ଟକୁ ପ୍ରମାଣ କରିବାକୁ ତେଲଙ୍ଗାନା କଂଗ୍ରେସ ରାଜ୍ୟର ସମସ୍ତ ୧୧୯ଟି ବିଧାନସଭାରେ ବିବାହ କାର୍ଡ ବଣ୍ଟନ କରିବାକୁ ଯାଉଛି।
ଆଗାମୀ ନିର୍ବାଚନ ପାଇଁ ତେଲଙ୍ଗାନା କଂଗ୍ରେସ ଅଣ୍ଟା ଭିଡିଥିବାବେଳେ ଏକ ନିଆରା ଢଙ୍ଗରେ ଜନସାଧାରଣଙ୍କୁ ଆକର୍ଷିତ କରିବାକୁ ଚେଷ୍ଟା କରୁଛି। ବିବାହ କାର୍ଡରେ ବିଆରଏସ ୱେଡସ ଭାଜପା ଲେଖି ପରଦା ପଛରେ ଦୁଇଦଳ ଏକାଠି ଅଛନ୍ତି ବୋଲି ପ୍ରମାଣିତ କରିବାକୁ ଚେଷ୍ଟା କରିଛି।
ଏହି ବିବାହ କାର୍ଡ ଗୋଲାପୀ ଓ କମଳା ରଙ୍ଗର ମିଶ୍ରଣରେ ପ୍ରସ୍ତୁତ ହୋଇଛି। ଗୋଲାପୀ ବିଆରଏସ ଓ କମଳା ଭାଜପାର ରଙ୍ଗକୁ ନେଇ ବିବାହ କାର୍ଡ ପ୍ରସ୍ତୁତ ହୋଇଛି। ମଦ ଦୁର୍ନୀତିରେ କେସିଆରଙ୍କ ପରିବାର ଜେଲ ଯିବେ ନାହିଁ ବୋଲି ଭାଜପା ତାହା ଯୌତୁକ ଦେବ ବୋଲି ନିଷ୍ପତ୍ତି ନେଇଥିବା କାର୍ଡରେ ଲେଖାଯାଇଛି।
