ନୂଆଦିଲ୍ଲୀ,୨୨।୧୨ : ଚାଇନାରେ କରୋନା ସଂକ୍ରମଣ ବ୍ୟାପିବା ପରେ ଭାରତ ସରକାର ସତର୍କ ହୋଇଛନ୍ତି। ଏନେଇ ସରକାରଙ୍କ ପକ୍ଷରୁ ଚିନ୍ତା ପ୍ରକଟ କରାଯାଇଛି। ତେବେ ଏତେ ଚିନ୍ତା କରୁଥିବା ସରକାରଙ୍କ କୋଭିଡ ନ୍ୟାଶନାଲ ଟାସ୍କଫୋର୍ସର ବୈଠକ ଏପ୍ରିଲଠାରୁ ଅନୁଷ୍ଠିତ ହୋଇନାହିଁ।
ସରକାରଙ୍କ ଏଭଳି ଉଦାସୀନତା ନେଇ ବିଶେଷଜ୍ଞମାନଙ୍କ ମଧ୍ୟରେ ଚର୍ଚ୍ଚା ଆରମ୍ଭ ହୋଇଛି। ଇତିମଧ୍ୟରେ ଟାସ୍କଫୋର୍ସର ଅନେକ ସଦସ୍ୟ ଅବସର ନେଇ ସାରିଛନ୍ତି। ୨୦୨୦ରେ, ଟାସ୍କଫୋର୍ସର ୧୦୮ଥର ବୈଠକ ହୋଇଥିଲା। ୨୦୨୧ରେ ୪୪ ଥର ଏବଂ ଚଳିତ ବର୍ଷ କେବଳ ୭ ଥର ଟାସ୍କ ଫୋର୍ସ ବୈଠକ ବସିଛି। ଗତ ୭ ମାସ ଧରି ଟାସ୍କଫୋର୍ସର ଗୋଟିଏ ବି ବୈଠକ ହୋଇନାହିଁ। ମାର୍ଚ୍ଚ ୨୦୨୦ ରେ ଟାସ୍କଫୋର୍ସ ଗଠନ କରାଯାଇଥିଲା।
ଏହି ୨୪ ସଦସ୍ୟ ବିଶିଷ୍ଟ ଟାସ୍କ ଫୋର୍ସର ଏକ ଚତୁର୍ଥାଂଶ ସଦସ୍ୟ ଅବସର ନେଇଛନ୍ତି। ସେହି ପଦବୀରେ ଆଉ କେହି କାର୍ଯ୍ୟ କରୁ ନାହାନ୍ତି। ଆଇସିଏମଆର ମୁଖ୍ୟ ବଳରାମ ଭାର୍ଗବ ଆଉ ସେହି ପଦରେ ନାହାନ୍ତି। ଆଇସିଏମଆର ଏପିଡେମୋଲୋଜି ସମୀର ପଣ୍ଡା ଅବସର ନେଇଛନ୍ତି।
ଏହାର ସଦସ୍ୟ ରଣଦୀପ ଗୁଲେରିଆ ଏମ୍ସରୁ ନିର୍ଦ୍ଦେଶକ ପଦ ଛାଡି ଘରୋଇ ହସ୍ପିଟାଲରେ ଯୋଗ ଦେଇଛନ୍ତି। ଏନସିଡିସିର ପୂର୍ବତନ ନିର୍ଦ୍ଦେଶକ ଡାକ୍ତର ସୁଜିତ ସିଂ ଅବସର ନେଇଛନ୍ତି ଏବଂ ଏନସିଡିସିରେ ପରାମର୍ଶଦାତା ଭାବରେ କାର୍ଯ୍ୟ କରୁଛନ୍ତି। କରୋନା ପାଇଁ ଗଠିତ ନ୍ୟାଶନାଲ ଟାସ୍କ ଫୋର୍ସର ମୁଖ୍ୟ ଦାୟିତ୍ୱ ହେଉଛି ମହାମାରୀ ସମ୍ବନ୍ଧୀୟ ନୀତି ପ୍ରସ୍ତୁତ କରିବା। ମାତ୍ର ଏବେ ଏହା ଅଦରକାରୀ ହୋଇ ପଡି ରହିଛି।
କିନ୍ତୁ ପ୍ରଶ୍ନ ହେଉଛି ଏପ୍ରିଲରୁ ବର୍ତ୍ତମାନ ପର୍ଯ୍ୟନ୍ତ କୋଭିଡ ନ୍ୟାଶନାଲ ଟାସ୍କ ଫୋର୍ସର ବୈଠକ କାହିଁକି ଅନୁଷ୍ଠିତ ହୋଇନାହିଁ? ଏନେଇ ବିଶେଷଜ୍ଞମାନେ ଦେଶରେ ସଂକ୍ରମଣ ସ୍ଥିତି ନେଇ ଆଶଙ୍କାରେ ରହିଛନ୍ତି।
