ଶେରଗଡ଼, ୨୭ା୪(ଡି.ଏନ.ଏ.): ଶେରଗଡ ବ୍ଲକର ସୁନାନ୍ତର ଛକରେ ଗତ ସୋମବାର ଗୋଷ୍ଠୀ ସଂଘର୍ଷ ଘଟି ୧୩ଜଣ ଆହତ ହୋଇଥିଲେ। ସୁନାନ୍ତର ଗ୍ରାମର ଆହତ ଗନ୍ତାୟତ ଗୌଡଙ୍କ ଏତଲାକୁ ଭିତ୍ତି କରି ଶେରଗଡ଼ ପୋଲିସ ମାମଲା ରୁଜୁ କରି ଗୋଟିଏ ଗୋଷ୍ଠୀର ୧୩ ଜଣଙ୍କୁ ମଙ୍ଗଳବାର ରାତିରେ ଘରେ ଶୋଇଥିବା ଅବସ୍ଥାରେ ଗିରଫ କରିଛି। ସେମାନେ ହେଲେ ନିରଞ୍ଜନ ଜେନା, ଆଲୋକ ଜେନା, ସୁଶାନ୍ତ ଜେନା, ଶିବରାମ ନାହାକ, ନିରଞ୍ଜନ ବରାଡ, ସୁଦାମ ବରାଡ, ରାଜୀବ ଜେନା, କାହ୍ନୁ ଜେନା, ଟୁକୁନା ଜେନା, ସୁନୀଳ ଦାସ, ସଞ୍ଜୟ ସ୍ବାଇଁ, ଦୁଖା ସ୍ବାଇଁ ଓ ମହେନ୍ଦ୍ର ଜେନା। ତେବେ ନିରଞ୍ଜନ ଜେନା ଏହି ଘଟଣାରେ ସଂପୃକ୍ତ ନ ଥିବା ବେଳେ ତାଙ୍କୁ ପୋଲିସ ଅଯଥାରେ ଉଠାଇ ଆଣିଥିବା ଗ୍ରାମବାସୀ ଦାବି କରିଛନ୍ତି। ଏଣୁ ତାଙ୍କୁ ତୁରନ୍ତ ଛାଡିବାକୁ ଗ୍ରାମବାସୀ ବୁଧବାର ଶେରଗଡ଼-ହିଞ୍ଜିଳି ରାସ୍ତାରେ ଟାୟାର ଜାଳି ଅବରୋଧ କରିଛନ୍ତି। ପୋଲିସ ଏକ ମିନି ବସ୍ରେ ୧୩ ଗିରଫ ବ୍ୟକ୍ତିଙ୍କୁ ନେଉଥିବା ବେଳେ ତାଙ୍କୁ ଛାଡ଼ିଦେବାକୁ ଦାବି କରି ଶତାଧିକ ମହିଳା ଗାଡ଼ି ଆଗରେ ଠିଆହୋଇ ପାଟି ତୁଣ୍ଡ କରିଛନ୍ତି। ଘଟଣା ସ୍ଥଳରେ ଆସିକା ଉପଖଣ୍ଡ ପୋଲିସ ଅଧିକାରୀ ଉମାଶଙ୍କର ସିଂ ପହଞ୍ଚି ମହିଳାମାନଙ୍କୁ ବୁଝାଶୁଝା କରି ବସ୍ଟିକୁ ଶେରଗଡ଼ କୋର୍ଟକୁ ନେଇ ଯାଇଥିଲେ। ପରେ ମହିଳାମାନେ ଶେରଗଡ଼ ଥାନା ସମ୍ମୁଖରେ ଧାରଣାରେ ବସିଥିଲେ। କାଳିଆ ଓରଫ ନିରଞ୍ଜନ ଜେନାକୁ ଛାଡିବା ଦାବିରେ ଏସଡିପିଓ ଶ୍ରୀ ସିଂଙ୍କ ସହ ଯୁକ୍ତତର୍କ କରିଥିଲେ। ଉତ୍ତେଜନା ପରିସ୍ଥିତିକୁ ଦୃଷ୍ଟିରେ ରଖି ଘଟଣାସ୍ଥଳରେ ଆସିକା ଥାନା ଅଧିକାରୀ ପ୍ରଶାନ୍ତ କୁମାର ସାହୁ, ସୋରଡ଼ା ଥାନା ଅଧିକାରୀ ରମେଶ ଚନ୍ଦ୍ର ପ୍ରଧାନ, ଧରାକୋଟ ଥାନା ଅଧିକାରୀ ମମତା କୁମାରୀ ସାମନ୍ତରାୟ, ବଡଗଡ ଥାନା ଅଧିକାରୀଙ୍କ ସମେତ ବହୁ ପୋଲିସ ମୁତୟନ କରାଯାଇଛି। ମେଡିକାଲରେ ଚିକିତ୍ସିତ ହେଉଥିବା ବ୍ୟକ୍ତିମାନେ ସୁସ୍ଥହୋଇ ଫେରିବା ପରେ ଘଟଣାର ସମ୍ପୂର୍ଣ୍ଣ ତଥ୍ୟ ଉନ୍ମୋଚନ ହେବ ବୋଲି ଶେରଗଡ଼ ଥାନା ଅଧିକାରୀ ମନୋଜ କୁମାର ପ୍ରଧାନ କହିଛନ୍ତି। ସୂଚନାଯୋଗ୍ୟ, ସୋମବାର ସନ୍ଧ୍ୟାରେ ସୁନାନ୍ତର ଗ୍ରାମର ସଞ୍ଜୟ ଗୌଡ ପୋଖରୀରୁ ଗୋଧୋଇ ଫେରୁଥିବା ବେଳେ ପୂର୍ବ ଶତ୍ରୁତାକୁ କେନ୍ଦ୍ରକରି ତାଙ୍କୁ ହାଡୁ ଓରଫ ମହେନ୍ଦ୍ର ଜେନା ଖଣ୍ଡାରେ ଆକ୍ରମଣ କରିଥିଲେ। ପରେ ଉଭୟ ଗୋଷ୍ଠୀର ଲୋକେ ପହଞ୍ଚି ପରସ୍ପରକୁ ମାରଣାସ୍ତ୍ରରେ ଆକ୍ରମଣ ପ୍ରତିଆକ୍ରମଣ କରିଥିଲେ। ଉଭୟ ଗୋଷ୍ଠୀର ୧୩ଜଣ ଗୁରୁତର ଆହତ ହୋଇଥିଲେ। ଅପରପକ୍ଷରେ ଆଲୋକ ଜେନାଙ୍କ ଅଭିଯୋଗ କ୍ରମେ ପୋଲିସ ଆଉ ଏକ ମାମଲା ରୁଜୁ କରିଛି।
