ଭବାନୀପାଟଣା,୪।୮(ଉତ୍ତମ କୁମାର ଦାଶ): ଇନ୍ଦ୍ରାବତୀ ଜଳ ବିଦ୍ୟୁତ୍ ପ୍ରକଳ୍ପରୁ ୨୦୦୩ରୁ କେନାଲ ମାଧ୍ୟମରେ ଜଳ ସେଚନ ପ୍ରକିୟା ଆରମ୍ଭ ହୋଇଥିଲା। ପ୍ରଥମ ପର୍ଯ୍ୟାୟରେ କେବଳ ଜିଲାର ଧର୍ମଗଡ ଉପଖଣ୍ଡକୁ ଜଳ ସେଚିତ କରାଯାଉଥିଲା। ତେବେ ଗତ ୨ ବର୍ଷ ତଳେ ଭବାନୀପାଟଣା ବ୍ଲକର ଶଗଡା ମୁଖ୍ୟ କେନାଲ ସମ୍ପ୍ରସାରଣ ମାଧ୍ୟମରେ ପରୀକ୍ଷା ମୂଳକ ଭାବେ ପାଣି ଛଡାଯାଇଥିବାବେଳେ ଚଳିତ ଖରିଫ ଚାଷ ପାଇଁ ଶଗଡା ଅଞ୍ଚଳକୁ ସମ୍ପୂର୍ଣ୍ଣ ମାତ୍ରାରେ ଜଳ ସେଚନ ଆରମ୍ଭ ହୋଇଛି। ଯାହାକି ଏହି ଅଞ୍ଚଳକୁ ଦୀର୍ଘ ୨୦ବର୍ଷ ପରେ କେନାଲ ପାଣି ଆସିବାରୁ ସ୍ଥାନୀୟ ଚାଷୀଙ୍କ ମଧ୍ୟରେ ଖୁସି ଦେଖିବାକୁ ମିଳିଛି। ଏହାଦ୍ୱାରା ଭବାନୀପାଟଣା ବ୍ଲକର ୩୨ଟି ଗ୍ରାମକୁ ଜଳସେଚିତ କରାଯାଉଥିବାବେଳେ କେସିଙ୍ଗା ବ୍ଲକର ୧୭ଟି ଗ୍ରାମର ଚାଷୀ ଉପକୃତ ହେବେ। ଏହି ୨ବ୍ଲକର ୧୫ହଜାର ୨୬୦ହେକ୍ଟର ଚାଷ ଜମିକୁ ଜଳ ସେଚନ ଲକ୍ଷ ରଖାଯାଇଥିବାବେଳେ ବର୍ତ୍ତମାନ ଚଳିତ ଖରିଫ ପାଇଁ ୮ ହଜାର ୨୯୬ ହେକ୍ଟର ଚାଷ ଜମି ଜଳସେଚିତ ହେଉଥିବା ଜଣାପଡିଛି। ସେହିପରି ଧର୍ମଗଡ ବ୍ଲକ ପର୍ଲା ଅଞ୍ଚଳକୁ ମଧ୍ୟ ଦୀର୍ଘ ୨୦ ବର୍ଷ ପରେ କେନାଲ ପାଣି ଯୋଗାଇ ଦିଆଯାଇଥିବା ସୂଚନା ଦେଇଛନ୍ତି ଇନ୍ଦ୍ରାବତୀ ପ୍ରକଳ୍ପ ମୁଖ୍ୟ ନିର୍ମାଣ ଯନ୍ତ୍ରୀ ଅନୀଲ କୁମାର ପାଣିଗ୍ରାହୀ। ଇନ୍ଦ୍ରାବତୀ ପ୍ରକଳ୍ପରୁ ସମୂଦାୟ ୧ ଲକ୍ଷ ୧୫ହଜାର ୬୧୫ ହେକ୍ଟର ଚାଷ ଜମିକୁ କେନାଲ ଯୋଗେ ଜଳସେଚିତ କରାଯାଉଥିବାବେଳେ ଏହାଦ୍ୱାରା ଜିଲାର ୪୭୦ଟି ଗ୍ରାମର ଚାଷୀମାନେ ଉଭୟ ଖରିଫ ଓ ରବି (ଡାଲୁଅ) ଧାନ ଚାଷ କରିବାରେ ସକ୍ଷମ ହୋଇପାରୁଛନ୍ତି। ଏହି କେନାଲ ପାଣି ଆସିବା ପରେ ଚାଷୀମାନେ ବର୍ଷା ନ ହେଲେ ମଧ୍ୟ ସହଜରେ ନିଜର ଚାଷ କାମ କରିପାରିବେ।
