ପୁରୀ ଅଫିସ,୩।୫: ପୁରୀ ଜିଲାରେ ଶନିବାର ୩୦୬ ସଂକ୍ରମିତ ଚିହ୍ନଟ ହୋଇଛନ୍ତି। ଏମାନଙ୍କ ମଧ୍ୟରେ ପୁରୀ ସହରରୁ ୧୩୩ ଜଣ ସଂକ୍ରମିତ ରହିଛନ୍ତି। ସେହିପରି ପୁରୀ ସଦରରୁ ୪୯, ଅସ୍ତରଙ୍ଗରୁ ୧୨, ବ୍ରହ୍ମଗିରିରୁ ୨୭, ଡେଲାଙ୍ଗରୁ ୧୫, ଗୋପରୁ ୧୭, କାକଟପୁରରୁ ୧୧, କୋଣାର୍କ ଏନଏସିରୁ ୩, କଣାସରୁ ୧୧, କୃଷ୍ଣପ୍ରସାଦରୁ ୧୨, ନିମାପଡ଼ାରୁ ୧୧ ଓ ନିମାପଡ଼ା ଏନଏସିରୁ ୪ ଜଣ ସଂକ୍ରମିଚ ଚିହ୍ନଟ ହୋଇଛନ୍ତି। ପିପିଲି ବ୍ଲକରୁ ୨୩, ପିପିଲି ଏନ୍ଏସିରୁ ୭, ସତ୍ୟବାଦୀରୁ ୧୭, ଅନ୍ୟ ଜିଲାରୁ ୩ ଓ ରାଜ୍ୟ ବାହାରୁ ଜଣେ ଅକ୍ରାନ୍ତ ଚିହ୍ନଟ ହୋଇଛନ୍ତି। ଜିଲାରେ କୋଭିଡ୍ ସଂକ୍ରମଣ ବୃଦ୍ଧି ପାଉଥିବାବେଳେ ଆଇଡିଏଚ୍ରେ ସ୍ଥିତି ଭୁଶୁଡୁଥିବା ଅଭିଯୋଗ ସାମ୍ନାକୁ ଆସିଛି। ପୁରୀ ସହରର ବିମ୍ବାଧର ଦାଶଙ୍କ ଅଭିଯୋଗ ଅନୁଯାୟୀ, ରବିବାର ସେ ସ୍ତ୍ରୀଙ୍କୁ ନେଇ ଆଇଡିଏଚ୍ ଯାଇଥିଲେ। ସ୍ତ୍ରୀ କରୋନା ପଜିଟିଭ୍ ଚିହ୍ନଟ ହୋଇଥିବାବେଳେ ତାଙ୍କ ଶରୀର ନିସ୍ତେଜ ହୋଇପଡ଼ିଥିଲା। ତେବେ ସକାଳ ୭ରୁ ଅପରାହ୍ନ ୨ଟା ପର୍ଯ୍ୟନ୍ତ ଆଇଡିଏଚ୍ ଶଯ୍ୟାରେ ପଡ଼ିରହିଥିଲେ ମଧ୍ୟ କେହି ଡାକ୍ତର ଆସି ନ ଥିଲେ। ପରେ ସେ ବାଧ୍ୟ ହୋଇ ସ୍ତ୍ରୀଙ୍କୁ ଘରୋଇ ହସ୍ପିଟାଲକୁ ନେଇଥିଲେ। ଅନ୍ୟପକ୍ଷରେ ଏଭଳି ଅଭିଯୋଗକୁ ଆଇଡିଏଚ୍ କୋଭିଡ୍ ଇନଚାର୍ଜ ସୁଶାନ୍ତ ପଣ୍ଡା ଖଣ୍ଡନ କରିଛନ୍ତି। ସେ କହିଛନ୍ତି, ଡାକ୍ତରମାନେ ସକାଳ ସମୟରେ ଡ୍ୟୁଟିରେ ଥିଲେ। ରୋଗୀ ମାନଙ୍କୁ ନିର୍ଦ୍ଦିଷ୍ଟ ସମୟ ଅନ୍ତରାଳେ ଡାକ୍ତରମାନେ ଭେଟୁଛନ୍ତି। ତେବେ ଆଇଡିଏଚ୍ରେ ଏବେ ୩୦ଟି ଶଯ୍ୟା ବଢ଼ିଥିଲେ ମଧ୍ୟ ଡାକ୍ତରଙ୍କ ସଂଖ୍ୟା ବଢ଼ି ନ ଥିବା କଥାକୁ ସେ ସ୍ବୀକାର କରିଛନ୍ତି। ଏବେ ପ୍ରାୟ ୧୩ ଜଣ ଡାକ୍ତର କାର୍ଯ୍ୟରତ ଥିବାବେଳେ ଜଣେ ଡାକ୍ତର କରୋନା ସଂକ୍ରମିତ ହୋଇ ସଙ୍ଗରୋଧରେ ଥିବା ସୂଚନା ମିଳିଛି। ସେହିଭଳି ହୃତପିଣ୍ଡ ଓ ଫୁସଫୁସରେ ସମସ୍ୟା ଦେଖାଦେବାରୁ ଆନେକ ରୋଗୀ ରେଫର ହୋଇ ଭୁବନେଶ୍ୱର ଓ କଟକ ଯାଉଛନ୍ତି। ଏ ନେଇ ଜିଲାର ମୁଖ୍ୟ କୋଭିଡ୍ ଡାକ୍ତରଖାନାରେ ବ୍ୟବସ୍ଥାକୁ ନେଇ ଅତିରିକ୍ତ ଜିଲା ଚିକିତ୍ସାଧିକାରୀ (ଗଣସ୍ବାସ୍ଥ୍ୟ) ଗିରିଜା ଶଙ୍କର ରଥ କହିଛନ୍ତି, ଛାତି ରୋଗ ବିଶେଷଜ୍ଞ ଭାବେ ଜଣେ ଡାକ୍ତର ଆଇଡିଏଚ୍ରେ ଥିବାବେଳେ କାର୍ଡିଓଲୋଜିଷ୍ଟ ସ୍ପେଶାଲିଷ୍ଟଙ୍କୁ ଦାୟିତ୍ୱରେ ରଖାଯାଇନାହିଁ। ଅନ୍ୟପକ୍ଷରେ ଆଇନଜୀବୀ ବିଭୂତି ଭୂଷଣ ତ୍ରିପାଠୀ କହିଛନ୍ତି, ସଂକ୍ରମଣ ବ୍ୟାପିବା ପରେ ପୁରୀ ସହରରେ ଅନେକ ରୋଗୀଙ୍କ କ୍ଷେତ୍ରରେ କାର୍ଡିଓ ସମସ୍ୟା ଦେଖିବାକୁ ମିଳିଛି। ଏଣୁ ପୁରୀରେ ଏହି ବିଭାଗର ଜଣେ ସ୍ପେଶାଲିଷ୍ଟ ରହିବା ଆବଶ୍ୟକ। ତେବେ ରବିବାର ପୁରୀରେ କୋଭିଡ୍ରେ ମୃତ୍ୟୁ ଘଟିଥିବା ୩ଜଣଙ୍କ ଶେଷକୃତ୍ୟ ସମ୍ପନ୍ନ ହୋଇଛି। ଏମାନଙ୍କ ମଧ୍ୟରେ ୩୦ ତାରିଖରେ ପ୍ରାଣ ହରାଇଥିବା ମାଟିମଣ୍ଡପ ସାହିର ୨୯ ବର୍ଷୀୟ ଯୁବକ, ରବିବାର ଜଣେ ରିଜର୍ଭ ପୋଲିସ କର୍ମଚାରୀ ଓ ପୁରୀ ସଦରର ଜଣେ ମହିଳା ରହିଛନ୍ତି।
