ବ୍ରହ୍ମପୁର ଅଫିସ,୨୨।୧: ବ୍ରହ୍ମପୁର ସହରକୁ ସ୍ବଚ୍ଛ ଓ ସୁନ୍ଦର ଲକ୍ଷ୍ୟରେ ବ୍ରହ୍ମପୁର ମହାନଗର ନିଗମ (ବିଇଏମ୍ସି) ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି। ଏହି କ୍ରମରେ ଗତ ବର୍ଷ ବିଇଏମ୍ସି ସ୍ବଚ୍ଛ ସର୍ବେକ୍ଷଣରେ ୪ ର୍ଥ ସ୍ଥାନ ହାସଲ କରିଛି। ପୂର୍ବରୁ ବିଇଏମ୍ସି ସ୍ବଚ୍ଛ ସର୍ବେକ୍ଷଣରେ ପ୍ରଥମ ସ୍ଥାନ ଅଧିକାର କରିଥିଲା। ସିଟିଜେନ ଭଏସ ସଂଖ୍ୟା ହ୍ରାସ ପାଇବାରୁ ଗତ ବର୍ଷ ର଼୍ୟାଙ୍କ ହ୍ରାସ ପାଇଥିବା ବିଇଏମ୍ସି ପକ୍ଷରୁ କୁହାଯାଏ।
କିନ୍ତୁ କେତେକ କ୍ଷେତ୍ରରେ ବିଇଏମ୍ସିର ଖାମ ଖିଆଲି ନୀତିରୁ ସହରବାସୀ ନାନା ହଇରାଣ ହେଉଛନ୍ତି। ପରିବେଶ ମଧ୍ୟ ପ୍ରଦୂଷିତ ହେଉଛି। ଏଭଳି ଭାବେ ସହରର ୮ ନମ୍ବର ୱାର୍ଡରେ ଥିବା ଆବର୍ଜନା ସଂଗ୍ରହ ପଏଣ୍ଟ୍ ଅର୍ଥାତ ଟ୍ରାନ୍ସପ୍ରୋଟେଶନ ପଏଣ୍ଟ୍ ରହିଛି। ଏହି ପଏଣ୍ଟକୁ ଆଖପାଖ ଅଞ୍ଚଳର ଆର୍ବଜନା ସଂଗ୍ରହ କରାଯାଇ କଣ୍ଟେନର ମଧ୍ୟରେ ପକାଯାଇଥାଏ। ପରେ ଏହାକୁ ଟ୍ରକ ମାଧ୍ୟମରେ ମହୁଡା ବର୍ଜ୍ୟବସ୍ତୁ ପରିଚାଳନା ପ୍ରକଳ୍ପକୁ ପଠାଯାଇଥାଏ। କିନ୍ତୁ ବର୍ତ୍ତମାନ ଏହି ଆବର୍ଜନା ସଂଗ୍ରହ ପଏଣ୍ଟ୍ଟି ସାଧାରଣ ଲୋକଙ୍କ ସମସ୍ୟାର କେନ୍ଦ୍ର ବିନ୍ଦୁ ସାଙ୍ଗକୁ ପରିବେଶ ମଧ୍ୟ ଅସ୍ବାସ୍ଥ୍ୟକର ହୋଇ ପଡିଛି। ଫଳରେ ଉକ୍ତ ରାସ୍ତା ଦେଇ ଯାତାୟାତ ସମୟରେ ଦୁର୍ଗନ୍ଧରେ ନାକ ଫାଟି ପଡୁଛି। ଏପରିକି ରାସ୍ତା ଉପରେ ପଚାସଢା ଆବର୍ଜନା ଗୁଡିକ ପଡି ରହୁଛି।
ସୂଚନା ଯୋଗ୍ୟ, ଏହା ଫାଷ୍ଟଗେଟ ଓ ସାନ ବଜାର ଏବଂ ବଡ ବଜାରକୁ ସଂଯୋଗ କରୁଥିବା ରାସ୍ତା। ଏହି ରାସ୍ତା ଦେଇ ସାଧାରଣ ଲୋକ ଓ ଭାରୀଯାନ ଯାତାୟାତ କରିଥାଏ। କିନ୍ତୁ ଏଠାରେ ଥିବା ପଏଣ୍ଟ୍ ସମ୍ମୁଖରେ କୁଢ କୁଢ ଆବର୍ଜନା ଜମି ରହୁଛି। ଏପରିକି ପ୍ଲାଷ୍ଟିକ ଜରି ସମେତ ଅନ୍ୟାନ୍ୟ ଆବର୍ଜନା ଗୁଡିକୁ ଗୋରୁ ଓ ଘୁଷୁରିଙ୍କ ଚରା ଭୂମି ପାଲଟିଛି। ଆବର୍ଜନା ଜମି ରହିଥିବାରୁ ସମ୍ମୁଖରେ ଥିବା ଏକ ପୋଖରୀ ମଧ୍ୟ ଦୂଷିତ ହେଉଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତିି।
ସୂଚନା ଥାଉ କି, ବର୍ତ୍ତମାନ ୪୨ଟି ୱାର୍ଡ ନିମନ୍ତେ ଘରକୁ ଘର ଆବର୍ଜନା ସଂଗ୍ରହ ନିମନ୍ତେ ନିଗମର ୫୭ଟି ଗାଡି ରହିଛି। ଆବର୍ଜନା ସଂଗ୍ରହ ପରେ ଗାଡି ଗୁଡିକ ସହରରେ ଥିବା ୪ଟି ଆବର୍ଜନା ସଂଗ୍ରହ ପଏଣ୍ଟ୍କୁ ଯାଇଥାଏ। ଏଥିମଧ୍ୟରୁ ନୂଆ ବସ୍ଷ୍ଟାଣ୍ଡ, ଧାନମେରା ସାହି ରୋଡ, ଆମ୍ବ ମାର୍କେଟ ରୋଡ ଓ ଗୋଷାଣୀନୂଆଗଁାଠାରେ ପଏଣ୍ଟ ରହିଛି। ପ୍ରତି ପଏଣ୍ଟ୍ରେ ଥିବା କଣ୍ଟେନର ୪୦ ମେଟ୍ରିକ ଟନ୍ ଆବର୍ଜନା ସଂଗ୍ରହ ପାଇଁ କ୍ଷମତା ରଖିଥାଏ। କିନ୍ତୁ ଏହା ସଂଗ୍ରହ ପଏଣ୍ଟ୍ କ୍ଷେତ୍ରରେ ଏଭଳି ଅସୁବିଧା କାରଣରୁ ବହୁ ସମସ୍ୟା ଉପୁଜୁଛି। ସଫେଇ କ୍ଷେତ୍ରରେ ବିଇଏମ୍ସି ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବା ଅଭିଯୋଗ ହୋଇଛି। ଏ ନେଇ ବିଇଏମ୍ସି ଡେପୁଟି କମିଶନର ଆଶୀର୍ବାଦ ପରିଡାଙ୍କୁ ପଚାରିବାରୁ ନିଜେ ଉକ୍ତ ଜାଗା ପରିଦର୍ଶନ କରିବି। ସେଠାକାର ସ୍ଥାନ ସଫେଇ କ୍ଷେତ୍ରରେ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
