ଭୁବନେଶ୍ୱର, ୨୩।୫, (କ୍ରୀଡ଼ା ପ୍ରତିନିଧି): ”୧୭ ବର୍ଷରୁ କମ୍ ମହିଳା ଫୁଟବଲ ଦଳର ସହକାରୀ କୋଚ୍ ଦାୟିତ୍ୱ ଏବଂ ଇଣ୍ଡିଆନ ଓମେନ୍ସ ଲିଗ୍ (ଆଇଡବ୍ଲ୍ୟୁଏଲ୍)ରେ ଚୟନକର୍ତ୍ତା ଦାୟିତ୍ୱ ତୁଲାଇବାରେ ଭିନ୍ନ ଅଭିଜ୍ଞତା ରହିଲା। ବିଭିନ୍ନ ରାଜ୍ୟରୁ ଆସିଥିବା ନୂଆ ପିଲାଙ୍କୁ କ୍ୟାମ୍ପରେ କୋଚିଂ ଦେବା ଯେତିକି କଷ୍ଟ ଥିଲା ଅନେକ ଦକ୍ଷ ଖେଳାଳିଙ୍କ ଉପସ୍ଥିତିରେ ଆଇଡବ୍ଲ୍ୟୁଏଲ୍ରେ ଖେଳାଳି ଚୟନ କରିବା ସେତିକି ଚ୍ୟାଲେଞ୍ଜିଂ ଥିଲା। ତେବେ ଏଥିରୁ ମୋତେ ଅନେକ କିଛି ଶିଖିବାକୁ ମିଳିଲା“ ବୋଲି ଦୀର୍ଘ ୪ ମାସପରେ ସୋମବାର ଭୁବନେଶ୍ୱର ପ୍ରତ୍ୟାବର୍ତ୍ତନ କରିଥିବା ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ମହିଳା ଫୁଟବଲର ଶ୍ରଦ୍ଧାଞ୍ଜଳି ସାମନ୍ତରାୟ ପ୍ରକାଶ କରିଛନ୍ତି। କ୍ୟାମ୍ପପରେ ଆମେ ଜୋର୍ଡାନ ଯାଇ ଫ୍ରେଣ୍ଡଲି ମ୍ୟାଚ ଖେଳିଥିଲୁ। ଏହାପରେ ବାଂଲାଦେଶରେ ସାଫ୍ ଚାମ୍ପିୟନଶିପ୍ ଏବଂ କିର୍ଗିଜସ୍ଥାନରେ ଏଏଫ୍ସି ଟୁର୍ନାମେଣ୍ଟ ଖେଳିଲୁ। ବିଭିନ୍ନ ପରିବେଶରେ ଚ୍ୟାଲେଞ୍ଜ ଭିନ୍ନଭିନ୍ନ ଥିଲା। ମାତ୍ର ଆମ ପିଲାମାନେ ବହୁତ ଭଲ ଖେଳିଥିଲେ, ଯାହାକି ଆତ୍ମସନ୍ତୋଷ ଦେଇଥିଲା। ଆଇଡବ୍ଲ୍ୟୁଏଲ୍ ହେଉଛି ସିନିୟର ଖେଳାଳିଙ୍କ ପାଇଁ ଏକ ଭଲ ପ୍ଲାଟ୍ଫର୍ମ। ବିଭିନ୍ନ ନାମୀ କ୍ଲବର ପେସାଦାର ଅଭିଜ୍ଞ ଖେଳାଳି ଏଥିରେ ଖେଳିଥିଲେ। ବହୁତ ଭଲ ପିଲାଙ୍କ ମଧ୍ୟରୁ ଖେଳାଳି ଚୟନ ସହଜ ନ ଥିଲା, ତେବେ ସବୁକାର୍ଯ୍ୟ ସଫଳତାର ସହ ସମ୍ପନ୍ନ ହୋଇଥିଲା ବୋଲି ଶ୍ରଦ୍ଧାଞ୍ଜଳି କହିଛନ୍ତି। ମିଳିଥିବା ଦାୟିତ୍ୱକୁ ସଫଳତାର ସହ ସମ୍ପନ୍ନ କରିପାରିଥିବାରୁ ସର୍ବଭାରତୀୟ ଫୁଟବଲ ଫେଡେରେଶନ, ଫୁଟବଲ ଆସୋସିଏଶନ ଅଫ୍ ଓଡ଼ିଶା, ନିଯୁକ୍ତିଦାତା ନାଲ୍କୋ ଏବଂ ରାଜ୍ୟ କ୍ରୀଡ଼ା ବିଭାଗକୁ ସେ ଧନ୍ୟବାଦ ଜଣାଇଛନ୍ତି। ଶ୍ରଦ୍ଧାଞ୍ଜଳିଙ୍କୁ ସ୍ବାଗତ କରିବା ପାଇଁ ବିମାନବନ୍ଦରରେ ରାଜ୍ୟ କ୍ରୀଡ଼ା ବିଭାଗର କର୍ମକର୍ତ୍ତା ଓ ଅନେକ ଶୁଭେଚ୍ଛୁ ଉପସ୍ଥିତ ଥିଲେ।
