ନୂଆଦିଲ୍ଲୀ, ୭।୮: ତାମିଲନାଡୁ ଏବଂ କର୍ନାଟକ ମଧ୍ୟରେ କାବେରୀ ନଦୀ ଜଳକୁ ନେଇ ବିବାଦ ଜାରି ରହିଛି। ଏହି ସମୟରେ ମୁଖ୍ୟମନ୍ତ୍ରୀ ବିଜୟ ଥାଲାପତି କହିଛନ୍ତି ଯେ, କାବେରୀ ମୁଦ୍ଦାକୁ ଆଇନଗତ ଉପାୟରେ ସମାଧାନ କରିବା ପାଇଁ ସେ ଦୃଢ଼ ସଂକଳ୍ପବଦ୍ଧ ଏବଂ ଏଥିରେ କୌଣସି ପରିବର୍ତ୍ତନ ହେବ ନାହିଁ।ମୁଖ୍ୟମନ୍ତ୍ରୀ ପରୋକ୍ଷରେ ବିରୋଧୀ ଦଳ ନେତା ଉଦୟନିଧି ଷ୍ଟାଲିନଙ୍କ ବିବାଦୀୟ ମନ୍ତବ୍ୟର ଜବାବ ମଧ୍ୟ ଦେଇଛନ୍ତି। ସେ କହିଛନ୍ତି, “ମୁଁ ନୀଚ ରାଜନୀତିରେ ପଡ଼ିବାକୁ ଚାହୁଁନାହିଁ।” ଷ୍ଟାଲିନ ଗତଦିନରେ ତଞ୍ଜାଭୁରଠାରେ କାବେରୀ ମୁଦ୍ଦା ଉପରେ ଭାଷଣ ଦେଉଥିଲେ। ଏହି ସମୟରେ ଭିଡ଼ରୁ “ତ୍ରିଷା, ତ୍ରିଷା” ନାରାବାଜି ହେଉଥିବା ବେଳେ ସେ ଏକ ଅଶ୍ଳୀଳ ଏବଂ ଦ୍ୱିଅର୍ଥବୋଧକ ମନ୍ତବ୍ୟ ଦେଇଥିଲେ।
ଏହି ବକ୍ତବ୍ୟ ପରେ TVK ଏବଂ ଭାଜପା ନେତାମାନେ ତାଙ୍କର କଡ଼ା ସମାଲୋଚନା କରିଥିଲେ। ପରବର୍ତ୍ତୀ ସମୟରେ, ଅଭିଯୋଗ ଆଧାରରେ ପୋଲିସ ଉଦୟନିଧି ଷ୍ଟାଲିନଙ୍କୁ ହାଜତକୁ ନେଇ ପଚରାଉଚୁରା କରିଥିଲା। ତେବେ ହାଇକୋର୍ଟଙ୍କ ନିର୍ଦ୍ଦେଶ ପରେ ତାଙ୍କୁ ଛାଡ଼ି ଦିଆଯାଇଥିଲା।
ମୁଖ୍ୟମନ୍ତ୍ରୀ କହିଛନ୍ତି, “ମୁଁ ବେଙ୍ଗାଲୁରୁ ଯାଇ ଏହି ମୁଦ୍ଦାର ସମାଧାନ କରିବାକୁ ଚିନ୍ତା କରିଥିଲି। ଭାବିଥିଲି ପଡ଼ୋଶୀ ରାଜ୍ୟ ସହିତ ଆଲୋଚନା କରାଯାଉ, କାରଣ ଆମର କଟ୍ଟର ଶତ୍ରୁ ଦେଶମାନେ ବି ସମସ୍ୟାର ସମାଧାନ ପାଇଁ ଆଲୋଚନା କରନ୍ତି।”
ସେ ଆହୁରି କହିଛନ୍ତି, “ତାମିଲନାଡୁର ଜନସାଧାରଣଙ୍କ ପାଇଁ କାବେରୀ ମୁଦ୍ଦାରେ ଆଲୋଚନା କରିବାକୁ ଯାଇ ମୁଁ ଅପମାନ ସହିବାକୁ ବି ପ୍ରସ୍ତୁତ ଥିଲି।” କଂଗ୍ରେସର ସ୍ୱର୍ଗତ ନେତାଙ୍କ ସନ୍ଦର୍ଭ ଦେଇ ବିଜୟ କହିଛନ୍ତି ଯେ, କାବେରୀ ମୁଦ୍ଦାକୁ ଅତ୍ୟନ୍ତ ସାବଧାନତା ଏବଂ ସମ୍ୱେଦନଶୀଳତାର ସହ ପରିଚାଳନା କରିବାର ଆବଶ୍ୟକତା ରହିଛି।
କାବେରୀ ନଦୀ ଜଳବଣ୍ଟନକୁ ନେଇ ତାମିଲନାଡୁ ଏବଂ କର୍ନାଟକ ମଧ୍ୟରେ ଦୀର୍ଘ ଦିନରୁ ବିବାଦ ଚାଲିଆସୁଛି। ତାମିଲନାଡୁ ମୁଖ୍ୟମନ୍ତ୍ରୀ ବିଧାନସଭା ର୍ନିବାଚନ ସମୟରେ ଏହି ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଇଥିଲେ।
DMK ବିଧାୟକ ଉଦୟନିଧି ଷ୍ଟାଲିନ କହିଛନ୍ତି, “କର୍ନାଟକ ମେକେଦାଟୁ ବନ୍ଧ ନିର୍ମାଣ କରିବାକୁ ଆଗ୍ରହୀ। ଏହି ମୁଦ୍ଦାରେ କର୍ନାଟକ ସରକାର ଆଗକୁ ବଢ଼ୁଛନ୍ତି। କର୍ନାଟକ ସରକାରଙ୍କ ଭଳି, ଆମକୁ ମଧ୍ୟ ଦେଖାଇବାକୁ ପଡ଼ିବ ଯେ ଆମେ ମେକେଦାଟୁ ବନ୍ଧ ନିର୍ମାଣ ବିରୋଧରେ ଏକଜୁଟ। ତାମିଲନାଡୁର ସମସ୍ତ ରାଜନୈତିକ ଦଳ ସରକାରଙ୍କ ନିକଟରେ ମେକେଦାଟୁ ବନ୍ଧ ମୁଦ୍ଦାରେ ସର୍ୱଦଳୀୟ ବୈଠକ ଡାକିବାକୁ ଦାବି କରୁଛନ୍ତି। ସମସ୍ତେ ପଚାରୁଛନ୍ତି ଯେ ତାମିଲନାଡୁ ସରକାର ଏହି ମାମଲାରେ ସର୍ୱଦଳୀୟ ବୈଠକ ଡାକିବାରୁ କାହିଁକି ଓହରି ଯାଉଛନ୍ତି?”
