ଦାରିଙ୍ଗବାଡ଼ି,୧୪ା୩(ଡି.ଏନ.ଏ.): ଦାରିଙ୍ଗବାଡ଼ି ବ୍ଲକର ଦୁର୍ଗମ ଅଞ୍ଚଳରେ ରହିଥିବା ପର୍ତ୍ତମାହା ପଞ୍ଚାୟତ ଯୁଗାବାଡି ପ୍ରକଳ୍ପ ଉଚ୍ଚ ପ୍ରାଥମିକ ବିଦ୍ୟାଳୟ ସୋମବାର ଗୋଟିଏ ଓଳି ଖୋଳା ରହିଥିବା ବେଳେ ମାଧ୍ୟାହ୍ନରେ ଛୁଟି କରିଦିଆଯାଇଛି। ମଧ୍ୟାହ୍ନଭୋଜନ ନ ରାନ୍ଧି ବିଦ୍ୟାଳୟରେ ତାଲା ପକାଇ ପ୍ରଧାନ ଶିକ୍ଷକ ଲକ୍ଷ୍ମୀଧର ବରା ଚାଲିଯାଇଥିବା ଗ୍ରାମବାସୀ ଓ ଛାତ୍ରୀଛାତ୍ରମାନେ କହିଛନ୍ତି । ଉକ୍ତ ବିଦ୍ୟାଳୟରେ ମୋଟ ୪ ଜଣ ଶିକ୍ଷକ ରହିଥିବା ବେଳେ ଜଣେ ଦୀର୍ଘ ଦିନ ହେଲା ଅନୁପସ୍ଥିତ ରହିଛନ୍ତି । ଏ ନେଇ ବିଇଓଙ୍କ କାର୍ଯ୍ୟାଳୟ ପକ୍ଷରୁ ଜିଲାପାଳଙ୍କ କାର୍ଯ୍ୟାଳୟକୁ ଅନୁପସ୍ଥିତ ଶିକ୍ଷକଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଚିଠି କରାଯାଇଥିବା ବିଇଓ ରସାନନ୍ଦ କରଙ୍କ ସୂତ୍ରରୁ ଜଣାପଡିଛି। ଅନ୍ୟ ୩ଜଣ ଶିକ୍ଷକଙ୍କ ମଧ୍ୟରୁ ଜଣେ ଶିକ୍ଷକ ପ୍ରଫୁଲ୍ଲ ମଣ୍ଡାଇ ବିଭାଗ ପକ୍ଷରୁ ଦାରିଙ୍ଗବାଡ଼ିଠାରେ ତାଲିମ ନେଉଛନ୍ତି ଆଉ ଜଣେ ଶିକ୍ଷକ ଦୁଷ୍ମନ୍ତ ଦଳବେହେରାଙ୍କ ରବିବାର ତାଲିମ ନେବା ଶେଷ ହୋଇଛି। ସୋମବାର ବିଦ୍ୟାଳୟକୁ କେବଳ ପ୍ରଧାନ ଶିକ୍ଷକ ଆସି ମାଧ୍ୟାହ୍ନରେ ବିଦ୍ୟାଳୟରେ ମାଧ୍ୟାହ୍ନ ଭୋଜନ ରୋଷେଇ କରାଯାଇ ନ ଥିବାରୁ ଛାତ୍ରୀଛାତ୍ରଙ୍କୁ ଖାଇବାକୁ ଘରକୁ ପଠାଇଦେବା ସହ ବିଦ୍ୟାଳୟ ଚାବି ପକାଇ ଘରକୁ ଚାଲିଯାଇଥିଲେ। ଯୁଗାବାଡି ଘାଟି ପାହାଡ଼ ତଥା ଦୁର୍ଗମ ଅଞ୍ଚଳରେ ରହିଥିବାରୁ ସେଠାକୁ ଶିକ୍ଷକମାନେ ନିୟମିତ ଯାଉ ନ ଥିବା ବେଳେ ବିଦ୍ୟାଳୟ ସକାଳ ୧୦ରେ ଖୋଲିବା ବଦଳରେ ବହୁ ସମୟରେ ୧୧ଟା ହେଉଥିବା ଓ ଶୀଘ୍ର ସମୟ ପୂର୍ବରୁ ବିଦ୍ୟାଳୟ ବନ୍ଦ କରି ଶିକ୍ଷକମାନେ ଚାଲିଯାଉଥିବା କେତେଜଣ ଗ୍ରାମବାସୀ କହିଛନ୍ତି। ଏ ନେଇ ସିଆର୍ସିସି ହରିଶଙ୍କର ପ୍ରଧାନ କହିଛନ୍ତି, ବିଦ୍ୟାଳୟରେ ମଧ୍ୟାହ୍ନଭୋଜନ ରୋଷେଇ କରୁଥିବା ପାଚିକାମାନେ ସେମାନଙ୍କ ବିଭିନ୍ନ ଦାବିରେ ଆନ୍ଦୋଳନରେ ରହିଥିବାରୁ ମାଧ୍ୟାହ୍ନଭୋଜନ ରୋଷେଇ ହୋଇପାରିନାହିଁ। ତେଣୁ ଛାତ୍ରୀଛାତ୍ର ଖାଇବାକୁ ଘରକୁ ଚାଲି ଯାଇଥିବା କହିଛନ୍ତି। ଏ ନେଇ ବିଦ୍ୟାଳୟର ପ୍ରଧାନ ଶିକ୍ଷକ ଲକ୍ଷ୍ମୀଧର ବରାଙ୍କୁ ପଚାରିବାରୁ ଛାତ୍ରୀଛାତ୍ରଙ୍କୁ ପ୍ରବଳ ଭୋକ ହେବାରୁ ସେମାନଙ୍କୁ ତାଙ୍କ ନିଜ ଘରକୁ ପଠାଯାଇଥିଲା, ହେଲେ ଖାଇବାକୁ ଯାଇ ଆଉ କେହି ବିଦ୍ୟାଳୟକୁ ଆସିଲେ ନାହିଁ । ତେଣୁ ସେ ବାଧ୍ୟହୋଇ ଚାବି ପକାଇ ଚାଲିଯାଇଥିବା କହିଛନ୍ତି। ତେବେ ନିୟମିତ ଉକ୍ତ ବିଦ୍ୟାଳୟରେ ଅବ୍ୟବସ୍ଥା ଲାଗିରହିବା ସହ ବିଦ୍ୟାଳୟର ରୋଷେଇଶାଳରେ ଗୋରୁ ବସାବାନ୍ଧିବା ସହ ସେଠି ଗୋବର ପଡି ରୋଷେଇଶାଳ ପରିବେଶ ଦୂଷିତ ହୋଇ ରହିଛି । ଏନେଇ ଆମେ ଦାରିଙ୍ଗଓ୍ବାଡି ବିଇଓ ରସାନନ୍ଦ କରଙ୍କୁ ପଚାରିବାରୁ ଘଟଣାର ତଦନ୍ତ କରିବେ ବୋଲି ସେ କହିଛନ୍ତି।
