କର୍ଲାମୁଣ୍ଡା,୧୩।୯(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ପୌରକେଳା ନୂଆଁଖାଇ ପର୍ବ ଅବସରରେ ପୌରକେଲା ଗ୍ରାମର ମା ସୁନାମୁଖୀ ଯୁବ ସଂଗଠନ ପକ୍ଷରୁ ରବିବାର ଏକ ସ୍ୱଚ୍ଛତା ଓ ପରିମଳ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଗ୍ରାମର ପରିବେଶକୁ ସ୍ୱଚ୍ଛ, ସୁନ୍ଦର ଓ ପରିଷ୍କାର ରଖିବା ସହ ଗ୍ରାମବାସୀଙ୍କ ମଧ୍ୟରେ ସ୍ୱଚ୍ଛତା ସମ୍ପର୍କରେ ଜନସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ଆୟୋଜିତ କାର୍ଯ୍ୟକ୍ରମରେ ଯୁବ ସଂଗଠନର ସମସ୍ତ ସଦସ୍ୟ ଏକତ୍ରିତ ହୋଇ ଗ୍ରାମ ପରିଭ୍ରମଣ କରିଥିଲେ।
ଗ୍ରାମର ପରିବେଶକୁ ସ୍ୱଚ୍ଛ ଓ ପରିଷ୍କାର-ପରିଚ୍ଛନ୍ନ ରଖିବା ପାଇଁ ସେମାନେ ବିଭିନ୍ନ ଜନସଚେତନତାମୂଳକ ନାରା ଦେଇ ଗ୍ରାମବାସୀଙ୍କୁ ସଚେତନ କରିଥିଲେ । ଏଥିସହ ରାସ୍ତାକଡ଼ରେ ଆବଶ୍ୟକ ସ୍ଥାନରେ ବ୍ଲିଚିଙ୍ଗ ପାଉଡର ପକାଇ ପରିବେଶକୁ ପରିଷ୍କାର ଓ ସ୍ୱଚ୍ଛ କରିଥଲେ।
ଯୁବ ସଂଗଠନର କାର୍ଯ୍ୟକର୍ତ୍ତାମାନେ ପୌରକେଲା ପଞ୍ଚାୟତ ଛକଠାରୁ ଶିବ ମନ୍ଦିର ଓ ଜଗନ୍ନାଥ ମନ୍ଦିର ପର୍ଯ୍ୟନ୍ତ ରାସ୍ତା ସଫେଇ କରିବା ସହ ରାସ୍ତାପାର୍ଶ୍ୱରେ ଜମିଥିବା ଅଳିଆ ଆବର୍ଜନା ସଫା କରିଥିଲେ। ଏହାଦ୍ୱାରା ଗ୍ରାମର ମୁଖ୍ୟ ରାସ୍ତାଗୁଡ଼ିକ ସ୍ୱଚ୍ଛ ଓ ପରିଷ୍କାର ହୋଇଥିଲା।
ଯୁବ ସଂଗଠନର ଏଭଳି ସାମାଜିକ ଓ ଜନକଲ୍ୟାଣମୂଳକ କାର୍ଯ୍ୟକୁ ଦେଖି ପଞ୍ଚାୟତର ସରପଞ୍ଚ ଯଶୋସ୍ୱିନୀ ଧରୁଆ, ଆଶାକର୍ମୀ ସନ୍ତରା ରଣା ଏବଂ ଗ୍ରାମର ବିଶିଷ୍ଟ ଭଦ୍ରବ୍ୟକ୍ତି ବବୃବାହନ ଭୋଇ, ଟିକେମନ ଭୋଇ ଓ ବୈବସୂତ ସୁନା ସଂଗଠନର ସଦସ୍ୟମାନଙ୍କୁ ଭୂୟସୀ ପ୍ରଶଂସା କରିଥିଲେ । ଏଥିସହ ଏଭଳି ସାମାଜିକ ଓ ସ୍ୱଚ୍ଛତାମୂଳକ କାର୍ଯ୍ୟକ୍ରମ ପାଇଁ ସେମାନେ ନିଜର ସହଯୋଗର ହାତ ବଢ଼ାଇଥିଲେ ।
ଏହି ସ୍ୱଚ୍ଛତା ଅଭିଯାନରେ ଯୁବ ସଂଗଠନର ଅଧ୍ୟକ୍ଷ ଲକ୍ଷପତି ରଣା, ଉପାଧ୍ୟକ୍ଷ ଲୋକନାଥ ଦଣ୍ଡସେନା, ସଚିବ ତରୁଣସେନ ସାହୁ, ଯୁଗ୍ମ ସଚିବ ପ୍ରଭଞ୍ଜନ ଦାସ, କୋଷାଧ୍ୟକ୍ଷ ଯୁଗସନ ରଣା, ଉପକୋଷାଧ୍ୟକ୍ଷ ଜଗମୋହନ ଭୋଇ, ଗଣମାଧ୍ୟମ ସଂଯୋଜକ ସୁବ୍ରତ କୁମାର ରଣା ଓ ଜନସମ୍ପର୍କ ସଂଯୋଜକ ଭୋଳା ରଣାଙ୍କ ସମେତ କୋର କମିଟି ସଦସ୍ୟ ଧନେଶ୍ୱର ଭୋଇ, ପ୍ରଦୀପ କୁମାର ବେହେରା, ହଂଶଧ୍ୱଜ ଦଣ୍ଡସେନା, ଲୋଚନ ପାତ୍ର, ଲମ୍ବୋଦର ନାଏକ ଓ ଯୁବ ସଂଗଠନର ଅନ୍ୟାନ୍ୟ ସଦସ୍ୟମାନେ ଯୋଗଦେଇ ଶ୍ରମଦାନ କରିଥିଲେ।
ପର୍ବପର୍ବାଣୀ ସମୟରେ ନିଜ ଗ୍ରାମ ଓ ପରିବେଶକୁ ସ୍ୱଚ୍ଛ ରଖିବା ସହ ସ୍ୱଚ୍ଛତା ପ୍ରତି ସମସ୍ତେ ସଚେତନ ହେବା ଆବଶ୍ୟକ ବୋଲି ସଂଗଠନ ପକ୍ଷରୁ ଆହ୍ୱାନ ଦିଆଯାଇଛି । ଯୁବ ସଂଗଠନର ଏଭଳି ପ୍ରୟାସ ଗ୍ରାମର ସ୍ୱଚ୍ଛତା, ସାମାଜିକ ଏକତା ଓ ଜନସଚେତନତା ବୃଦ୍ଧିରେ ଏକ ଉତ୍ସାହଜନକ ପଦକ୍ଷେପ ବୋଲି ସାଧାରଣରେ ମତ ପ୍ରକାଶ ପାଇଛି ।
