ଭଞ୍ଜନଗର,୧୩।୮(ଡି.ଏନ.ଏ.): ଦେଶର ସମସ୍ତ ଗରିବ ଲୋକଙ୍କୁ ପକ୍କା ଘର, ବିଜୁଳି, ପାଣି ଆଦି ସୁବିଧା ୨୦୨୨ ଅଗଷ୍ଟ ୧୫ ସୁଦ୍ଧା ଯୋଗାଇ ଦିଆଯିବ ବୋଲି ଗତ ସାଧାରଣ ନିର୍ବାଚନ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଘୋଷଣା କରିଥିଲେ। ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୨୪ ସୁଦ୍ଧା ରାଜ୍ୟର ସମସ୍ତ ଘରକୁ ପାଇପ୍ ଯୋଗେ ପିଇବା ପାଣି ଯୋଗାଇ ଦେବାକୁ ଲକ୍ଷ୍ୟ ରଖିଛନ୍ତି। ମାତ୍ର ଗଞ୍ଜାମ ଜିଲା ବେଲଗୁଣ୍ଠା ବ୍ଲକ ଆମ୍ବପୁଆ ପଞ୍ଚାୟତ ବଜ୍ରଗଡ଼ ଗ୍ରାମକୁ ଗଲେ ବିକାଶ କେତେଦୂର ପହଞ୍ଚିଛି ତାହା ଅନୁମାନ କରାଯାଇପାରିବ। ଏଠାରେ ବିକାଶ କେବଳ ଭାଷଣରେ ଅଟକିଛି।
ବଜ୍ରଗଡ଼ରେ ପ୍ରାୟ ୫୦ ପରିବାର ବସବାସ କରୁଥିବା ବେଳେ ସେମାନେ ଏବେ ବିଶୁଦ୍ଧ ପାଣି ଟୋପାଏ ପାଇପାରୁନାହାନ୍ତି। ଗାଁରେ ଥିବା ୩ଟି ନଳକୂପ ମଧ୍ୟରୁ ୨ଟି ସମ୍ପୂର୍ଣ୍ଣ ଅଚଳ ହୋଇପଡ଼ିଛି। ଯେଉଁଟି କାର୍ଯ୍ୟକ୍ଷମ ଅଛି ସେଥିରୁ ଲୌହଗୁଣ୍ଡ ବାହାରୁଛି। ସୋଲାର ପାନୀୟ ଜଳ ପ୍ରକଳ୍ପଟି ୩ ମାସରୁ ଊର୍ଦ୍ଧ୍ୱ ହେବ ଅଚଳ ପଡ଼ିଛି। ଲୋକେ ପାଣି ପାଇଁ ଗ୍ରାମଠାରୁ ପ୍ରାୟ ୧ କି.ମି. ଦୂର ଜଣଙ୍କ ଘରକୁ ଯାଉଛନ୍ତି। ଗ୍ରାମକୁ ପକ୍କା ରାସ୍ତା ନାହିଁ । ବେଲଗୁଣ୍ଠା ସହରଠୁ ମାତ୍ର ୪ କି.ମି. ଦୂରରେ ଥିବା ଏହି ଗ୍ରାମର ବିକାଶ ପ୍ରତି ପ୍ରଶାସନ ଏବଂ ରାଜନୈତିକ ନେତାମାନେ ନଜର ଦେଉନାହାନ୍ତି । ଗ୍ରାମରେ ଏକାଧିକ ଚାଳ ଛପର ଘର ରହିଛି। ଗରିବଙ୍କୁ ପ୍ରଧାନମନ୍ତ୍ରୀ ଆବାସ କିମ୍ବା ବିଜୁ ପକ୍କା ଘର ଯୋଜନାରେ ସାମିଲ କରାଯାଉନାହିଁ। ଅଧିକାଂଶ ପରିବାର ଶ୍ରମିକ ଶ୍ରେଣୀର ହୋଇଥିବା ବେଳେ ସେମାନେ ମୂଲ ଲାଗିି ପରିବାର ଚଳାଉଛନ୍ତି। ଗ୍ରାମର ଝୁନୁ ନାଇକ, ଡମୁଣି ନାଇକ, ରାଘବ ନାଇକ, କପିଳ ନାଇକଙ୍କ ଭଳି ବହୁ ପରିବାର ପକ୍କା ଘର ଯୋଜନାରୁ ବଞ୍ଚିତ ହୋଇଛନ୍ତି । କରୋନା ବେଳେ ଗ୍ରାମରେ ଅଗ୍ନିକାଣ୍ଡ ଯୋଗୁ ଝୁନୁ ନାଇକ, କପିଳ ନାଇକ ପ୍ରମୁଖଙ୍କ ଘର ପୋଡ଼ିଯାଇଥିଲା। କିନ୍ତୁ ସେମାନଙ୍କୁ ଏବେ ସୁଦ୍ଧା ପକ୍କା ଘର ଦିଆଯାଇନାହିଁ। ଗ୍ରାମର ଜଣେ ଡ୍ରାଇଭର ରାଘବ ନାୟକ କହିଛନ୍ତି, ପକ୍କା ଘର ପାଇଁ ବହୁତ ଥର ପଞ୍ଚାୟତ ଏବଂ ବ୍ଲକ କର୍ତ୍ତୃପକ୍ଷଙ୍କୁ ଜଣାଇଛୁ, କିନ୍ତୁ ଆମ କଥା କେହି ଶୁଣିବାକୁ ନାହିଁ। ତେଣୁ ଭାଗ୍ୟକୁ ଆଦରି ଦୁଃଖ କଷ୍ଟରେ ବଞ୍ଚିଛୁ। ସେହିପରି ଗ୍ରାମର ଡମୁଣୀ ନାୟକ କହିଛନ୍ତି, ସୋଲାର ପାନୀୟ ଜଳ ପ୍ରକଳ୍ପ ବହୁଦିନ ହେବ ଅଚଳ ଥିବାରୁ ଜଣଙ୍କ ଘରୁ ଯାଇ ପାଣି ଆଣୁଛୁ। ସେ ଯେଉଁଦିନ ମନା କରିଦେବେ ସେଦିନଠୁ ସମସ୍ୟା ଆହୁରି ବଢ଼ିଯିବ। ଅନ୍ୟପକ୍ଷରେ ଗ୍ରାମ୍ୟ ପାଇପ ଜଳ ଯୋଗାଣ ପ୍ରକଳ୍ପ କନିଷ୍ଠ ଯନ୍ତ୍ରୀ ସୁଜିତ କୁମାର ପାତ୍ର କହିଛନ୍ତି, ହ୍ୟାଣ୍ଡ ଟ୍ୟୁବଲ ଅଚଳ ସମ୍ପର୍କରେ ଆମ ପାଖରେ କୌଣସି ଖବର ନାହିଁ। ଅଭିଯୋଗ ଆସିଲେ ମରାମତି କରାଯିବ । ସୋଲାର ପାନୀୟ ଜଳ ପ୍ରକଳ୍ପ ମରାମତି ଦାୟିତ୍ୱ ପଞ୍ଚାୟତର ବୋଲି କହିଛନ୍ତି। ସେହିପରି ଖୁବଶୀଘ୍ର ବଜ୍ରଗଡ଼ ଗ୍ରାମବାସୀଙ୍କ ସମସ୍ୟାର ସମାଧାନ ପାଇଁ ପଦକ୍ଷେପ ନିଆଯିବ। ପଞ୍ଚାୟତ ଫଣ୍ଡରୁ ତୁରନ୍ତ ସୋଲାର ପ୍ରକଳ୍ପ ମରାମତି କରାଯିବ ବୋଲି ବ୍ଲକ ଅଧ୍ୟକ୍ଷ ପ୍ରଶାନ୍ତ କୁମାର ନାୟକ କହିଛନ୍ତି।
