ନୂଆଦିଲ୍ଲୀ,୨୧।୭: କକ୍ରୋଚ ଜନତା ପାର୍ଟିର ମୁଖପାତ୍ର ସୌରଭ ଦାସ ଏବଂ ଆଶୁତୋଷ ରାଙ୍କା ସୋମବାର କେନ୍ଦ୍ରମନ୍ତ୍ରୀ ଜେ.ପି. ନଡ୍ଡାଙ୍କ ସମ୍ମୁଖରେ ନିଜର ଦାବିଗୁଡ଼ିକ ରଖିଛନ୍ତି। ବିଳମ୍ବିତ ସନ୍ଧ୍ୟା ପର୍ଯ୍ୟନ୍ତ ସରକାରଙ୍କ ପକ୍ଷରୁ ଏହି ବୈଠକକୁ ନେଇ କୌଣସି ନିଷ୍କର୍ଷ ସାମ୍ନାକୁ ଆସି ନଥିଲା। ବର୍ତ୍ତମାନ ସିଜେପି ମୁଖପାତ୍ର ଆଶୁତୋଷ ରାଙ୍କା ଜେପି ନଡ୍ଡାଙ୍କ ସହ ହୋଇଥିବା ବୈଠକକୁ ‘ବର୍ତ୍ତମାନ ପାଇଁ ବେକାର (useless) ବୋଲି ବର୍ଣ୍ଣନା କରିଛନ୍ତି। ଏଥିସହ ସେ ଘୋଷଣା କରିଛନ୍ତି ଯେ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ନ ଦେବା ପର୍ଯ୍ୟନ୍ତ କକ୍ରୋଚ ଜନତା ପାର୍ଟିର ପ୍ରଦର୍ଶନ ଜାରି ରହିବ।
କକ୍ରୋଚ ଜନତା ପାର୍ଟିର ମୁଖପାତ୍ର ଆଶୁତୋଷ ରାଙ୍କା ଗଣମାଧ୍ୟମ ସହ କଥାବାର୍ତ୍ତା କରି କହିଛନ୍ତି, ‘ସୋନମ ୱାଙ୍ଗଚୁକ ଜୀଙ୍କ ଭୋକ ହରତାଳ (ଅନଶନ) ଜାରି ରହିଛି ଏବଂ ଜନ୍ତର ମନ୍ତରରେ ଆମର ପ୍ରଦର୍ଶନ ମଧ୍ୟ ଜାରି ଅଛି। ଜେପି ନଡ୍ଡା ଜୀଙ୍କ ସହିତ ଯେଉଁ ଆମର ବୈଠକ ହୋଇଥିଲା ତାହା ବେକାର ଥିଲା, ଆମର ଚାରି ଘଣ୍ଟା ନଷ୍ଟ ହେଲା। ବର୍ତ୍ତମାନ ସରକାରଙ୍କୁ ଏଠାକୁ ଆସି କଥାବାର୍ତ୍ତା କରିବାକୁ ପଡ଼ିବ। ଧର୍ମେନ୍ଦ୍ର ପ୍ରଧାନଙ୍କର ଯେପର୍ଯ୍ୟନ୍ତ ଇସ୍ତଫା ହୋଇନାହିଁ, ଆମର ପ୍ରଦର୍ଶନ ଜାରି ରହିବ।’
ଏହାପୂର୍ବରୁ ସୋମବାର ଜେ.ପି. ନଡ୍ଡାଙ୍କୁ ଭେଟିବା ପରେ ରାଙ୍କା ‘ଏକ୍ସ’ (X) ରେ ଏକ ପୋଷ୍ଟ କରି କହିଥିଲେ,‘ନଡ୍ଡା ଆମର ଏହି ଦାବିଗୁଡ଼ିକ ଉପରେ ଦଳର ନେତୃତ୍ୱ ସହ ଆଲୋଚନା କରିବା ପାଇଁ କିଛି ସମୟ ମାଗିଛନ୍ତି। ଆମର ଦାବିଗୁଡ଼ିକରେ ସୋନମ ୱାଙ୍ଗଚୁଙ୍କର ତୁରନ୍ତ ମୁକ୍ତି, ଧର୍ମେନ୍ଦ୍ର ପ୍ରଧାନଙ୍କ ଇସ୍ତଫା ଏବଂ ଆତ୍ମହତ୍ୟା କରିଥିବା ସମସ୍ତ ନିଟ (NEET) ପ୍ରାର୍ଥୀଙ୍କ ପରିବାରକୁ ୧ କୋଟି ଟଙ୍କାର କ୍ଷତିପୂରଣ ସାମିଲ ଅଛି।’
