ନୂଆଦିଲ୍ଲୀ,୧୪।୮: ଭାରତର ପ୍ରଧାନ ବିଚାରପତି (CJI) ସୂର୍ଯ୍ୟକାନ୍ତଙ୍କୁ NALSAR ୟୁନିଭର୍ସିଟି ଅଫ ଲ’ର ଦୀକ୍ଷାନ୍ତ ସମାରୋହକୁ ଆମନ୍ତ୍ରଣ କରିବାକୁ ବିରୋଧ କରିବା ଘଟଣା ନୂଆ ମୋଡ଼ ନେଇଛି। ବିରୋଧ କରିଥିବା ଛାତ୍ରମାନଙ୍କ ବିରୋଧରେ ତଦନ୍ତ କରିବା ଏବଂ ସେମାନଙ୍କୁ ଓକିଲ ଭାବେ ନାମାଙ୍କନ ନକରିବା ପାଇଁ ବାର୍ କାଉନସିଲ ଅଫ ଇଣ୍ଡିଆ (BCI) ଦେଇଥିବା ନିର୍ଦ୍ଦେଶକୁ ଏବେ ପ୍ରତ୍ୟାହାର କରିନେଇଛି। କକ୍ରୋଚ ଜନତା ପାର୍ଟି (CJP)ର ବିରୋଧ ପରେ BCI ଏହି ନିଷ୍ପତ୍ତି ନେଇଛି। ଏହା ସହିତ CJP ଏବେ BCI ଅଧ୍ୟକ୍ଷ ତଥା ଭାଜପାର ରାଜ୍ୟ ସଭା ସାଂସଦ ମନନ କୁମାର ମିଶ୍ରାଙ୍କ ଇସ୍ତଫା ଦାବି କରିବାର ମଧ୍ୟ ସଙ୍କେତ ଦେଇଛି।
ଅନ୍ୟପକ୍ଷରେ, ମନନ ମିଶ୍ରା ଏକ୍ସରେ ନିଷ୍ପତ୍ତି ପ୍ରତ୍ୟାହାର କରାଯାଇଥିବା ନେଇ ସୂଚନା ଦେବା ପରେ CJP ପ୍ରବକ୍ତା ସୌରଭ ଦାସ ପ୍ରତିକ୍ରିୟା ଦେଇ ଲେଖିଛନ୍ତି, ହୋଇଗଲା, ଭାଇ। ଯୁବପିଢ଼ିର ଆଉ ଏକ ବଡ଼ ବିଜୟ! କିନ୍ତୁ ଜବାବ ଦେବାର ପାଇଁ ଲଢ଼େଇ ଜାରି ରହିବ।
CJPର ପ୍ରତିଷ୍ଠାତା ଅଭିଜିତ ଦୀପକେ ଏକ୍ସରେ ଲେଖିଛନ୍ତି, କ’ଣ ମନନ କୁମାର ମିଶ୍ରାଙ୍କ ଇସ୍ତଫା ଦାବି କରିବାର ସମୟ ଆସିଗଲା ।
ସେହିପରି CJP ପ୍ରବକ୍ତା ସୌରଭ ଦାସ ମଧ୍ୟ ଏକ୍ସରେ ଲେଖିଛନ୍ତି, ମନନ କୁମାର ମିଶ୍ରାଙ୍କ ବିଷୟରେ ଯେଉଁଭଳି ଭୟଙ୍କର କଥା ସାମ୍ନାକୁ ଆସୁଛି, ତା’ପରେ ତାଙ୍କୁ ତୁରନ୍ତ ଇସ୍ତଫା ଦେଇଦେବା ଉଚିତ୍। ଏକ ସୁସ୍ଥ ଗଣତନ୍ତ୍ରରେ ଏହା ହିଁ ହୋଇଥାଏ। ଏକ ସୁସ୍ଥ ଗଣତନ୍ତ୍ର ଗଢ଼ିବା ପାଇଁ କକ୍ରୋଚମାାନେ ଆସିଯାଇଛନ୍ତି। ମିଷ୍ଟର ମିଶ୍ରା, ଏବେ ସମୟ ସରିଗଲା!
CJPର ବିରୋଧ ପରେ ବାର୍ କାଉନସିଲ ଏବେ ନିଷ୍ପତ୍ତି ନେଇଛି ଯେ, ରାଜ୍ୟ ବାର୍ କାଉନସିଲ ସମସ୍ତ ଛାତ୍ରଙ୍କୁ ଓକିଲ ଭାବେ ନାମାଙ୍କନ କରିପାରିବ। ଏହି ମାମଲାରେ ବିଶ୍ୱବିଦ୍ୟାଳୟର ତଦନ୍ତ ରିପୋର୍ଟ ଆସିବା ପରେ ପରବର୍ତ୍ତୀ ପଦକ୍ଷେପ ନେଇ ନିଷ୍ପତ୍ତି ହେବ।
କାଉନସିଲ ନିଜର ପରିବର୍ତ୍ତିତ ଆଦେଶରେ କହିଛି ଯେ, ଏହି ଘଟଣାରେ ଅଧିକାଂଶ ଛାତ୍ର ନିର୍ଦ୍ଦୋଷ। ତେବେ କାଉନସିଲ ଏହା ମଧ୍ୟ କହିଛି ଯେ, କିଛି ଶିକ୍ଷକ ଏବଂ ବାହାର ଲୋକ ବିଶ୍ୱବିଦ୍ୟାଳୟରେ CJI ସୂର୍ଯ୍ୟକାନ୍ତଙ୍କୁ ଆମନ୍ତ୍ରଣ କରାଯିବାକୁ ନେଇ ହୋଇଥିବା ବିରୋଧ ପ୍ରଦର୍ଶନକୁ ଉସୁକାଇଥିଲେ।
