କେସିଙ୍ଗା,୨୭।୭(ତୁମେଶ୍ୱର ସାହୁ): କଳାହାଣ୍ଡି ଜିଲାର କେସିଙ୍ଗା ଓ ବଲାଙ୍ଗୀର ଜିଲାର ଟିଟଲାଗଡ଼କୁ ସଂଯୋଗ କରୁଥିବା ମୁଖ୍ୟ ରାସ୍ତାର ତ୍ରିମୂର୍ତ୍ତି ଛକରୁ ତେଲନଦୀ ବ୍ରିଜ ପ୍ରାୟ ୮୦୦ମିଟର ରାସ୍ତାରେ ଶହ ଶହ ଖାଲ ଢିପ ହୋଇଥିବାରୁ ବର୍ଷା ଦିନରେ ଲୋକମାନେ ଯାତାୟାତ ସମସ୍ୟାର ସମ୍ମୁଖୀନ ହେଉଛନ୍ତି। କେସିଙ୍ଗା ବ୍ଲକର ସୀମାନ୍ତ ଅଞ୍ଚଳରେ ତେଲ ନଦୀ ବ୍ରିଜ ସଂଯୋଗ ହୋଇଥିବାରୁ ସୀମାନ୍ତ ଅଞ୍ଚଳରେ ଥିବା,ଲୁଥୁର ବନ୍ଧ, ମହଦା, ଆଦି ଗ୍ରାମର ଚାଷୀମାନେ ସକାଳୁ କେସିଙ୍ଗା ସହରକୁ ପନିପରିବା ନେଇ ବିକ୍ରୟ କରିବାକୁ ନେଇ ଥାଆନ୍ତି। ଲୁଥୁର ବନ୍ଧ, ମହଦା,ଓ ଟିଟିଲାଗଡରୁ ଦିନ ରାତ୍ରି ଯାନବାହନ ଏହି ରାସ୍ତା ଦେଇ ଯିବା ଆସିବା କରୁଛନ୍ତି। ରାତିରେ ଦୁଇ ଚକିଆରେ ଯିବା ଆସିବା ବେଳେ ଲୋକମାନେ ପଡି ଦୁର୍ଘଟଣାଗ୍ରସ୍ତ ହେଉଛନ୍ତି। ଏହି ରାସ୍ତା ଦେଇ ଦୈନିକ ଶହ ଶହ ହାଇୱା,ଦଶଚକିଆ ଓ ବାରଚକିଆ ଯାନବାହାନଗୁଡ଼ିକ ଅବିରତ ଭାବେ ଚାଲିବା ଫଳରେ ଅଳ୍ପ କେଇଦିନ ମଧ୍ୟରେ ରାସ୍ତାର ପିଚୁ ଉଠି ଯାଇ ଖାଲ ଢିପ ହୋଇଛି। ପୋଲ ଉପରେ ଏବଂ ଏହାର ଆଖପାଖ ରାସ୍ତାରେ ସୃଷ୍ଟି ହୋଇଥିବା ବଡ଼ ବଡ଼ ଖାଲ ଗୁଡ଼ିକ ମରାମତି କରାଯାଉନାହିଁ। ଟିଟିଲାଗଡ ଓ କେସିଙ୍ଗା ବ୍ଲକର ପିଡବ୍ଲୁ ଡ଼ିର ବିଭାଗୀୟ ଏସଡିଓ ଯାତ୍ରୀଙ୍କ ଅବହେଳାରୁ ଏହିପରି ରାସ୍ତା ଶୋଚନୀୟ ହେବାକୁ ବସିଲାଣି। ବ୍ରିଜ ପୋଲ ଉପରୁ କଂକ୍ରିଟ ଓ ପିଚୁ ଛାଡ଼ିଯାଇ ରାସ୍ତା ମଝିରେ ଗଭୀର ଗାତ ସୃଷ୍ଟି ହୋଇଛି ।ରାସ୍ତାରେ ଥିବା ଲୁହା ଜାଲି ଓ ରଡ଼ଗୁଡ଼ିକ ବାହାରକୁ ବାହାରି ପଡ଼ିଛି। ଏହି ଲୁହା ରଡଗୁଡ଼ିକ ବିଶେଷ କରି ରାତି ଅନ୍ଧାରରେ ଦୁଇଚକିଆ ଓ ଚାରିଚକିଆ ଗାଡ଼ି ଚାଳକଙ୍କ ବିପଦ ରହିଛି।ରାସ୍ତାରେ ସୁରକ୍ଷା ଚେତାବନୀ ବୋର୍ଡ ଲଗାଇବା କଥା, କିନ୍ତୁ ରାସ୍ତାରେ ଦୁର୍ଘଟଣାରୁ ବଞ୍ଚିବା ପାଇଁ ସ୍ଥାନୀୟ ଲୋକେ ନିଜ ଉଦ୍ୟମରେ ଗୋଟିଏ ଗାତ ମଝିରେ ବାଉଁଶ ପୋତି ସବୁଜ କପଡ଼ା ବାନ୍ଧି ବିପଦର ସଙ୍କେତ ଦେବାକୁ ବାଧ୍ୟ ହୋଇଛନ୍ତି। ଅନ୍ୟପଟେ ପୋଲକୁ ଯାଉଥିବା ସମ୍ପୂର୍ଣ୍ଣ ରାସ୍ତାରେ କାଦୁଅ ସହ ବଡ଼ ବଡ଼ ଗାତରେ ବର୍ଷା ପାଣି ଜମି ରହି କୃତ୍ରିମ ପୋଖରୀର ସୃଷ୍ଟି କରୁଛି। ଟିଟିଲାଗଡ ଓ ଭବାନୀପାଟଣାରେ ଥିବା ପିଡବ୍ଲୁଡି ବିଭାଗର ତୁରନ୍ତ ଏହି ବିପଜ୍ଜନକ ଲୁହା ରଡଗୁଡ଼ିକୁ ହଟାଇ, ପୋଲର କଂକ୍ରିଟ ସହ ଆଖପାଖ ରାସ୍ତାର ସ୍ଥାୟୀ ମରାମତି ନକଲେ ଆଗାମୀ ଦିନରେ ସହରବାସୀ ଓ ଜନସାଧାରଣ ବ୍ୟାପକ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି।ଏ ସଂକ୍ରାନ୍ତରେ ଭବାନୀପାଟଣା ପିଡବ୍ଲୁଡି ବିଭାଗର ଏସଡ଼ିଓ ବିଷ୍ଣୁପ୍ରସାଦ କରଙ୍କୁ ପଚାରିବାରୁ ଦୁଇ ଜିଲାର ଜିଲାପାଳ ଓ ବିଭାଗୀୟ ଅଧିକାରୀଙ୍କ ସହ ଆଲୋଚନା କଲା ପରେ ମରାମତି କରାଯିବ ବୋଲି ପ୍ରକାଶ କରିଥିଲେ।
