ଡେରାଡୁନ,୨୪।୧୦ : ଭାରତ ସହିତ ନେପାଳର ନାଗରିକତ୍ୱ ପ୍ରମାଣ ପତ୍ର ଥିବା ଲୋକଙ୍କୁ ନେଇ କେନ୍ଦ୍ର ସରକାର ଚିନ୍ତାରେ ପଡ଼ିଛନ୍ତି। ଅନ୍ତର୍ଜାତୀୟ ସୀମାରେ ରହୁଥିବା ଉତ୍ତରାଖଣ୍ଡର ପିଥୋରାଗଡ ଏବଂ ଚମ୍ପୱାତ ଜିଲାର ବହୁ ଲୋକଙ୍କର ନେପାଳ ଏବଂ ଭାରତର ଦ୍ୱୈତ ନାଗରିକତା ରହିଛି ଏବଂ ଏହିପରି ଲୋକଙ୍କୁ ଚିହ୍ନଟ କରାଯାଉଛି। ସଶସ୍ତ୍ର ସୀମା ବଳ (ଏସଏସବି)ର ଆଲମୋରା ଅଞ୍ଚଳର ଡେପୁଟି ଇନ୍ସପେକ୍ଟର ଡି ଏନ ବୋମ୍ବେ କହିଛନ୍ତି ଆମେ ପିଥୋରାଗଡ ଜିଲାର ଜୁଲାଘାଟ ଏବଂ ଚମ୍ପାୱାତ ଜିଲାର କିଛି ଅଞ୍ଚଳରେ ଭାରତ-ନେପାଳ ସୀମାରେ ଏପରି ମାମଲା ପାଇଛୁ। ଏ ସମ୍ପର୍କରେ ସମ୍ପୃକ୍ତ ଜିଲା ପ୍ରଶାସନକୁ ସୂଚନା ଦିଆଯାଇଛି।
ଏସଏସବି ଅଧିକାରୀ କହିଛନ୍ତି ଉତ୍ତରାଖଣ୍ଡରେ ଉପସ୍ଥିତ ଥିବା ଫୋର୍ସର ସମସ୍ତ ୫୪ ସୀମା ଆଉଟପୋଷ୍ଟରେ ନିୟୋଜିତ ଫୋର୍ସ କର୍ମଚାରୀମାନେ ଭାରତ ଏବଂ ନେପାଳର ଦ୍ୱୈତ ନାଗରିକତା ଥିବା ଭାରତୀୟ ଅଞ୍ଚଳରେ ରହୁଥିବା ଏପରି ବ୍ୟକ୍ତିଙ୍କୁ ଚିହ୍ନଟ କରୁଛନ୍ତି। ସେ କହିଛନ୍ତି ଏସଏସବି ମଧ୍ୟ ଏହି କାର୍ଯ୍ୟରେ ସମ୍ପୃକ୍ତ ଜିଲା ପ୍ରଶାସନର ସହାୟତା ନେଉଛି।
ପିଥୋରାଗଡ ଡେପୁଟି ଜିଲା ମାଜିଷ୍ଟ୍ରେଟ ଅନିଲ କୁମାର ଶୁକ୍ଲା କହିଛନ୍ତି ଭାରତରେ ଦୁଇ ପ୍ରକାର ନେପାଳୀ ଲୋକ ବାସ କରୁଛନ୍ତି। ସେ କହିଛନ୍ତି ପ୍ରଥମ ଶ୍ରେଣୀରେ ସେହି ଝିଅମାନେ ଅଛନ୍ତି ଯେଉଁମାନେ ବିବାହ ପରେ ଭାରତ ଆସିଥିଲେ, କିନ୍ତୁ ସେମାନଙ୍କର ନେପାଳର ନାଗରିକତ୍ୱ ଛାଡି ନାହାଁନ୍ତି କିମ୍ବା ଭାରତୀୟ ନାଗରିକତା ହାସଲ କରିନାହାଁନ୍ତି।
ଶୁକ୍ଲା କହିଛନ୍ତି ଦ୍ୱିତୀୟ ଶ୍ରେଣୀରେ ସେହି ବ୍ୟକ୍ତି ଅନ୍ତର୍ଭୁକ୍ତ, ଯାହାର ସମସ୍ତ ପରିବାର ଭାରତୀୟ ନାଗରିକତ୍ୱ ନ ନେଇ ନେପାଳରୁ ଭାରତୀୟ ଅଞ୍ଚଳରେ ବସବାସ କରିଥିଲେ। ସବ-କଲେକ୍ଟର କହିଛନ୍ତି, ଆମେ ଅନେକ ମାମଲା ପାଇଲୁ ଯେଉଁଥିରେ ନେପାଳୀ ଠକେଇ କରି ଭାରତରେ ଆଧାର କାର୍ଡ ଏବଂ ଭୋଟର ପରିଚୟ ପତ୍ର ପାଇଥିଲେ। ଆମେ ତାଙ୍କ ନକଲି ଦଲିଲକୁ ତୁରନ୍ତ ବାତିଲ କରିଛୁ।
ଏସଏସବିର ଡେପୁଟି ଇନ୍ସପେକ୍ଟର ଜେନେରାଲ କହିଛନ୍ତି ବନ୍ୟପ୍ରାଣୀଙ୍କ ଅଂଶ ତଥା ଡ୍ରଗ୍ସ ଚୋରା ଚାଲାଣ ବ୍ୟତୀତ ଆମେ ମାନବ ଚାଲାଣକୁ ରୋକିବାକୁ ମଧ୍ୟ ଅଗ୍ରାଧିକାର ଦେଉଛୁ ଯେଉଁଥି ପାଇଁ ଆମେ ଏକ ଦ୍ୱତନ୍ତ୍ର ଦଳ ଗଠନ କରିଛୁ।
ଭାରତ-ନେପାଳ ସୀମା ୧୭୪୦ କିଲୋମିଟର ଲମ୍ବ। ସେଥିମଧ୍ୟରୁ ୨୫୪ କିଲୋମିଟର ଲମ୍ବା ସୀମା ଉତ୍ତରାଖଣ୍ଡରେ ଅଛି ।
ସେ କହିଛନ୍ତି ସେମାନଙ୍କ କର୍ମଚାରୀମାନେ ସୀମାନ୍ତ ଅଞ୍ଚଳରେ ରହୁଥିବା ଗ୍ରାମବାସୀଙ୍କ ସହ ଘନିଷ୍ଠ ସମ୍ପର୍କ ରଖୁଛନ୍ତି ଯାହା ଦ୍ୱାରା ସେମାନେ ସେଠାରେ କୌଣସି ବାହାର ଲୋକଙ୍କର ଆଗମନ ବିଷୟରେ ଜାଣିପାରିବେ।
