କେପ୍ ଟାଉନ,୧୧।୧: ଦକ୍ଷିଣ ଆଫ୍ରିକୀୟ ଅଲରାଉଣ୍ଡର କ୍ରିସ ମୋରିସ ମଙ୍ଗଳବାର କ୍ରିକେଟର ସମସ୍ତ ଫର୍ମାଟରୁ ସନ୍ନ୍ୟାସ ଘୋଷଣା କରିଛନ୍ତି। ଏହି ନିଷ୍ପତ୍ତି ସମ୍ପର୍କରେ ସୋସିଆଲ ମିଡିଆରେ ଏକ ପୋଷ୍ଟ ଜରିଆରେ ଜଣାଇ ଦେଇଛନ୍ତି ୩୪ ବର୍ଷୀୟ କ୍ରିକେଟର। ଏଥି ସହ ଘରୋଇ ଦଳ ଟାଇଟନ୍ସର କୋଚ ପଦବୀ ଗ୍ରହଣ କରିଥିବା ସେ ସୂଚନା ଦେଇଛନ୍ତି।
“ମୋ ଅଭିଯାନର ଅଂଶ ଥିବା ପ୍ରତ୍ୟେକଙ୍କୁ ଧନ୍ୟବାଦ। ଏହା ଖୁବ୍ ମଜାଦାର ଯାତ୍ରା ଥିଲା” ବୋଲି ଇନଷ୍ଟାଗ୍ରାମରେ ପୋଷ୍ଟରେ ଲେଖିଛନ୍ତି।
୩ ଫର୍ମାଟକୁ ମିଶାଇ ମୋରିସ ଅନ୍ତର୍ଜାତୀୟ ସ୍ତରରେ ୬୯ ମ୍ୟାଚ୍ ଖେଳି ହାତେଇଥିଲେ ୯୪ ଉଇକେଟ। ନିମ୍ନକ୍ରମରେ ଏକ ଧୂଆଁଦାର ବ୍ୟାଟର ଭାବେ ଜଣାଶୁଣା ଅଲରାଉଣ୍ଡରଙ୍କୁ ଅନ୍ତର୍ଜାତୀୟ ସ୍ତରରେ ସେଭଳି ସଫଳତା ମିଳି ନ ଥିଲା। କିନ୍ତୁ ୨୦୧୩ରୁ ତାଙ୍କୁ ଆଇପିଏଲରେ ବେଶ ଗୁରୁତ୍ୱ ଦେବା ଆରମ୍ଭ କରିଥିଲେ ବିଭିନ୍ନ ଫ୍ରାଞ୍ଚାଇଜ। ସେ ଚେନ୍ନାଇ ସୁପର କିଙ୍ଗ୍ସ, ଦିଲ୍ଲୀ ଡେଆରଡେଭିଲ୍ସ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଭଳି ଫ୍ରାଞ୍ଚାଇଜ ପାଇଁ ଖେଳିଥିଲେ। ଗତ ବର୍ଷ ଆଇପିଏଲ ଅକ୍ଶନରେ ତାଙ୍କୁ ୧୬.୨୫ କୋଟି ଟଙ୍କାରେ କିଣିଥିଲା ରାଜସ୍ଥାନ ରୟାଲ୍ସ।
