ନୂଆଦିଲ୍ଲୀ,୧୧।୧୧: ସୀମାରେ ଜିଦଖୋର ତଥା ଆକ୍ରମଣାତ୍ମକ ଆଭିମୁଖ୍ୟ ଗ୍ରହଣ କରୁଥିବା ଚାଇନାକୁ ଭାରତନିଜ ଭାଷାରେ ଜବାବ ଦେଇଛି। ଏହା ଦ୍ୱାରା ଚାଇନାକୁ ବଡ଼ ଝଟ୍କା କିନ୍ତୁ ନୀରବ ଭାବେ ଲାଗିବ। ଭାରତ ୧୫୨ ଦେଶ ପାଇଁ ଇ-ଭିଜା ସୁବିଧା ପୁଣି ଆରମ୍ଭ କରୁଛିମ୍। କିନ୍ତୁ ଏଥର ଚାଇନା, ହଂକଂ ଏବଂ ମାକାଉ ଏହି ଦେଶ ତାଲିକାରୁ ବାଦ ଦିଆଯାଇଛି। ଏଥି ସହିତ ତାଇୱାନ, ଭିଏତନାମ, ସିଙ୍ଗାପୁର ଏବଂ ଆମେରିକା ସମେତ ୧୫୨ ଦେଶର ନାଗରିକମାନେ ଭାରତରେ ଇ-ଭିଜା ସୁବିଧା ପାଇପାରିବେ।
ବାଇନା ସହିତ ଭାରତ ପାରସ୍ପରିକ ସହଯୋଗ ଅଭାବରୁ କାନାଡା, ବ୍ରିଟେନ, ଇରାନ, ମାଲେସିଆ, ଇଣ୍ଡୋନେସିଆ ଏବଂ ସୌଦି ଆରବକୁ ତାଲିକାରୁ ବାଦ ଦେଇଛି। ପୂର୍ବରୁ ଚାଇନା ସମେତ ୧୭୧ ଟି ଦେଶ ପାଇଁ ଇ-ଭିଜା ସୁବିଧା ଉପଲବ୍ଧ ଥିଲା। ପୂର୍ବ ଲଦାଖରେ ଚାଇନା ସହିତ ଚାଲିଥିବା ତିକ୍ତତା, ଅରୁଣାଚଳ ପ୍ରଦେଶ ଏବଂ ଉତ୍ତରପ୍ରଦେଶରେ ଚାଇନା ସୈନ୍ୟଙ୍କ ଅନୁପ୍ରବେଶ ଯୋଗୁ ଇ-ଭିସା ସୁବିଧାରୁ ଦୂରେଇ ରଖିବା ପାଇଁ ନିଷ୍ପତ୍ତି ନିଆଯାଇଛି ବୋଲି ଚର୍ଚ୍ଚା ହେଉଛି।
ପୂର୍ବରୁ ଭାରତ ଚାଇନା ପର୍ଯ୍ୟଟକଙ୍କ ପାଇଁ ପ୍ରି-ରେଫରାଲ କ୍ୟାଟାଗୋରୀ (ପିଆର୍ସି) ଅନୂସାରେ ଇ-ଭିଜା ଉପଲବ୍ଧ କରାଇଥିଲା। ଚାଇନା ସହିତ ଆଫଗାନିସ୍ତାନ, ପାକିସ୍ଥାନ, ଇରାକ, ସୁଦାନ ବ୍ୟତୀତ ପାକିସ୍ତାନୀ ମୂଳରୁ ଆସିଥିବା ବିଦେଶୀ ତଥା ଅନ୍ୟ ଦେଶରୁ ଜାତୀୟତା ନ ଥିବା ଲୋକଙ୍କୁ ପିଆର୍ସିରେ ଅନ୍ତର୍ଭୁକ୍ତ କରାଯାଇଥିଲା। ତେବେ, କରୋନା ମହାମାରୀ ଯୋଗୁ ମାର୍ଚ୍ଚ ୨୦୨୦ ରେ ଯାତ୍ରା ପ୍ରତିବନ୍ଧକ ଘୋଷଣା ହେବା ପରେ ସମସ୍ତ ପ୍ରକାର ଇ-ଭିଜା ଉପରେ ପ୍ରତିବନ୍ଧକ ଲଗାଯାଇଥିଲା।
ଏହା ପରେ, ଅଗଷ୍ଟ ୨୦୨୦ ରେ, ସରକାର ଅନ୍ତର୍ଜାତୀୟ ଭ୍ରମଣ ନିୟମକୁ କୋହଳ କରି ଆମେରିକା, ବ୍ରିଟେନ, ଜର୍ମାନୀ ଏବଂ ଫ୍ରାନ୍ସର ବିଦେଶୀ ନାଗରିକମାନଙ୍କୁ ଏୟାର ବବଲ ଯୋଜନା ଅଧୀନରେ ଭାରତ ଆସିବାକୁ ଅନୁମତି ଦେଇଥିଲେ। ଏହାର ଦୁଇମାସ ପରେ ଇଲେକ୍ଟ୍ରୋନିକ, ପର୍ଯ୍ୟଟକ ଏବଂ ଡାକ୍ତରୀ ବର୍ଗ ବ୍ୟତୀତ ସମସ୍ତ ବର୍ଗ ପାଇଁ ଭିଜା କୋହଳ କରାଯାଇଥିଲା।
ସ୍ବରାଷ୍ଟ୍ର ମନ୍ତ୍ରଣାଳୟ ଦ୍ୱାରା ଜାରି କରାଯାଇଥିବା ନିର୍ଦ୍ଦେଶାବଳୀ ଅନୁଯାୟୀ ଅକ୍ଟୋବର ୬ ପୂର୍ବରୁ ଜାରି ହୋଇଥିବା ଇ-ଭିଜା ଏବଂ ସାଧାରଣ ପର୍ଯ୍ୟଟନ ଭିଜା ସ୍ଥଗିତ ରହିବ। ଏଥି ସହିତ, ଏକକ ପ୍ରବେଶ ପାଇଁ ବ୍ୟବହୃତ ନୂତନ ଭିଜା ଜାରି ହେବାର ୧୨୦ ଦିନ ମଧ୍ୟରେ ପ୍ରଦାନ କରାଯିବ।
