ଇସଲାମାବାଦ/ବେଜିଂ, ୯।୮ : ଚାଇନା ପକ୍ଷରୁ ପାକିସ୍ତାନରେ ସିପିଇସି ପ୍ରୋଜେକ୍ଟ ଜାରି ରହିଛି। ଏହାକୁ ବିଭିନ୍ନ ସମୟରେ ଭାରତ ପକ୍ଷରୁ ବିରୋଧ କରାଯାଉଛି। ଏହାର ଆଢୁଆଳରେ ଚାଇନା ଏବେ ଷଡ଼ଯନ୍ତ୍ର ରଚିଛି। ସିପିଇସି ନାମରେ ଚାଇନା ପାକିସ୍ତାନ ପାଇଁ ଅଣ୍ଡର ଗ୍ରାଉଣ୍ଡ ବଙ୍କର ନିର୍ମାଣ କରୁଥିବା ପ୍ରକାଶିତ ଏକ ରିପୋର୍ଟରେ ଉଲ୍ଲେଖ କରାଯାଇଛି।
ରିପୋର୍ଟ ଅନୁଯାୟୀ ୧୦ରୁ ୧୨ ଜଣ ଚାଇନା ସୈନ୍ୟଙ୍କୁ ପାକ୍ ଅଧିକୃତ କଶ୍ମୀର ଶାରଦାଠାରେ ଦେଖିବାକୁ ମିଳିଛି। ସେହିପରି ନୀଲମ୍ ଘାଟିର କେଲ ନିକଟରେ କେତେକ ଚାଇନା ଇଞ୍ଜିନିୟରଙ୍କୁ କାର୍ଯ୍ୟ କରୁଥିବାର ଦେଖାଯାଇଛି। ସେମାନେ ବଙ୍କର ନିର୍ମାଣ କାର୍ଯ୍ୟ ଶୀଘ୍ର ଭାବେ କରୁଛନ୍ତି।
ଏହି ଅଞ୍ଚଳ କେଲର ଦକ୍ଷିଣ ପୂର୍ବର ୧୨ କିଲୋମିଟର ଦୂରରେ ଅବସ୍ଥିତ। ଏଠାରୁ ଆତଙ୍କବାଦୀମାନେ ଭାରତରେ ଅନୁପ୍ରବେଶ କରିଥାନ୍ତି। ଅପରପକ୍ଷରେ ଚାଇନା ସୈନ୍ୟଙ୍କୁ ସିନ୍ଧ ଏବଂ ବାଲୁଚିସ୍ତାନରେ ମଧ୍ୟ ଦେଖିବାକୁ ମିଳିଛି। ବାଲୁଚିସ୍ତାନରେ ପାକିସ୍ତାନର କ୍ଷେପଣାସ୍ତ୍ର ରେଜିମେଣ୍ଟ ଅଞ୍ଚଳରେ ବଙ୍କର ନିର୍ମାଣ କାର୍ଯ୍ୟ ଚାଇନା ଦ୍ୱାରା ଜୋରସୋରରେ ଜାରି ରହିଥିବା ରିପୋର୍ଟରେ ପ୍ରକାଶ ପାଇଛି।
ତେବେ ଚାଇନା ସୈନ୍ୟ ପାକିସ୍ତାନ ପାଇଁ କାହିଁକି ଏସବୁ ବଙ୍କର ନିର୍ମାଣ କରୁଛି ତାହା ନିଶ୍ଚିତ ହୋଇ ପାରି ନାହିଁ। ଏନେଇ ଅଧିକ ଅନୁସନ୍ଧାନ ଜାରି ରହିଥିବା ରିପୋର୍ଟ ଦର୍ଶାଯାଇଛି।
