ବେଜିଂ,୨।୧୦: ବାୟୁସେନା ଦିବସ ପାଳନ ଅବସରରେ ଚାଇନା ତାଇଓ୍ବାନ ଉପରେ ଦାଦାଗିରି ଦେଖାଇଛି। ଚାଇନାର ୩୮ଟି ଯୁଦ୍ଧ ବିମାନ ତାଇଓ୍ବାନ ସୀମାରେ ଉଡ଼ାଣ କରିଛି। ତାଇଓ୍ବାନର ପ୍ରତାସ ଦ୍ୱୀପସମୁହର ଆକାଶ ମାର୍ଗରେ ଦୁଇଟି ପର୍ଯ୍ୟାୟରେ ଚାଇନା ବାୟୁସେନା ପକ୍ଷରୁ ଏଭଳି କରାଯାଇଛି। ଏହାର ଜବାବରେ ତାଇଓ୍ବାନ ମଧ୍ୟ ନିଜର ଶକ୍ତି ପ୍ରଦର୍ଶନ କରି ବାୟୁସେନାର ଯୁଦ୍ଧ ବିମାନ ଉଡ଼ାଇଛି। ଫଳରେ ଚାଇନା ଯୋଗୁ ଏବେ ପୁଣି ଦୁଇଦେଶ ମଧ୍ୟରେ ଉତ୍ତେଜନା ବଢ଼ିବାରେ ଲାଗିଛି।
ଗତ ଦେଢ଼ ବର୍ଷ ଧରି ଚାଇନା ବାୟୁସେନା ପକ୍ଷରୁ ତାଇଓ୍ବାନ ଆକାଶ ମାର୍ଗରେ ଅନୁପ୍ରବେଶ ଜାରି ରହିଛି। ତାଇଓ୍ବାନ ପ୍ରତିରକ୍ଷା ମନ୍ତ୍ରଣାଳୟ ଅନୁସାରେ ଚାଇନା ଶୁକ୍ରବାର ୧୮ଟି ଜେ-୧୬, ୪ ସୁଖୋଇ-୩୦, ୨ ଟି ଆଣବିକ ବୋମାବର୍ଷୀ ବିମାନ ଏଚ୍-୬ ବିମାନ ପଠାଇଥିଲା। ଏହା ସହିତ ଗୋଟିଏ ଆଣ୍ଟି ସବ୍ ମେରାଇନ୍ ଯୁଦ୍ଧ ବିମାନ ମଧ୍ୟ ଏଥିରେ ଥିଲା।
ଶନିବାର ସକାଳେ ପୁଣି ଚାଇନାର ୧୩ଟି ଯୁଦ୍ଧ ବିମାନ ତାଇଓ୍ବାନର ଆକାଶ ମାର୍ଗରେ ପ୍ରବେଶ କରିଥିଲା। ସେଥିମଧ୍ୟରେ ୧୦ଟି ଜେ-୧୬, ୨ଟି ଏଚ୍-୬ ଏବଂ ଗୋଟିଏ ସୂଚନା ପ୍ରଦାନ କାରୀ ବିମାନ ଥିଲା ବୋଲି ତାଇଓ୍ବାନ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
