ବେଜିଂ,୧୯ ।୨: ପୂର୍ବ ଲଦ୍ଦାଖର ଏଲ୍ଏସିରେ ଗତ ବର୍ଷ ମେ’ ମାସରୁ ଭାରତ-ଚାଇନା ମଧ୍ୟରେ ତୁତୁମେମେ ଆରମ୍ଭ ହୋଇଛି । ଏହି ଦୁଇ ଦେଶ ମଧ୍ୟରେ ଜମି ରହିଥିବା ବରଫ ଧୀରେ ଧୀରେ ତରଳିବା ଆରମ୍ଭ କଲାଣି । ଏବେ ପୂର୍ବ ଲଦ୍ଦାଖରେ ଭାରତ ଓ ଚାଇନା ସେନା ପଛକୁ ହଟିବା ପ୍ରକ୍ରିୟା ଆରମ୍ଭ ହୋଇ ଗଲାଣି । ଆଉ ଏହା ଶୀଘ୍ର ସମାପ୍ତ ହେବ ବୋଲି ମଧ୍ୟ ଆଶା କରାଯାଇଛି । ଏହି ସମୟରେ ଚାଇନା କହିଛି ଗଲୱାନ ଘାଟିରେ ହୋଇଥିବା ଆକ୍ରମଣରେ କେତେଜଣ ଚାଇନା ସେନା ବି ନିହତ ହୋଇଛନ୍ତି । କିନ୍ତୁ ପୂର୍ବରୁ ଚାଇନା ମନା କରି ଦେଇଥିଲା କି ଗଲୱାନ ଘାଟିରେ ତା’ର କୌଣସି ସେନା ନିହତ ହୋଇ ନାହାନ୍ତି । ଏବେ ସେ ଗଲୱାନ ଘାଟିରେ ନିହତ ୫ ସେନାଙ୍କ ବିବରଣୀ ପ୍ରଦାନ କରିଛି । ତେବେ ଏହି ଆକ୍ରମଣ ସମୟରେ ଭାରତୀୟ ସେନାର ୨୦ ଯବାନ ଶହୀଦ ହୋଇଯାଇଥିଲେ । ଚାଇନାର କମ୍ୟୁନିଷ୍ଟ ପାର୍ଟିର ମୁଖପତ୍ର ଗ୍ଲୋବାଲ ଟାଇମ୍ସ ଅନୁଯାୟୀ, ଚାଇନାର କେନ୍ଦ୍ରୀୟ ସେନା ଆୟୋଗ କାରାକେରମ ପର୍ବତରେ ସୁତୟନ ଥିବା ୫ ସେନାଙ୍କ ବଳିଦାନକୁ ମନେ ପକାଇଛି ।
