ନୂଆଦିଲ୍ଲୀ/ଓ୍ବାଶିଂଟନ,୧୫ା୧୦ (ପି.ଟି./ଆଇଏଏନ୍ଏସ୍): ଜାତିସଂଘ ମାନବାଧିକାର ପରିଷଦ (ୟୁଏନ୍ଏଚ୍ଆର୍ସି)କୁ ପାକିସ୍ତାନ ଓ ଚାଇନା ପୁନଃ ନିର୍ବାଚିତ ହୋଇଛନ୍ତି। ଚାଇନା ଖୁବ୍ କମ୍ ଭୋଟ ବ୍ୟବଧାନରେ ୟୁଏନ୍ଏଚ୍ଆର୍ସିରେ ଗୋଟିଏ ଆସନ ଜିତିଥିବାବେଳେ ଏସିଆ-ପ୍ରଶାନ୍ତ ମହାସାଗରୀୟ କ୍ଷେତ୍ରର ୫ ରାଷ୍ଟ୍ର ମଧ୍ୟରୁ ସର୍ବାଧିକ ଭୋଟ ହାସଲ କରି ମଜଭୁତ ସ୍ଥିତିରେ ରହିଛି ପାକିସ୍ତାନ। ଏହାକୁ ନେଇ ଉକ୍ତ ଆନ୍ତର୍ଜାତିକ ମାନବାଧିକାର ସଂସ୍ଥାକୁ ବୁଧବାର ବିଭିନ୍ନ ରାଷ୍ଟ୍ର ପକ୍ଷରୁ ଦୃଢ଼ ନିନ୍ଦା କରାଯାଇଛି। ଏଥିସହ ୟୁଏନ୍ଏଚ୍ଆର୍ସି ପାଇଁ ଏହା ଏକ ‘କଳାଦିବସ’ ଭାବେ କେତେକ ଅନ୍ତର୍ଜାତୀୟ ମାନବାଧିକାର ସଂସ୍ଥା ଅଭିହିତ କରିଛନ୍ତି।
୭୫ତମ ଜାତିସଂଘ ସାଧାରଣ ସଭାରେ ମଙ୍ଗଳବାର ୟୁଏନ୍ଏଚ୍ଆର୍ସି ପାଇଁ ଭୋଟ ଗ୍ରହଣ କରାଯାଇଥିଲା। ୪୭ ସଦସ୍ୟ ବିଶିଷ୍ଟ ଏହି ପରିଷଦକୁ ୧୫ ରାଷ୍ଟ୍ର ନିର୍ବାଚିତ ହୋଇଛନ୍ତି। ନୂଆ ସଦସ୍ୟ ରାଷ୍ଟ୍ରଗୁଡ଼ିକ ୨୦୨୧ରୁ ଜାନୁୟାରୀରୁ ୩ ବର୍ଷ ପାଇଁ ୟୁଏନ୍ଏଚ୍ଆର୍ସିରେ ପ୍ରତିନିଧିତ୍ୱ କରିବେ। ପାକିସ୍ତାନକୁ ୧୬୯ ଭୋଟ ମିଳିଥିବାବେଳେ ଉଜ୍ବେକିସ୍ତାନ ୧୬୪ ଓ ନେପାଳକୁ ୧୫୦ ଖଣ୍ଡ ଭୋଟ ମିଳିଛି। ଚାଇନା ସପକ୍ଷରେ ୧୩୯ ଭୋଟ ପଡ଼ିଛି। ୨୦୧୬ରେ ଚାଇନା ୧୮୦ ଖଣ୍ଡ ଭୋଟ ପାଇଥିବାବେଳେ ଗତବର୍ଷ ଏହାକୁ ନିର୍ବାଚିତ ୧୫ ରାଷ୍ଟ୍ର ମଧ୍ୟରୁ ସର୍ବନିମ୍ନ ଭୋଟ ମିଳିଥିଲା। ତେବେ ପରିଷଦରେ ପୁନଃ ସ୍ଥାନିତ ହେବା ପାଇଁ ରିୟାଧର ଉଦ୍ୟମ ବିଫଳ ହୋଇଛି। ସୌଦି ଆରବକୁ ୯୦ ଭୋଟ ମିଳିଛି।
ଚାଇନା, ରୁଷିଆ ଓ କ୍ୟୁବା ଜାତିସଂଘ ମାନବାଧିକାର ପରିଷଦକୁ ନିର୍ବାଚିତ ହେବା ୨୦୧୮ରେ ପରିଷଦରୁ ଆମେରିକା ଓହରି ମାନବାଧିକାର ସୁରକ୍ଷା ଲାଗି ଅନ୍ୟ ମାଧ୍ୟମ ଆପଣାଇବା ନିଷ୍ପତ୍ତିକୁ ଯଥାର୍ଥତାକୁ ପ୍ରମାଣିତ କରୁଛି ବୋଲି ପରରାଷ୍ଟ୍ର ସଚିବ ମାଇକ୍ ପମ୍ପିଓ ଟୁଇଟ୍ କରିଛନ୍ତି। ପମ୍ପିଓ କହିଛନ୍ତି, ଶିଞ୍ଜିଆଙ୍ଗ, ମ୍ୟାନ୍ମାର, ଇରାନ ଓ ଅନ୍ୟ ରାଷ୍ଟ୍ରଗୁଡ଼ିକରେ ଆମେ ମାନବାଧିକାର ଉଲ୍ଲଂଘନକାରୀମାନଙ୍କୁ ଚିହ୍ନଟ କରି ଦଣ୍ଡିତ କରିଛୁ। ସେହିପରି ମାନବାଧିକାର ଉପରେ କାର୍ଯ୍ୟ କରୁଥିବା ଜେନେଭାଭିତ୍ତିକ ଆଇନଜୀବୀ ତଥା ୟୁନାଇଟେଡ୍ ନେଶନ୍ସ ଓ୍ବାଚ୍ କାର୍ଯ୍ୟନିର୍ବାହୀ ନିର୍ଦ୍ଦେଶକ ହିଲ୍ଲେଲ ନେଉଏର ମଧ୍ୟ ୪ ରାଷ୍ଟ୍ର ନିର୍ବାଚିତ ହେବା ନେଇ ନିନ୍ଦା କରିଛନ୍ତି। ସେ କହିଛନ୍ତି, ଜାତିସଂଘର ସଦ୍ୟ ବିଶ୍ୱ ଏପରି ମାନବାଧିକାରକୁ ନେଇ ବିଚାର କରୁଛି, ଯେଉଁଠି ପାକିସ୍ତାନ ଖ୍ରୀଷ୍ଟିଆନ, ହିନ୍ଦୁ ଓ ଅହମଦିଆମାନଙ୍କୁ ଅତ୍ୟାଚାର କରେ। ଚାଇନାରେ ୧୦ ଲକ୍ଷ ଉଇଗରଙ୍କୁ ଶିବିରରେ ବନ୍ଦୀ କରାଯାଇଛି। ରୁଷିଆ ଅସନ୍ତୁଷ୍ଟ ବିଦ୍ରୋହୀଙ୍କୁ ବିଷ ଦେଉଛି। କ୍ୟୁବାରେ ପୋଲିସ ଷ୍ଟେଟ୍ ଚାଲିଛି। ତେଣୁ ଏହା ମାନବାଧିକାର ପାଇଁ ଏକ ‘କଳାଦିବସ’। ଅନୁରୂପ ଭାବେ ଭାରତର ବରିଷ୍ଠ ବହିର୍ବ୍ୟାପାର ନୀତି ବିଶେଷଜ୍ଞ ବ୍ରହ୍ମା ଚେଲ୍ଲନୀ ଟୁଇଟ୍ କରି କହିଛନ୍ତି, ଚାଇନା ୧ ନିୟୁତରୁ ଊର୍ଦ୍ଧ୍ୱ ମୁସ୍ଲମାନଙ୍କୁ ବନ୍ଦୀ କରି ରଖିଥିବାବେଳେ ତିବ୍ବତରେ ଦମନଲୀଳା ଚଳାଇ ଅଟକମାନଙ୍କ ଅଙ୍ଗପ୍ରତ୍ୟଙ୍ଗ ପ୍ରତିରୋପଣ ପାଇଁ ନେବା ସହ ସେମାନଙ୍କୁ ହତ୍ୟା କରୁଛି। ଏହି ଦେଶ ୟୁଏନ୍ଏଚ୍ଆର୍ସିରେ ଏକ ଆସନ ଲାଭ କରିଛି। ଚାଇନା ତା’ର ପ୍ରତିନିଧି ପାକିସ୍ତାନଠାରୁ ୩୦ ଖଣ୍ଡ କମ୍ ଭୋଟ ପାଇଛି। ମାନବାଧିକାର ପରିଷଦ କ୍ରମଶଃ ଅପ୍ରାସଙ୍ଗିକ ହେବାରେ ଲାଗିଛି। ପାକ୍-ଅଧିକୃତ କଶ୍ମୀର (ପିଓକେ)ର ଅଧିକାର କର୍ମୀ ଅମ୍ଜଦ ଆୟୁବ ମିର୍ଜାଙ୍କ ମତରେ ପାକିସ୍ତାନ, ଚାଇନା, କ୍ୟୁବା, ରୁଷିଆ ଓ ସୌଦି ଆରବ ଭଳି ବିଶ୍ୱର ନିକୃଷ୍ଟ ମାନବାଧିକାର ଉଲ୍ଲଂଘନକାରୀ ଦେଶଗୁଡ଼ିକ ଜାତିସଂଘର ଏହି ସଂସ୍ଥାକୁ ନିର୍ବାଚିତ ହେବା ଉକ୍ତ ସଙ୍ଗଠନର ବିଶ୍ୱସନୀୟତାକୁ ଧ୍ୱଂସ କରିଦେବ।
ସୂଚନାଯୋଗ୍ୟ, ଗତ ସପ୍ତାହରେ ୟୁରୋପ, ଆମେରିକା ଓ କାନାଡାର କେତେକ ମାନବାଧିକାର ଗୋଷ୍ଠୀକୁ ନେଇ ଗଠିତ ମେଣ୍ଟ ଚାଇନା, ରୁଷିଆ, ସୌଦି ଆରବ, କ୍ୟୁବା, ପାକିସ୍ତାନ ଓ ଉଜ୍ବେକିସ୍ତାନର ନିର୍ବାଚନକୁ ବିରୋଧ କରିବା ପାଇଁ ଜାତିସଂଘର ସଦସ୍ୟ ରାଷ୍ଟ୍ରଗୁଡ଼ିକୁ ଅନୁରୋଧ କରିଥିଲେ। ଏହି ଦେଶଗୁଡ଼ିକର ମାନବାଧିକାର ରେକର୍ଡ ସେଗୁଡ଼ିକୁ ଅଯୋଗ୍ୟ ସାବ୍ୟସ୍ତ କରିଥିବା ସେମାନେ ଦର୍ଶାଇଥିଲେ। ଏହାସତ୍ତ୍ୱେ ଚାଇନା ଓ ପାକିସ୍ତାନ ୟୁଏନ୍ଏଚ୍ଆର୍ସିକୁ ନିର୍ବାଚିତ ହେବା ଅସନ୍ତୋଷର କାରଣ ପାଲଟିଛି।
