ବେଜିଂ/କାଠମାଣ୍ଡୁ,୨୦।୭ : ଚାଇନା କେବଳ ଲଦାଖ ଏବଂ ଭୁଟାନ ଡୋକଲାମ ତଥା ଭାରତର ଅନ୍ୟ ସୀମାବର୍ତ୍ତୀ ଅଞ୍ଚଳରେ ଜବର ଦଖଲ କରିବାରେ ବ୍ୟସ୍ତ ନୁହେଁ, ବରଂ ଏହା ନେପାଳ ସୀମାବର୍ତ୍ତୀ ଅଞ୍ଚଳରେ ମଧ୍ୟ ପ୍ରବେଶ କରୁଛି। ନେପାଳ ସୀମାରେ ଚାଇନା ଦ୍ୱାରା ବ୍ୟାପକ ଜବର ଦଖଲ ହେବାର ଖବର ମିଳିଛି। ନେପାଳର ଏକ ନାଗରିକ ସଂଗଠନ ଦେଶର ଜମି ପରିଚାଳନା ମନ୍ତ୍ରୀ ଶଶି ଶ୍ରେଷ୍ଠଙ୍କୁ ଏନେଇ ଏକ ସ୍ମାରକପତ୍ର ପ୍ରଦାନ କରିଛି। ସଂଗଠନ ଚାଇନା ନେପାଳ ଜମି ଦଖଲ କରିଥିବା ଅଭିଯୋଗ କରିଛି।
ନେପାଳର ’ଜାତୀୟ ଏକୀକରଣ ଅଭିଯାନ’ ମୁଖ୍ୟ ବିନୟ ଯାଦବ ମଙ୍ଗଳବାର କାଠମାଣ୍ଡୁରେ ମନ୍ତ୍ରୀ ଶଶି ଶ୍ରେଷ୍ଠଙ୍କୁ ଏହି ସ୍ମାରକପତ୍ର ପ୍ରଦାନ କରିଛନ୍ତି। ଏହି ସ୍ମାରକପତ୍ରରେ ଦର୍ଶାଯାଇଛି ଯେ ଚାଇନା ଗୋରଖାରେ ଥିବା ଚୁମାନୁବାରୀ ଗ୍ରାମୀଣ ପୌରପାଳିକା -୧ ର ରୁଏଲା ସୀମାକୁ ବାଡ଼ ଦେଇ ଦଖଲ କରିଛି। ଏହି ସ୍ମାରକପତ୍ରରେ ବିନୟ ଯାଦବ କହିଛନ୍ତି ଯେ ରୁଏଲା ସମେତ ନେପାଳ-ଚାଇନା ସୀମାର ବିଭିନ୍ନ ଅଞ୍ଚଳରେ ଅନ୍ତର୍ଜାତୀୟ ନିୟମର ଉଲ୍ଲଂଘନ କରିବା କାର୍ଯ୍ୟ କେବଳ ଦୁଇ ଦେଶର ବନ୍ଧୁତା ପ୍ରତି ଅପମାନ ନୁହେଁ, ବରଂ ନେପାଳର ସାର୍ବଭୌମତ୍ୱ ପାଇଁ ମଧ୍ୟ ପ୍ରତ୍ୟକ୍ଷ ଆହ୍ବାନ। ଯାଦବ ଏହା ମଧ୍ୟ କହିଛନ୍ତି ଯେ ନେପାଳର ଆଞ୍ଚଳିକ ଅଖଣ୍ଡତା ଉପରେ ହୋଇଥିବା ଆକ୍ରମଣକୁ ବାରମ୍ବାର ନିନ୍ଦା କରିବା ପରେ ମଧ୍ୟ ଚାଇନା ଏହାର ଜବର ଦଖଲ ବନ୍ଦ କରୁନାହିଁ। ଏହା ସହିତ ସେ ବର୍ତ୍ତମାନର ସରକାର କ୍ଷମତାକୁ ଆସିବା ପରେ ନେପାଳ-ଚାଇନା ସୀମାରେ ହୋଇଥିବା ଜବର ଦଖଲ ବିରୋଧରେ ନିଆଯାଇଥିବା ଦୃଢ଼ ପଦକ୍ଷେପକୁ ସେ ପ୍ରଶଂସା କରିଛନ୍ତି।
ଯାଦବ କହିଛନ୍ତି ଯେ ସରକାରଙ୍କ ଦ୍ୱାରା କୂଟନୈତିକ ଉଦ୍ୟମ ସତ୍ତ୍ୱେ ସୀମାରେ ଜବର ଦଖଲ ଜାରି ରହିଛି। ଚାଇନାର ଏହି ମନୋଭାବ ବିରୋଧରେ ଆମେ ନିର୍ଣ୍ଣାୟକ ଏବଂ କଠୋର କାର୍ଯ୍ୟାନୁଷ୍ଠାନ ଦାବି କରୁଛୁ। ଏକତା ଅଭିଯାନ ଏଥିପାଇଁ ସରକାରଙ୍କୁ ସମ୍ପୂର୍ଣ୍ଣ ସହାୟତା କରିବେ। ଉତ୍ତର ଗୋରଖାରେ ନୋ-ମ୍ୟାନ୍-ଲାଣ୍ଡ ନିକଟରେ ଏକ ବାଡ଼ ନିର୍ମାଣ କରି ଚାଇନା ପୂର୍ବରୁ ଜୁନ ମାସରେ ନେପାଳର ଜମି ଜବର ଦଖଲ କରିଥିଲା। ନେପାଳ ଗଣମାଧ୍ୟମରେ ଏ ବିଷୟରେ ଏକ ଖବର ଆସିଥିଲା। ବର୍ତ୍ତମାନ କୁହାଯାଉଛି ଯେ ରୁଏଲା ସୀମାରେ ଚାଇନା ବେଆଇନ ଦଖଲ ବିଷୟରେ ନେପାଳର ବୈଦେଶିକ ମନ୍ତ୍ରଣାଳୟ କିମ୍ବା ଗୋରଖା ଜିଲା ପ୍ରଶାସନ ଜାଣି ନାହାଁନ୍ତି।
