ନୂଆଦିଲ୍ଲୀ, ୨୦ା୧: ଚାଇନାର ପିପଲ୍ସ ଲିବରେଶନ ଆର୍ମି (ପିଏଲ୍ଏ) ଭାରତୀୟ ଭୂଖଣ୍ଡକୁ ଅନୁପ୍ରବେଶ କରି ଜଣେ ନାବାଳକଙ୍କୁ ଅପହରଣ କରିନେଇଛି। ଅରୁଣାଚଳ ପ୍ରଦେଶର ଅପର ସିଆଙ୍ଗ ଜିଲାରୁ ୧୭ ବର୍ଷୀୟ ବାଳକଙ୍କୁ ପିଏଲ୍ଏ ସୈନ୍ୟମାନେ ଉଠାଇନେଇଥିବା ବୁଧବାର ସେଠାକାର ଏମ୍ପି ତାପିର ଗାଓ ଅଭିଯୋଗ ଆଣିଛନ୍ତି। ତାପିର କହିଛନ୍ତି, ସିୟୁଙ୍ଗଲା ଅଞ୍ଚଳର ଲୁଙ୍ଗଟା ଜୋନରୁ ମିରାମ ତାରୋନ୍ଙ୍କୁ ଅପହରଣ କରିନେଇଥିବାବେଳେ ତାଙ୍କ ବନ୍ଧୁ ଜନି ୟାୟିଙ୍ଗ୍ ଖସି ପଳାଇଆସିବାରେ ସଫଳ ହୋଇଛନ୍ତି। ପିଏଲ୍ଏର ଏଭଳି କୁକାର୍ଯ୍ୟ ସମ୍ପର୍କରେ ଜନି ସ୍ଥାନୀୟ ଅଧିକାରୀମାନଙ୍କୁ ଅବଗତ କରାଇଛନ୍ତି। ମିରାମ ଓ ଜନି ଜିଡୋ ଗ୍ରାମର ବାସିନ୍ଦା ଏବଂ ଉଭୟେ ଶିକାର କରନ୍ତି। ସାଙ୍ଗପୋ ନଦୀ ଅରୁଣାଚଳକୁ ପ୍ରବେଶ କରିଥିବା ସ୍ଥାନ ନିକଟରେ ଏହି ଘଟଣା ଘଟିଥିବା ତାପିର କହିଛନ୍ତି। ସାଙ୍ଗ୍ପୋକୁ ଅରୁଣାଚଳରେ ସିଆଙ୍ଗ୍ କୁହାଯାଉଥିବାବେଳେ ଆସାମରେ ଏହା ବ୍ରହ୍ମପୁତ୍ର ନାମରେ ଖ୍ୟାତ। ତାପିର ଏ ନେଇ ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ନିଷିଥ ପ୍ରାମାଣିକଙ୍କ ଦୃଷ୍ଟି ଆକର୍ଷଣ କରିବା ସହ ଜରୁରୀ ପଦକ୍ଷେପ ନେବା ନିମନ୍ତେ ଅନୁରୋଧ କରିଛନ୍ତି। ଟୁଇଟରରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ସମେତ ଭାରତୀୟ ସେନାକୁ ମଧ୍ୟ ଟ୍ୟାଗ୍ କରିଛନ୍ତି। ୨୦୨୦ ସେପ୍ଟେମ୍ବରରେ ପିଏଲ୍ଏ ସୈନ୍ୟମାନେ ଅରୁଣାଚଳର ଅପର ସୁବାଂସିରି ଜିଲାକୁ ଅନୁପ୍ରବେଶ କରି ୫ ଜଣ ଯୁବକଙ୍କୁ ଅପହରଣ କରି ନେଇଥିଲେ। ସପ୍ତାହେ ପରେ ସେମାନଙ୍କୁ ଛାଡ଼ିଥିଲେ। ପୂର୍ବ ଲଦାଖରେ ୨୦୨୦ ଏପ୍ରିଲଠାରୁ ଭାରତୀୟ ଯବାନ ଓ ଚାଇନା ସୈନ୍ୟ ମୁହାଁମୁହିଁ ସ୍ଥିତିରେ ଥିବାବେଳେ ସଦ୍ୟ ଘଟଣା ସାମ୍ନାକୁ ଆସିଛି। ଲଦାଖରୁ ଅରୁଣାଚଳ ପ୍ରଦେଶ ପର୍ଯ୍ୟନ୍ତ ଚାଇନା ସହ ୩,୪୦୦ କି.ମି. ଦୀର୍ଘ ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି) ରହିଛି।
