ଟିକିରି,୨୫।୯(ଡି.ଏନ୍.ଏ.): ରାୟଗଡ଼ା ଜିଲା କାଶୀପୁର ବ୍ଲକର ଅନେକ ଗାଁକୁ ଏବେ ମଧ୍ୟ ଭଲ ରାସ୍ତାଟିଏ ନାହିଁ। ଆମ୍ବୁଲାନ୍ସ ଗାଁକୁ ଯାଇପାରୁ ନ ଥିବାରୁ ରୋଗୀ ଏବଂ ଗର୍ଭବତୀ ଭାର, ଚୌକି ଏବଂ ଷ୍ଟ୍ରେଚରରେ ବୁହାହେବା ଏବଂ ବାଟରେ ପ୍ରସବ କରିବା ଏହି ଅଞ୍ଚଳ ପାଇଁ ସବୁଦିନିଆ ଘଟଣା ପାଲଟିଛି। ଶିରିପାଇ ପଞ୍ଚାୟତର କେନ୍ଦୁଗୁଡ଼ା ଗ୍ରାମରେ ଶନିବାର ପୁଣି ଏଭଳି ଏକ ଚିତ୍ର ଦେଖିବାକୁ ମିଳିଛି। ଗଁାର ଚାଚିରି ମାଝିଙ୍କ ଗର୍ଭବତୀ ସ୍ତ୍ରୀ ସିନାଇ(୩୩)ଙ୍କୁ ୨ କି.ମି. ଷ୍ଟ୍ରେଚରରେ ବୋହିନେବା ସମୟରେ ବାଟରେ ଜଙ୍ଗଲ ରାସ୍ତାରେ ସେ ପ୍ରସବ କରିଛନ୍ତି।
ଅନୁଯାୟୀ, ସିନାଇଙ୍କର ସକାଳେ ପ୍ରସବ ବେଦନା ଆରମ୍ଭ ହେଇଥିଲା। ତାଙ୍କୁ କାଶୀପୁର ସ୍ବାସ୍ଥ୍ୟକେନ୍ଦ୍ର ନେବା ପାଇଁ ସ୍ବାମୀ ୧୦୮ ଆମ୍ବୁଲାନ୍ସକୁ ଯୋଗାଯାଗ କରିଥିଲେ। ଆମ୍ବୁଲାନ୍ସ କାଶୀପୁରରୁ ଆସିଥିଲେ ମଧ୍ୟ ଭଲ ରାସ୍ତା ନ ଥିବାରୁ କେନ୍ଦୁଗୁଡ଼ାଠାରୁ ୨ କି.ମି. ପୂର୍ବରୁ କେରେଙ୍ଗାଗୁଡ଼ା ଛକରେ ଅଟକିଯାଇଥିଲା। ଆମ୍ବୁଲାନ୍ସ ଚାଳକ ପରିକ୍ଷିତ ନାୟକ ଷ୍ଟ୍ରେଚର ନେଇ ଗାଁକୁ ଚାଲି ଚାଲି ଯାଇଥିଲେ। ପରିବାର ଲୋକେ ଏବଂ ଆଶାକର୍ମୀଙ୍କ ସହାୟତାରେ ସେ ସିନାଇଙ୍କୁ ଷ୍ଟ୍ରେଚରରେ ବୋହି ଆଣିଥିଲେ। ବାଟରେ ପ୍ରସବ ପରେ ଉଭୟ ମା’ ଏବଂ ନବଜାତକଙ୍କୁ ଆମ୍ବୁଲାନ୍ସରେ ନେଇ କାଶୀପୁର ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ସେମାନେ ଏବେ ସୁସ୍ଥ ଥିବା ସୂଚନା ମିଳିଛି। ଉକ୍ତ ଅଞ୍ଚଳବାସୀଙ୍କ ପାଇଁ ଏଭଳି ଘଟଣା ଦେହସୁହା ହୋଇଥିବାବେଳେ ଅନେକ ସମୟରେ ଗର୍ଭବତୀ, ପ୍ରସୂତି ଏବଂ ନବଜାତକଙ୍କ ସ୍ବାସ୍ଥ୍ୟାବସ୍ଥା ଗୁରୁତର ହେଉଛି। ଆମ୍ବୁଲାନ୍ସ ଚାଳକମାନଙ୍କ ସହଯୋଗରେ ଆଉ କେତେଜଣଙ୍କ ଜୀବନ ମଧ୍ୟ ବଞ୍ଚିଯାଉଛି। ଏଭଳି ଘଟଣା ବାରମ୍ବାର ପ୍ରଶାସନର ନଜରକୁ ଆସୁଥିଲେ ମଧ୍ୟ ସବୁ ଗାଁକୁ ଭଲ ରାସ୍ତା ନ ହୋଇପାରିବା ଦୁର୍ଭାଗ୍ୟଜନକ ବୋଲି ବୁଦ୍ଧିଜୀବୀ ପ୍ରକାଶ କରିଛନ୍ତି।
