ତେହରାନ,୨୮।୨: ଇରାନ ଓ ଇସ୍ରାଏଲ ମଧ୍ୟରେ ଜାରି ରହିଥିବା ଭୟଙ୍କର ଯୁଦ୍ଧ ଯୋଗୁ ମଧ୍ୟପ୍ରାଚ୍ୟରେ ଉତ୍ତେଜନା ଚରମ ସୀମାରେ ପହଞ୍ଚିଛି। ଖବର ସଂସ୍ଥା ରଏଟର୍ସ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଇସ୍ରାଏଲର ଏୟାର ଷ୍ଟ୍ରାଇକ୍ରେ ଇରାନର ପ୍ରତିରକ୍ଷା ମନ୍ତ୍ରୀ ଅମୀର ନସୀରଜାଦେହ ଏବଂ ରିଭୋଲ୍ୟୁସନାରୀ ଗାର୍ଡସ କମାଣ୍ଡର ମହମ୍ମଦ ପକପୁରଙ୍କ ମୃତ୍ୟୁ ଘଟିଛି।
ରିପୋର୍ଟ ଅନୁଯାୟୀ, ଇସ୍ରାଏଲ ଆକ୍ରମଣରେ ଇରାନର ଏହି ଦୁଇ ଶୀର୍ଷ ସାମରିକ ଅଧିକାରୀ ପ୍ରାଣ ହରାଇଛନ୍ତି। ତେବେ ଇରାନ ପକ୍ଷରୁ ଏଯାଏ କୌଣସି ଆଧିକାରିକ ପୁଷ୍ଟି କରାଯାଇ ନାହିଁ। ଇରାନ ବୈଦେଶିକ ମନ୍ତ୍ରୀ ଅବ୍ବାସ ଆରାଗଚି କହିଛନ୍ତି ଯେ, ଏହି ଆକ୍ରମଣରେ ଜଣେ କିମ୍ବା ଦୁଇଜଣ କମାଣ୍ଡର ମୃତ୍ୟୁବରଣ କରିଥାଇପାରନ୍ତି, କିନ୍ତୁ ଏହା ଦେଶ ପାଇଁ କୌଣସି ବଡ଼ କ୍ଷତି ନୁହେଁ। ସେହିଭଳି ଇସ୍ରାଏଲ ପ୍ରଧାନମନ୍ତ୍ରୀ କହିଛନ୍ତି ଯେ, ଆମେରିକା ଓ ଇସ୍ରାଏଲ ମିଳିତ ଭାବେ ଇରାନର ଆତଙ୍କବାଦୀ ଶାସନ ବିରୋଧରେ ଅଭିଯାନ ଆରମ୍ଭ କରିଛନ୍ତି। ସେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନେତୃତ୍ୱକୁ ଧନ୍ୟବାଦ ଜଣାଇଛନ୍ତି।
ଆମେରିକା ଏହି ଯୁଦ୍ଧ ଉପରେ କଡ଼ା ନଜର ରଖିଛି। ସୂଚନା ଅନୁସାରେ, ପେଣ୍ଟାଗନ ମୁଖ୍ୟ ପିଟ ହେଗସେଥ ଏବଂ ଜଏଣ୍ଟ ଚିଫ୍ସ ଅଫ ଷ୍ଟାଫ ଚେୟାରମ୍ୟାନ ଜେନେରାଲ ଡ୍ୟାନ କେନଫ୍ଲୋରିଡାସ୍ଥିତ ମାର୍-ଏ-ଲାଗୋ ରିସୋର୍ଟରୁ ଏହି ପୂରା ଅଭିଯାନର ତଦାରଖ କରୁଛନ୍ତି, ଯେଉଁଠାରେ ରାଷ୍ଟ୍ରପତି ଟ୍ରମ୍ପ ମଧ୍ୟ ଉପସ୍ଥିତ ଅଛନ୍ତି।
