ଲାଞ୍ଜିଗଡ଼,୧୮।୩(ଡି.ଏନ.ଏ.): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ବିଶ୍ୱନାଥପୁର ପଞ୍ଚାୟତ ଡୁମେରମୁଣ୍ଡାଠାରେ ଥିବା ଏକ ତେଲ ମିଲରେ ଜଣେ ୧୫ ବର୍ଷ ନାବାଳକର ବାମ ହାତ କଟି ଯାଇଛି। ଶୁକ୍ରବାର ଅପରାହ୍ନରେ ମିଲରେ ସୂର୍ଯ୍ୟମୁଖୀ ତେଲ ପେଡା ଯାଉଥିବାବେଳେ ମେଶିନ ଭିତରେ ହାତ ଲାଗିଯିବାରୁ ବେନଗାଁ ପଞ୍ଚାୟତ ଧଡେଲ ଗାଁର ସୁଶାନ୍ତ ମାଝି ନାମକ ଜଣେ ନାବାଳକର ବାମ ହାତ ସମ୍ପୂର୍ଣ୍ଣ ଭାବେ ଛିଣ୍ଡି ଅଲଗା ହୋଇଯାଇଛି। ତେବେ ଦୀର୍ଘ ସମୟ ଯାଏଁ ସୁଶାନ୍ତର ହାତ ଛିଣ୍ଡି କଟିଯିବା ସହ ମେଶିନରେ ଲାଗି ରହିଥିବାବେଳେ ମିଲ୍ ମାଲିକ ନିରବଦ୍ରଷ୍ଟା ସାଜିବା ଘଟଣାକୁ ସାଧାରଣରେ ନିନ୍ଦା କରାଯାଇଛି। ସୂଚନାନୁଯାୟୀ, ଧଡେଲ ଗାଁର ସୁଶାନ୍ତ ୪ ମାସରୁ ଅଧିକ ସମୟ ହେଲା ଏହି ମିଲରେ ଶ୍ରମିକ ଭାବେ କାମ କରୁଥିଲେ। ତେବେ ମାଲିକ ନିଜ ଘରଠାରୁ ମାତ୍ର ଦେଢ଼ କିମି ଦୂରରେ ବିଶ୍ୱନାଥପୁର ଥାନା ରହିଥିଲେ ମଧ୍ୟ ପୋଲିସଙ୍କୁ ମଧ୍ୟ ଜଣାଇ ନ ଥିଲା। ଏପରିକି ମାମଲାଟିକୁ ଚପାଇଦେବାକୁ ଉଦ୍ୟମ କରି ବିଫଳ ହେବା ପରେ ଗୁରୁତର ନାବାଳକଙ୍କୁ ପ୍ରଥମେ ବିଶ୍ୱନାଥପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ଭବାନୀପାଟଣା ଜିଲା ମୁଖ୍ୟ ଚିକିତ୍ସାଳୟ ଓ ସେଠାରୁ ଭୁବନେଶ୍ୱର ସ୍ଥାନାନ୍ତରିତ କରାଯାଉଥିବା ସୂଚନା ମିଳିଛି। ଅନ୍ୟପକ୍ଷରେ ଶିଶୁଟି ବିଶ୍ୱନାଥପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି ହେବା ପରେ ମେଡ଼ିକାଲ ପକ୍ଷରୁ ସ୍ଥାନୀୟ ବିଶ୍ୱନାଥପୁର ପୋଲିସଙ୍କୁ ସୂଚନା ଦେଇଥିବା ଲାଞ୍ଜିଗଡ଼ ବ୍ଲକ ମେଡ଼ିକାଲ ଅଫିସର ତେତେସୱର ନାୟକ ପ୍ରକାଶ କରିଛନ୍ତି। ଏହି ଅଘଟଣ ପରେ ମିଲ ମାଲିକଙ୍କ ନାଁରେ ଅପରାଧିକ ମାମଲା ରୁଜୁ କରିବାକୁ ଦାବି ହେଉଛି।
