ମହାକାଳପଡ଼ା,୧୭ା୬(ପ୍ରତାପ ଚନ୍ଦ୍ର ସ୍ବାଇଁ) କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ନିକଟ ଜମ୍ବୁ-ମାର୍ଶାଘାଇ ମୁଖ୍ୟ କେନାଲ ବନ୍ଧ ନିକଟ ଛପାଲି-ପ୍ରଭାକରପୁର ପାଖରେ ୧୦ବର୍ଷରୁ ଅଧିକ ହେବ ଲକ୍ଷାଧିକ ଟଙ୍କା ବ୍ୟୟରେ ନିର୍ମାଣ ହୋଇଛି ଛପାଲି ପ୍ରାଇମେରୀ ବିଦ୍ୟୁତ୍ ସବ୍ ଷ୍ଟେଶନ। ନିମ୍ନମାନର କାର୍ଯ୍ୟ ଯୋଗୁ ଅଦ୍ୟାବଧି ଏହା ସମ୍ପୂର୍ଣ୍ଣ ହୋଇପାରିନାହିଁ। ତେବେ ଏହି ନିର୍ମାଣ ସମୟରେ ସବ୍ ଷ୍ଟେଶନକୁ ସଂଯୋଗ ପାଇଁ ରାସ୍ତା ସମସ୍ୟା ଥିବାରୁ ଅନ୍ୟ ଏକ କେନାଲ ବନ୍ଧ ଦକ୍ଷିଣ ପାଶର୍ବ ଚାଷ ଜମି ପଥ ଦେଇ ବିଦ୍ୟୁତ୍ ଖୁଣ୍ଟ ପକା ଯାଇଥିଲେ ମଧ୍ୟ ତାହା ଅଦ୍ୟାବଧି କର୍ଯ୍ୟକ୍ଷମ ହେବା ନେଇ ଅନିଶ୍ଚିତତା ଘେରରେ ରହିଛି। ଏହି ସବ୍ଷ୍ଟେଶନ କାର୍ଯ୍ୟକ୍ଷମ ହେଲେ ବଉଳକଣି , ଜମ୍ବୁ , ରାମନଗର , ଖରିନାସୀ ଓ ବତିଘର ପଞ୍ଚାୟତକୁ ବିଦ୍ୟୁତ୍ ସରବରାହ ବ୍ୟବସ୍ଥା ହୋଇପାରିବ। ଅପରପକ୍ଷରେ ଏହି ଅଞ୍ଚଳର ମହାକାଳପଡ଼ା ବିଦ୍ୟୁତ୍ ସବ୍ ଷ୍ଟେଶନରୁ ସରବରାହ ବ୍ୟବସ୍ଥା ଗ୍ରହଣ କରାଯାଇଛି। ତେବେ ଅନେକ ସମୟରେ କାଳବୈଶାଖୀ ପ୍ରଭାବରେ ଆକାଶରେ ବିଜୁଳି ଘଡ଼ଘଡି ହେଲେ ସ୍ଥଳ ଭାଗରେ ବିଦ୍ୟୁତ୍ ଉଭାନ ହୋଇଯାଉଛି। ବହୁବର୍ଷର ବିଦ୍ୟୁତ୍ ଖୁଣ୍ଟ, ତାର ଓ ଇଂସୁଲେଟର, ଶଙ୍ଖ ଆଦି ପୁରୁଣା ହେବା ଯୋଗୁ ତାର ଛିଡି ଯାଉଛି ତ କେଉଁଠି ଖୁଣ୍ଟ ଉପୁଡ଼ିଯାଇଛି। କେଉଁଠି ବଡ଼ ବଡ଼ ଗଛ ଡାଳ ଭାଙ୍ଗି ଖୁଣ୍ଟ ଓ ତାର ଉପରେ ପଡ଼ିବାରୁ ବିଦ୍ୟୁତ୍ ସରବରାହ ବିଚ୍ଛିନ୍ନ କରାଯାଉଛି। ଅଦ୍ୟାବଧି ଦେଶର ପ୍ରମୁଖ ବ୍ୟବସାୟୀ ଟାଟା କମ୍ପାନୀ ବିଦ୍ୟୁତ୍ ସରବରାହ ସଂସ୍ଥା ଦାୟିତ୍ୱ ନେବା ପରେ ପ୍ରବଳ ଗୁଳୁଗୁଳି ଗରମରେ ଉପଭୋକ୍ତମାନେ ନାହିଁ ନ ଥିବା ସମସ୍ୟା ଭୋଗୁଛନ୍ତି ବୋଲି ବୁଦ୍ଧିଜୀବୀ ମହଲରେ କ୍ଷୋଭ ପ୍ରକାଶ ପାଇଛି।
ପୂର୍ବତନ ସରପଞ୍ଚ ନାଥ କୁମାର ଭୋଳ କହିଛନ୍ତି, ମହାକାଳପଡ଼ା ବିଦ୍ୟୁତ୍ ସବ୍ଡିଭିଜନ ଅଧୀନରେ ମହାକାଳପଡ଼ା, ବାବର ଓ ଲୁଣା ସେକ୍ସନରେ ୩୭ ହଜାର ବିଦ୍ୟୁତ୍ ଉପଭୋକ୍ତାଙ୍କ ପାଇଁ ସାଢ଼େ ୪ ମେଗାୱାଟ ବ୍ୟୟ ହେଉଛି ବୋଲି କୁହାଯାଇଛି। ତେବେ ଏହି ୩ ବିଦ୍ୟୁତ୍ ସେକ୍ସନରୁ ମାସିକ ୮୦ ଲକ୍ଷରୁ ଅଧିକ ଟଙ୍କା ଆଦାୟ କରାଯାଉଛି ବୋଲି ସୂଚନା ମିଳିଛି। ତେବେ କାଳବୈଶାଖୀ ବର୍ଷା ସାଙ୍ଗକୁ ବଜ୍ରପାତ ହେଲେ ଉପର ମୁଣ୍ଡରୁ ବିଦ୍ୟୁତ୍ ସରବରାହ ବ୍ୟାଘାତ ସୃଷ୍ଟି ହୋଇଥାଏ। ଦିନ ଓ ରାତିରେ ବିଦ୍ୟୁତ୍ ସରବରାହ ବନ୍ଦ ହେଲେ ସ୍ଥାନୀୟ ଉପଭୋକ୍ତା ତଥା ଶିଶୁଠାରୁ ବୟସ୍କ ଲୋକ ଗରମ ଗୁଳୁଗୁଳିରେ ଆଉଟପାଉଟ ହେଉଛନ୍ତି। ତୁରନ୍ତ ଏହି ବିଦ୍ୟୁତ୍ ସବ୍ଷ୍ଟେଶନ କାର୍ଯ୍ୟକ୍ଷମ କରିବାକୁ ଉପଭୋକ୍ତାମାନେ ଦାବି କରିଛନ୍ତି। ଏ ସମ୍ପର୍କରେ ମହାକାଳପଡ଼ା ବିଦ୍ୟୁତ୍ ସବ୍ ଡିଭିଜନ ସହକାରୀ ଯନ୍ତ୍ରୀ ବାବୁଲାଲ ହାତୀଙ୍କୁ ପଚାରିବାରେ ବିଦ୍ୟୁତ ସରବରାହ ସମସ୍ୟାଗୁଡ଼ିକ ସମାଧାନ ପାଇଁ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯାଉଛି। ଛପାଲି ପ୍ରାଇମେରୀ ବିଦ୍ୟୁତ୍ ସବ୍ଷ୍ଟେଶନ କାର୍ଯ୍ୟକାରୀ ହେବା ପାଇଁ ବିଭାଗ ଉଦ୍ୟମ ଚଳାଇଛି। ମାସେ ମଧ୍ୟରେ ଏହି ସବ୍ ଷ୍ଟେଶନ କାର୍ଯ୍ୟକାରୀ ହେବ। ଏହା କାର୍ଯ୍ୟକାରୀ ହେଲେ ଅଞ୍ଚଳର ବିଦ୍ୟୁତ୍ ସମସ୍ୟା ସମାଧାନ ହେବା ସହ ୫ଟି ପଞ୍ଚାୟତକୁ ନିରବଚ୍ଛିନ ଭାବେ ବିଦ୍ୟୁତ୍ ଯୋଗାଣ ହୋଇପାରିବ ବୋଲି ସେ କହିଛନ୍ତି। ଏ ସମ୍ପର୍କରେ ମାର୍ଶାଘାଇ ବିଦ୍ୟୁତ୍ ଡିଭିଜନ ନିର୍ବାହୀ ଯନ୍ତ୍ରୀ ପ୍ରତାପ ଚନ୍ଦ୍ର ସ୍ବାଇଁଙ୍କୁ ପଚାରିବାରେ ଛପାଲି ନିକଟ ପ୍ରାଇମେରୀ ବିଦ୍ୟୁତ୍ ସବ୍ଷ୍ଟେଶନ ନିର୍ମାଣକାରୀ ସଂସ୍ଥା ନିର୍ମାଣରେ ବିଳମ୍ବ ହେବା ଯୋଗୁ ସମସ୍ୟା ହେଉଛି। ଏହା କାର୍ଯ୍ୟକ୍ଷମ ପାଇଁ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯାଉଛି। ମାସେରୁ ଦୁଇ ମାସ ମଧ୍ୟରେ କର୍ଯ୍ୟକ୍ଷମ କରାଯିବ ବୋଲି ସେ କହିଛନ୍ତି।
