ପାଲଲହଡ଼ା,୧୦ା୭(ଡି.ଏନ.ଏ.): ଚୋରା ମୋବାଇଲ କିଣିଥିବା ଜଣେ ଅଭିଯୁକ୍ତଙ୍କୁ ପଚରାଉଚରା ପାଇଁ ତାଙ୍କ ଘରକୁ ଯାଇଥିବା ବେଳେ ପୋଲିସ ଉପରେ ହୋଇଛି ଆକ୍ରମଣ। ସମ୍ପୃକ୍ତ ଅଭିଯୁକ୍ତ ଜଣେ କନଷ୍ଟେବଳଙ୍କ ଗାଲକୁ କାମୁଡ଼ି ଦେଇ ଫେରାର ହୋଇଯାଇଛନ୍ତି। ଗୁରୁବାର ରାତି ପ୍ରାୟ ୯ଟା ୩୦ରେ ଏହି ଘଟଣା ଘଟିଥିବା ବେଳେ ଶୁକ୍ରବାର ବିଭିନ୍ନ ସ୍ଥାନରେ ଚଢ଼ାଉ କରି ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଛି ଅନୁଗୋଳ ଜିଲା ପାଲଲହଡ଼ା ପୋଲିସ।
ଥାନା ଅଧିକାରୀ କିଶୋର କୁମାର ସାମଲ କହିଛନ୍ତି, ସାମନ୍ତସାହିର ହୋଟେଲ ମାଲିକ ମୁନା ସାହୁଙ୍କ ମୋବାଇଲ ଚୋରି ହେଇଥିବା ଗୁରୁବାର ଥାନାରେ ଅଭିଯୋଗ ହୋଇଥିଲା। ଏ ନେଇ ଗଉଡ଼ସାହିର ପ୍ରଦ୍ୟୁମ୍ନ ଥାପାଙ୍କୁ ଥାନାକୁ ଅଣାଯାଇ ପଚରାଉଚରା କରାଯାଇଥିଲା। ଚୋରି ମୋବାଇଲ ଶାସନସାହିର ଜଗନ ସାହୁଙ୍କୁ ବିକ୍ରି କରିଥିବା ପ୍ରଦ୍ୟୁନ୍ନ ସୂଚନା ଦେବା ପରେ ଏଏସ୍ଆଇ ପ୍ରଦୀପ କୁମାର ପଟ୍ଟନାୟକଙ୍କ ନେତୃତ୍ୱରେ ଏକ ଟିମ୍ ଜଗନଙ୍କ ଘରକୁ ଯାଇଥିଲା। ତେବେ ତଦନ୍ତ ବେଳେ ଉତ୍କ୍ଷିପ୍ତ ହୋଇ ଜଗନ ପୋଲିସ ଉପରେ ଆକ୍ରମଣ କରିଥିଲେ। କନଷ୍ଟେବଳ ସନ୍ତୋଷ କୁମାର କିସାନଙ୍କ ବାମ ଗାଲକୁ କାମୁଡି ଦେଇ ଫେରାର ହୋଇଯାଇଥିଲେ। ରକ୍ତାକ୍ତ ଅବସ୍ଥାରେ କନଷ୍ଟେବଳ ସନ୍ତୋଷଙ୍କୁ ଉପଖଣ୍ଡ ଚିକିତ୍ସାଳୟ ଅଣାଯାଇଥିଲା। ଶୁକ୍ରବାର ସକାଳେ ଅଭିଯୁକ୍ତ ଜଗନଙ୍କୁ ଗିରଫ କରିବାରେ ପୋଲିସ ସଫଳ ହୋଇଥିଲା। ଏ ସଂକ୍ରାନ୍ତରେ ନଂ. ୧୬୯/୨୧ଓ ୧୭୦/୨୧ରେ ମାମଲା ରୁଜୁ କରାଯାଇ ମୋବାଇଲ ଚୋରି କରିଥିବା ପ୍ରଦ୍ୟୁମ୍ନ ଓ ପୋଲିସକୁ ଆକ୍ରମଣ କରିଥିବା ଜଗନଙ୍କୁ କୋର୍ଟଚାଲାଣ କରାଯାଇଥିବା ଥାନା ଅଧିକାରୀ ପ୍ରକାଶ କରିଛନ୍ତି।
