ନୂଆଦିଲ୍ଲୀ,୧୬।୮: କ୍ରିକେଟରରୁ ରାଜନେତା ପାଲଟିଥିବା ତଥା ଯୋଗୀ ସରକାରର ମନ୍ତ୍ରୀ ଚେତନ ଚୌହାନଙ୍କର ଦେହାନ୍ତ ହୋଇଛି। ୭୩ ବର୍ଷିୟ ଚେତନ କରୋନା ଆକ୍ରାନ୍ତ ହେବାପରେ ଗୁରୁଗ୍ରାମର ମେଦାନ୍ତ ହସ୍ପିଟାଲରେ ରବିବାର ଅପରାହ୍ନ ୪.୩୦ରେ ଶେଷ ନିଶ୍ୱାସ ତ୍ୟାଗ କରିଥିଲେ। ତାଙ୍କ ମୃତ୍ୟୁରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଟୁଇଟ୍ କରି ଦୁଃଖ ପ୍ରକାଶ କରିଛନ୍ତି। ପ୍ରଧାନମନ୍ତ୍ରୀ ଟୁଇଟ କରି କହିଛନ୍ତି ଯେ, ଚେତନ ଚୌହାନ ଜଣେ ଉଜ୍ଜ୍ୱଳ କ୍ରିକେଟର ତଥା ପରେ ଜଣେ ପରିଶ୍ରମୀ ରାଜନେତା ଭାବରେ ପରିଚିତ ହୋଇଥିଲେ। ଭାଜପାକୁ ମଜବୁତ କରିବା ପାଇଁ ସେ ପ୍ରଭାବଶାଳୀ ଯୋଗଦାନ ଦେଇଥିଲେ। ତାଙ୍କ ଦେହାନ୍ତରେ ମୁଁ ଦୁଃଖିତ ବୋଲି ମୋଦି କହିଛନ୍ତି। କ୍ୟାବିନେଟରେ ମୋର ନିକଟ ସହକର୍ମୀ ଚେତନ ଚୌହାନଙ୍କ ଅକାଳ ବିୟୋଗ ଖବର ମୋତେ ବ୍ୟଥିତ କରିଛି ବୋଲି ମୁଖ୍ୟମନ୍ତ୍ରୀ ଯୋଗୀ ଟୁଇଟ୍ କରିଛନ୍ତି। ପ୍ରଭୁ ଶ୍ରୀରାମ ତାଙ୍କ ପରିବାରକୁ ଏହି ଦୁଃଖ ସହିବାକୁ ଶକ୍ତି ଦିଅନ୍ତୁ ବୋଲି ସେ କହିଛନ୍ତି।
ସୂଚନାଯୋଗ୍ୟ, ଚେତନ ଚୌହାନ କ୍ରିକେଟ ଜୀବନରୁ ଅବସର ନେବା ପରେ ସେ ଭାରତୀୟ ଜନତା ପାର୍ଟିରେ ଯୋଗ ଦେଇଥିଲେ। ଚୌହାନ୍ ଆମରୋହୀ ଲୋକସଭା ଆସନରୁ ୧୯୯୧ ଓ ୧୯୯୮ ମସିହାରେ ଲୋକସଭାକୁ ନିର୍ବାଚିତ ହୋଇଥିଲେ। ମାତ୍ର ୧୯୯୯ ଓ ୨୦୦୪ରେ ସେ ଲୋକସଭା ନିର୍ବାଚନ ହାରି ଯାଇଥିଲେ।
https://twitter.com/narendramodi/status/129498086754324889
