ଓ୍ବିଣ୍ଡହୋକ୍,(ନାମିବ୍ୟା) ୧୬ା୯
ଖୁବ୍ଶୀଘ୍ର ଭାରତରେ ଦୌଡ଼ିବେ ଚିତା। ୧୯୫୨ରେ ଦେଶରୁ ବିଲୁପ୍ତ ଘୋଷଣା କରାଯାଇଥିବା ଚିତା ନାମିବ୍ୟାରୁ ଭାରତ ଆଣିବାକୁ ପ୍ରସ୍ତୁତି ଚାଲିଛି। ମଧ୍ୟପ୍ରଦେଶର କୁନୋ ଜାତୀୟ ଉଦ୍ୟାନକୁ ଅଣାଯିବାକୁ ଥିବା ୮ ଚିତା ପାଇଁ ସ୍ବତନ୍ତ୍ର ବିମାନର ବ୍ୟବସ୍ଥା କରାଯାଇଛି। ବି୭୪୭ ଜୁମ୍ବୋ ଜେଟ୍ରେ ଚିତାର ମୁହଁ ଅଙ୍କାଯାଇଛି। ଏହି ବିମାନ ନାମିବ୍ୟା ରାଜଧାନୀ ଓ୍ବିଣ୍ଡହକ୍ରେ ପହଞ୍ଚିଛି।
ଆନ୍ତଃ ମହାଦେଶୀୟ ସ୍ଥାନାନ୍ତରଣ ଯୋଜନାରେ ୫ ଅଣ୍ଡିରା ଚିତା ଏବଂ ୩ ମାଈ ଚିତା ଆସନ୍ତା ୧୭ ତାରିଖରେ କାର୍ଗୋ ଏୟାରକ୍ରାଫ୍ଟ ଯୋଗେ ରାଜସ୍ଥାନର ଜୟପୁରରେ ପହଞ୍ଚିବେ। ସେଠାରୁ ସେମାନଙ୍କୁ ହେଲିକପ୍ଟର ଯୋଗେ କୁନୋ ଜାତୀୟ ଉଦ୍ୟାନକୁ ନିଆଯିବ। ବିମାନ ଯୋଗେ ଭାରତ ଆସିବା ପର୍ଯ୍ୟନ୍ତ ଚିତା ଖାଲିପେଟରେ ରହିବେ। ଦୀର୍ଘ ଯାତ୍ରାବେଳେ ପ୍ରାଣୀଙ୍କଠାରେ ବାନ୍ତି ଓ ଅନ୍ୟାନ୍ୟ ସ୍ବାସ୍ଥ୍ୟ ସମସ୍ୟା ଦେଖାଦେଇଥାଏ। ଏଥିଯୋଗୁ ସେମାନଙ୍କଠାରେ ଅନ୍ୟ ସ୍ବାସ୍ଥ୍ୟଗତ ଜଟିଳତା ଦେଖାଯିବାର ଆଶଙ୍କା ଥିବାରୁ ଏହି ପଦକ୍ଷେପ ନିଆଯାଇଥିବା ଜଙ୍ଗଲ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି। ଦଶନ୍ଧି ଧରି ଚାଲିଥିବା ଏହି ପ୍ରକଳ୍ପର ଶେଷ ପର୍ଯ୍ୟାୟ କାର୍ଯ୍ୟକ୍ରମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ସମ୍ପନ୍ନ ହେବ।
ସେପ୍ଟେମ୍ବର ୧୭ ଜନ୍ମଦିନ ଅବସରରେ ପ୍ରଧାନମନ୍ତ୍ରୀ ବଟନ ଦବାଇ ଚିତାବାଘଗୁଡ଼ିକୁ କୁନୋ ପାର୍କରେ ଛାଡ଼ିବେ। ଆଫ୍ରିକୀୟ ଚିତା ପ୍ରୋଜେକ୍ଟ ୨୦୦୯ରେ ଆରମ୍ଭ ହୋଇଥିଲା। ଗତବର୍ଷ ନଭେମ୍ବର ସୁଦ୍ଧା ମଧ୍ୟପ୍ରଦେଶର କୁନୋ ପାର୍କକୁ ଏହି ଚିତା ଅଣାଯିବାର ଯୋଜନା ଥିଲା। ହେଲେ କୋଭିଡ୍-୧୯ ଯୋଗୁ ଏଥିରେ ବିଳମ୍ବ ହୋଇଥିଲା। ଚିତାଙ୍କ କୁନୋ ପାର୍କରେ ଉପଯୁକ୍ତ ପରିବେଶ ରହିଛି। ସେଠାରେ ଚିଙ୍କାରା, ଛିଟାଥିବା ହରିଣ, ବ୍ଲାକ୍ହକ୍ ଆସି ରହିଥିବାରୁ ଚିତା ସେମାନଙ୍କୁ ଶିକାର କରିପାରିବ ଏବଂ ଜଙ୍ଗଲ ପରିବେଶରେ ବଢ଼ିପାରିବ। ମହାରାଜା ରାମାନୁଜ ପ୍ରତାପ ସିଂ ଦେଓ ୧୯୪୭ରେ ଏକ ଚିତା ଛୁଆକୁ ଗୁଳି କରି ଶିକାର କରିଥିଲେ। ୧୯୪୮ ପରେ ଆଉ ଭାରତରେ ଚିତାକୁ ଦେଖିବାକୁ ମିଳି ନ ଥିଲା। ୧୯୫୨ରେ ଏସୀୟ ଚିତାକୁ ଭାରତରେ ବିଲୁପ୍ତ ଘୋଷଣା କରାଯାଇଥିଲା।
୧୬ ଘଣ୍ଟା ଉଡ଼ିବ ଜୁମ୍ବୋ ଜେଟ୍
ନାମିବ୍ୟାରୁ ୮ ଚିତାଙ୍କୁ ଭାରତ ଆଣିବା ପାଇଁ ସ୍ବତନ୍ତ୍ର ବିମାନ ବି୭୪୭ ଜୁମ୍ବୋ ଜେଟ୍ ବ୍ୟବସ୍ଥା କରାଯାଇଛି। ବିମାନର ମୁଖ୍ୟ କ୍ୟାବିନ୍ରେ ଚିତାଙ୍କ ପାଇଁ ପିଞ୍ଜରା ରହିଛି। ତେବେ ସମସ୍ତ ଚିତା ପରସ୍ପରର ମିଶିବା ଭଳି ସୁବିଧା ମଧ୍ୟ କରାଯାଇଛି। ଚିତା ମୁହଁ ଭଳି ଚିତ୍ରିତ ହୋଇଥିବା ଏହି ଜେଟ୍ ନନ୍ଷ୍ଟପ୍ ବା କୌଣସି ସ୍ଥାନରେ ବିନା ରହଣିରେ ଏକାଥରେ ୧୬ ଘଣ୍ଟା ଉଡ଼ାଣ କରିବ। ଚିତାଙ୍କ ସ୍ବାସ୍ଥ୍ୟକୁ ଦୃଷ୍ଟିରେ ରଖାଯାଇ ଏହି ବିମାନ ବାଟରେ ଇନ୍ଧନ ପାଇଁ କେଉଁଠି ଅଟକିବ ନାହିଁ ବୋଲି କୁହାଯାଇଛି। ଏୟାର ଟ୍ରାଞ୍ଜିଟ୍ ପିରିୟଡ୍ରେ ଚିତାକୁ କିଛି ଖାଇବାକୁ ଦିଆଯିବ ନାହିଁ। ପ୍ରଥମେ ଏନ୍କ୍ଲୋଜର ମଧ୍ୟରେ ଏହି ଚିତା ରହିବେ। ପରେ ସେମାନଙ୍କୁ ଜଙ୍ଗଲରେ ଛଡ଼ାଯିବ। ଭାରତରେ ଚିତାବଂଶର ପୁନରୁଦ୍ଧାର ପାଇଁ ୧୯୭୦ ଦଶକରୁ ସରକାର ଉଦ୍ୟମ କରୁଛନ୍ତି।
