ଚଣ୍ଡିଖୋଲ,୧୨।୪(ଡି.ଏନ.ଏ.): ଚଣ୍ଡିଖୋଲ-ପାରାଦୀପ ୫୩ନଂ. ଜାତୀୟ ରାଜପଥ(ଏନ୍ଏଚ୍) ଏବେ ନିରାପଦ ନୁହେଁ, ଏହା ମୃତ୍ୟୁଯନ୍ତା ପାଲଟିଛି। ଏହି ରାଜପଥରେ ଦୈନିକ ଦୁର୍ଘଟଣା ଘଟି ଜୀବନ ଯାଉଥିବାବେଳେ ଅଧିକାଂଶ ଗୁରୁତର ହୋଇ ମେଡିକାଲରେ ଚିକିତ୍ସାଧୀନ ଅଛନ୍ତି। ରାସ୍ତା ଅବରୋଧ କରି ଠିଆ ହୋଇଥିବା ଲୁହାପଥର ବୋଝେଇଟ୍ରକ୍ଗୁଡ଼ିକ ଦୁର୍ଘଟଣାର ମୁଖ୍ୟକାରଣ ପାଲଟିଛନ୍ତି। ପାରାଦୀପ ବନ୍ଦରକୁ ଲୁହା ପଥର ବୋଝେଇ କରି ଯାଉଥିବା ଟ୍ରକ୍ଗୁଡ଼ିକରୁ ଖଲାସରେ ବିଳମ୍ବ ଯୋଗୁ ହଜାରହଜାର ଟ୍ରକ୍ ପାରାଦୀପଠାରୁ ଚଣ୍ଡିଖୋଲ ପର୍ଯ୍ୟନ୍ତ ଲମ୍ବିଛନ୍ତି। ୪ ଲେନ୍ ବିଶିଷ୍ଟ ଏହି ଜାତୀୟ ରାଜପଥର ଗୋଟିଏ ପାର୍ଶ୍ୱ ସମ୍ପୂର୍ଣ୍ଣ ଅଚଳ ଅବସ୍ଥାରେ ରହିଛି। ସେଥିପାଇଁ ଦୈନିକ ଦୁର୍ଘଟଣା ଘଟୁଥିବାବେଳେ ଏହାର କୌଣସି ପ୍ରତିକାର ହୋଇନାହିଁ।
ଗତ ଶନିବାର ଏହି ଜାତୀୟ ରାଜପଥର ବାଲିଚନ୍ଦ୍ରପୁର ଥାନା ଅନ୍ତର୍ଗତ ଚାରିନଙ୍ଗଳ ଛକ ନିକଟରେ ଦୁର୍ଘଟଣା ଘଟି ୩ଜଣଙ୍କ ମୃତ୍ୟୁ ହୋଇଥିଲା। ୬ଜଣ ଗୁରୁତର ହୋଇଥିଲେ। ସେହିଭଳି ରବିବାର କେନ୍ଦ୍ରାପଡ଼ା ଜିଲା ଡେରାବିଶ ଥାନା ଅନ୍ତର୍ଗତ ବଳଭଦ୍ରପୁର ଛକଠାରେ ଦୁର୍ଘଟଣା ଘଟି ଜଣଙ୍କର ମୃତ୍ୟୁ ହୋଇଥିବାବେଳେ ୫ ଜଣ ଆହତ ହୋଇଥିଲେ। ଠିକ୍ ସେହିଦିନ ମାର୍ଶାଘାଇ ଥାନା ଅନ୍ତର୍ଗତ ନୀଳାଚଳ ବଜାରରେ ଦୁର୍ଘଟଣା ଘଟି ଜଣଙ୍କ ଜୀବନ ଯାଇଛି। ଯେଉଁଥି ପାଇଁ କିଛି ଘଣ୍ଟା ଧରି ଜାତୀୟ ରାଜପଥ ଅବରୋଧ ହୋଇଥିଲା। ଏହି ରାଜପଥରେ ଦୁଇ ଦିନରେ ୫ ଜଣଙ୍କ ମୃତ୍ୟୁ ଓ ୧୦ରୁ ଅଧିକ ଆହତ ହେବା ଘଟଣା ସମ୍ପୂର୍ଣ୍ଣ ରାଜପଥ ପାର୍ଶ୍ୱ ଗ୍ରାମଗୁଡ଼ିକରେ ଭୟର ବାତାବରଣ ସୃଷ୍ଟି କରିଛି। ଜାତୀୟ ରାଜପଥରେ ଯାତାୟାତ ବିପଦଜନକ ହୋଇପଡ଼ିଛି। ତେଣୁ ତୁରନ୍ତ ଏହି ରାଜପଥରୁ ୮୨ କିଲୋମିଟର ପର୍ଯ୍ୟନ୍ତ ଅବରୋଧ ହଟାଇବା ଆବଶ୍ୟକ। ପାରାଦୀପ ପର୍ଯ୍ୟନ୍ତ ଲମ୍ବାଧାଡ଼ିରେ ଟ୍ରକ୍ଗୁଡ଼ିକ ଧୀରେଧୀରେ ଯାଉଥିବାବେଳେ ଏକ କମ୍ପାନୀର ଟ୍ରକ୍ଗୁଡ଼ିକ ରାତିରେ ଦକ୍ଷିଣ ପାର୍ଶ୍ୱରେ ଧାଡ଼ିରେ ଠିଆ ହୋଇଥିବା ଟ୍ରକ୍କୁ ଅତିକ୍ରମ କରି ଯାଉଛନ୍ତି। ସେଥିପାଇଁ ମଧ୍ୟ ଦୁର୍ଘଟଣା ଘଟୁଛି। ତୁରନ୍ତ ରାସ୍ତା ଅବରୋଧ ହଟାଇବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି। ଏ ସମ୍ପର୍କରେ ଚଣ୍ଡିଖୋଲ ଆର୍ଟିଓ ସମ୍ବିତ କୁମାରଙ୍କୁ ପଚାରିବାରୁ ସେ କହିଛନ୍ତି, ଏହାବନ୍ଦର କର୍ତ୍ତୃପକ୍ଷଙ୍କ କାର୍ଯ୍ୟ, ଆମର ନୁହେଁ। ଏହି ଜାତୀୟ ରାଜପଥରେ ୩ ଜିଲାର ଆର୍ଟିଓ କାମ କରୁଛନ୍ତି।
