ବ୍ରିଜଟାଉନ୍ (ବାର୍ବାଡୋସ),୩୦ା୬: ଦୀର୍ଘ ୧୧ ବର୍ଷ ପ୍ରତୀକ୍ଷାର ଅବସାନ ଘଟିଛି।୨୦୧୩ପରେ ଭାରତ ହାସଲ କରିଛି ଆଇସିସି ଟ୍ରଫି। ବ୍ରିଜଟାଉନ୍ର କେନ୍ସିଙ୍ଗଟନ ଓଭାଲ ଗ୍ରାଉଣ୍ଡରେ ଦକ୍ଷିଣ ଆଫ୍ରିକାକୁ ୭ ରନରେ ହରାଇ ଭାରତ ଜିତିଛି ଟି୨୦ କ୍ରିକେଟ ବିଶ୍ୱକପ। ବିରାଟ କୋହଲିଙ୍କ ପରାକ୍ରମ, ଯଶପ୍ରୀତ୍ ବୁମ୍ରା, ହାର୍ଦ୍ଦିକ ପାଣ୍ଡ୍ୟା ଓ ଅର୍ଶଦୀପ ସିଂଙ୍କ ଦକ୍ଷତା ଆଗରେ ହାର ମାନିଲା ଦକ୍ଷିଣ ଆଫ୍ରିକା।
ଭାରତ କ୍ରମାଗତ ୯ ମ୍ୟାଚରେ ଅପରାଜେୟ ରହିଲା। ୮ ମ୍ୟାଚରେ ବିଜୟୀ ହୋଇଥିବାବେଳେ କାନାଡ଼ା ବିପକ୍ଷ ମ୍ୟାଚ ବର୍ଷା ଯୋଗୁ ବାତିଲ ହୋଇଥିଲା। ଗର୍ବିତ ଅଧିନାୟକ ରୋହିତ ଶର୍ମାଙ୍କ ପାଇଁ ଏହାଥିଲା ଟି୨୦ ଅନ୍ତର୍ଜାତୀୟରେ ୫୦ତମ ବିଜୟ। ଏହାକୁ ସ୍ମରଣୀୟ କରିଛନ୍ତି ହିଟ୍ମ୍ୟାନ। ଜଣେ ଅଧିନାୟକ ଭାବେ ସର୍ବାଧିକ ବିଜୟ ରେକର୍ଡର ଅଧିକାରୀ ହୋଇଛନ୍ତି। ପାକିସ୍ତାନର ବାବର ଆଜମ ୪୮ଟି ମ୍ୟାଚ ଜିତି ଦ୍ୱିତୀୟ ସ୍ଥାନରେ ରହିଛନ୍ତି। ଏହାକୁ ମିଶାଇ ଭାରତ ୨ ଥର ଟି୨୦ ବିଶ୍ୱକପ ଚାମ୍ପିୟନ ହୋଇଛି। ପୂର୍ବରୁ ୨୦୦୭ରେ ମହେନ୍ଦ୍ର ସିଂ ଧୋନୀଙ୍କ ଦଳ ପିନ୍ଧିଥିଲା ବିଜୟ ମୁକୁଟ। ଏଥିସହ ଭାରତ ସର୍ବାଧିକ ବିଶ୍ୱକପ ଜିତିବାରେ ଓ୍ବେଷ୍ଟଇଣ୍ଡିଜ (୨୦୧୨ ଓ ୨୦୧୬) ଏବଂ ଇଂଲଣ୍ଡ (୨୦୧୦ ଓ ୨୦୨୨) ସହ ସମକକ୍ଷ ହୋଇଛି। ୨୦୧୩ରେ ଭାରତ ଆଇସିସି ଚାମ୍ପିୟନ୍ସ ଟ୍ରଫି ଜିତିଥିଲା।
