ନୂଆଦିଲ୍ଲୀ, ୭।୨: କୃଷି ଆଇନ ବିରୋଧରେ ଆନ୍ଦୋଳନ ଚଳାଇଥିବା କୃଷକ ସଂଗଠନଗୁଡ଼ିକର ଡାକରାରେ ଶନିବାର ଦେଶବ୍ୟାପୀ ୩ ଘଣ୍ଟିଆ ଚକା ଜାମ୍ ଆନ୍ଦୋଳନ ସଫଳ ହୋଇଛି। ଚାଷୀମାନେ ବିଭିନ୍ନ ଜାତୀୟ ଓ ରାଜ୍ୟ ରାଜପଥକୁ ଅବରୋଧ କରିଥିଲେ। ଦିଲ୍ଲୀରେ ଚକା ଜାମ୍ ଆନ୍ଦୋଳନ ହୋଇ ନ ଥିଲେ ମଧ୍ୟ ରାଜଧାନୀକୁ କଡ଼ା ସୁରକ୍ଷା ବଳୟ ମଧ୍ୟରେ ରଖାଯାଇଛି। ଦିଲ୍ଲୀ ଚାରିପଟେ ଯାଇଥିବା ଇଷ୍ଟର୍ନ ପେରିଫେରାଲ ଏକ୍ସପ୍ରେସ୍ଓ୍ବେ ସମେତ ଉତ୍ତର ଭାରତର ସମସ୍ତ ରାଜପଥକୁ ଚାଷୀ ଅବରୋଧ କରିଥିଲେ।
ଚକା ଜାମ୍ ଆନ୍ଦୋଳନ ଯୋଗୁ ଶନିବାର ଦିଲ୍ଲୀର ସମସ୍ତ ୧୦ଟି ମେଟ୍ରୋ ଷ୍ଟେଶନକୁ ବନ୍ଦ କରିଦିଆଯାଇଥିଲା। ଅପରାହ୍ନ ୩ଟା ପରେ ସେଗୁଡ଼ିକ ଖୋଲିଥିଲା। ପଞ୍ଜାବ ଓ ହରିୟାଣାରେ ଚକା ଜାମ୍ ଆନ୍ଦୋଳନର ଜୋର୍ଦାର ପ୍ରଭାବ ଦେଖିବାକୁ ମିଳିଥିଲା। ଚାଷୀମାନେ ଜାତୀୟ ଓ ରାଜ୍ୟ ରାଜପଥଗୁଡ଼ିକରେ ଟ୍ରାକ୍ଟର ଟ୍ରଲି ରଖି ଅବରୋଧ କରିବା ସହ କେନ୍ଦ୍ର ସରକାରଙ୍କ ବିରୋଧରେ ସ୍ଲୋଗାନ ଦେଇଥିଲେ। ବିଭିନ୍ନ ସ୍ଥାନରେ ମହିଳାମାନେ ମଧ୍ୟ ଆନ୍ଦୋଳନରେ ସାମିଲ ହୋଇଥିଲେ। ଉଭୟ ରାଜ୍ୟରେ ଆନ୍ଦୋଳନ ଶାନ୍ତିପୂର୍ଣ୍ଣ ହୋଇଥିବା ଚାଷୀ ନେତାମାନେ ଦାବି କରିଛନ୍ତି।
ଦିଲ୍ଲୀ ସୀମାରେ ୭୪ ଦିନ ହେଲା ଚାଷୀ ଆନ୍ଦୋଳନ ଚାଲିଥିବାବେଳେ ସେଠାରେ ଇଣ୍ଟରନେଟ ସେବା ବନ୍ଦ କରାଯିବା ଓ ଚାଷୀଙ୍କୁ ପ୍ରଶାସନ ହଇରାଣ କରୁଥିବାରୁ ଏହାର ପ୍ରତିବାଦରେ ଚକା ଜାମ୍ ଆନ୍ଦୋଳନ ଡାକରା ଦିଆଯାଇଥିଲା। ଉଭୟ ରାଜ୍ୟରେ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା।
ମହାରାଷ୍ଟ୍ରରେ ଚକା ଜାମ୍ ଆନ୍ଦୋଳନରେ ଚାଷୀଙ୍କ ସମେତ ଶ୍ରମିକ, ଆଦିବାସୀ, ରାଜନେତା, ସାମାଜିକ କର୍ମୀ ଓ ମହିଳାମାନେ ସାମିଲ ହୋଇ କୃଷକମାନଙ୍କ ଆନ୍ଦୋଳନକୁ ସମର୍ଥନ ଜଣାଇଥିଲେ। ରତ୍ନଗିରି ଓ ସିନ୍ଧୁଦୁର୍ଗକୁ ବାଦ୍ ଦେଲେ ମହାରାଷ୍ଟ୍ରର ଅନ୍ୟ ୩୪ ଜିଲାରେ ସମସ୍ତ ଜାତୀୟ ଓ ରାଜ୍ୟ ରାଜପଥ ସମେତ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସଡ଼କ ଅବରୋଧ କରାଯାଇଥିଲା। ଆନ୍ଦୋଳନରେ ଶିବସେନା, ଏନ୍ସିପି, କଂଗ୍ରେସ ଓ ବାମଦଳ ସାମିଲ ହୋଇଥିଲେ।
କର୍ନାଟକରେ ଅନେକ ଚାଷୀ, ଦଳିତ କର୍ମୀ ଓ ବାମଦଳ ସମର୍ଥକମାନଙ୍କୁ ଅଟକ ରଖାଯାଇଛି। ବେଙ୍ଗାଲୁରୁର ୟାଲାହାଙ୍ଗାରେ ଆନ୍ଦୋଳନରେ ସାମିଲ ହୋଇଥିବା ୩୦ ଜଣଙ୍କୁ ଅଟକ ରଖାଯାଇଥିଲା। ସେଠାରେ ୩ ଘଣ୍ଟିଆ ବନ୍ଦର ବିଶେଷ ପ୍ରଭାବ ଦେଖିବାକୁ ମିଳି ନ ଥିଲା। ହାଇଦ୍ରାବାଦରେ ଚକାଜାମ୍ ଆନ୍ଦୋଳନରେ ସାମିଲ ହୋଇଥିବା କୃଷକମାନେ ଶଗଡ଼ ରାଲି ବାହାର କରିଥିଲେ। ହୟାଥନଗର ଜାତୀୟ ରାଜପଥରେ ଅନୁଷ୍ଠିତ ରାଲିରେ କଂଗ୍ରେସ, ସିପିଆଇ, ସିପିଏମ୍ କର୍ମୀ ଓ ଅନ୍ୟାନ୍ୟ ସଂଗଠନର କର୍ମୀମାନେ ସାମିଲ ହୋଇଥିଲେ।
ରାଜସ୍ଥାନର ଚାଷୀମାନେ ଅଧିକାଂଶ ଜାତୀୟ ଓ ରାଜ୍ୟ ରାଜପଥ ଅବରୋଧ କରି କୃଷି ଆଇନ ପ୍ରତ୍ୟାହାର ଦାବିରେ ସ୍ଲୋଗାନ ଦେଇଥିଲେ। ସେଠାରେ ଚକା ଜାମ୍ ଆନ୍ଦୋଳନକୁ ଶାସକ କଂଗ୍ରେସ ଦଳ ପୂର୍ଣ୍ଣ ସମର୍ଥନ ଦେଇଥିଲା। କୋଟାରେ ବିଶାଳ ଟ୍ରାକ୍ଟର ରାଲି କରାଯାଇଥିଲା। ଦିଲ୍ଲୀ-ଜୟପୁର ରାଜପଥକୁ ସମ୍ପୂର୍ଣ୍ଣ ଅବରୋଧ କରାଯାଇଥିଲା।
ଦାବି ପୂରଣ ନ ହେଲେ ଘରକୁ ଫେରିବୁ ନାହିଁ: ଟିକାଏତ୍
ଦାବି ପୂରଣ ନ ହେବା ପର୍ଯ୍ୟନ୍ତ ଆନ୍ଦୋଳନରତ କୃଷକ ଘରକୁ ଫେରିବେ ନାହିଁ ବୋଲି ଶନିବାର ଚକା ଜାମ୍ ଆନ୍ଦୋଳନ ଶେଷରେ ଭାରତୀୟ କିଷାନ ୟୁନିୟନ (ବିକେୟୁ) ନେତା ରାକେଶ ଟିକାଏତ୍ କହିଛନ୍ତି। ଦିଲ୍ଲୀ-ଉତ୍ତରପ୍ରଦେଶ ସୀମାର ଗାଜିପୁରଠାରେ ଉପସ୍ଥିତ ଚାଷୀମାନଙ୍କୁ ଉଦ୍ବୋଧନ ଦେଇ ଟିକାଏତ୍ କହିଥିଲେ, ଅକ୍ଟୋବର ୨ ପର୍ଯ୍ୟନ୍ତ ଆନ୍ଦୋଳନ ଜାରି ରହିବ। ତେଣୁ କୃଷି ଆଇନ ପ୍ରତ୍ୟାହାର କରିନେବା ଲାଗି ସେପର୍ଯ୍ୟନ୍ତ ସମୟ ରହିଛି। ଉକ୍ତ ସମୟସୀମା ମଧ୍ୟରେ ଆଇନ ପ୍ରତ୍ୟାହୃତ ନ ହେଲେ ଆନ୍ଦୋଳନକୁ ଆହୁରି ବ୍ୟାପକ କରିବା ଲାଗି ଯୋଜନା ହେବ ବୋଲି ଟିକାଏତ୍ ଚେତାବନୀ ଦେଇଛନ୍ତି। ଚାପରେ ସରକାରଙ୍କ ସହ ଆଲୋଚନା ହୋଇପାରିବ ନାହଁ ବୋଲି ସେ ସ୍ପଷ୍ଟ କରିଦେଇଛନ୍ତି।
ସୂଚନାଯୋଗ୍ୟ, ଜାନୁୟାରୀ ୨୬ ଟ୍ରାକ୍ଟର ରାଲି ହିଂସା ପରେ ଦିଲ୍ଲୀ ସୀମାରୁ ଅନେକ ଚାଷୀ ଘରମୁହାଁ ହୋଇଥିଲେ। ତେବେ ଟିକାଏତ୍ଙ୍କ ଅଶ୍ରୁଳ ନିବେଦନ ସେମାନଙ୍କୁ ପୁଣିଥରେ ଆନ୍ଦୋଳନସ୍ଥଳକୁ ଫେରାଇ ଆଣିଥିଲା। ଦିଲ୍ଲୀ, ଉତ୍ତରପ୍ରଦେଶ ଓ ଉତ୍ତରାଖଣ୍ଡକୁ ବାଦ୍ ଦେଲେ ଅନ୍ୟ ସମସ୍ତ ଜାତୀୟ ଓ ରାଜ୍ୟ ରାଜପଥରେ ଶନିବାର ଚକାଜାମ୍ ଆନ୍ଦୋଳନ ହୋଇଥିଲା। ଦେଶର ଅଧିକାଂଶ ଭାଗରୁ ଚାଷୀମାନେ ଏହି ଆନ୍ଦୋଳନରେ ସାମିଲ ହୋଇଥିଲେ।
