ନୂଆଦିଲ୍ଲୀ,୨୬।୪ : କମିପାରେ କରୋନା ଟିକାର ମୂଲ୍ୟ। ଟିକାର ମୂଲ୍ୟ ନେଇ କେନ୍ଦ୍ର ଓ ବିଭିନ୍ନ ରାଜ୍ୟ ସରକାରଙ୍କ ମଧ୍ୟରେ ବିବାଦ ଦେଖାଦେବା ପରେ ସୃଷ୍ଟି ହୋଇଛି ଏଭଳି ସମ୍ଭାବନା। ସିରମ ଇନଷ୍ଟିଚ୍ୟୁଟ ଅଫ୍ ଇଣ୍ଡିଆ (ଏସ୍ଆଇଆଇ) ଓ ଭାରତ ବାୟୋଟେକ୍କୁ କେନ୍ଦ୍ର ସରକାର ଟିକାର ମୂଲ୍ୟ ହ୍ରାସ କରିବାକୁ କହିଛନ୍ତି।
କ୍ୟାବିନେଟ୍ ସଚିବ ରାଜୀବ ଗୌବାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକ ଟିକାର ମୂଲ୍ୟ ହ୍ରାସ ସମ୍ପର୍କରେ ଆଲୋଚନା କରାଯାଇଥିଲା। ଏବେ ଉଭୟ କମ୍ପାନୀ ପରିବର୍ତ୍ତିତ ମୂଲ୍ୟ ଘୋଷଣା କରିବେ ବୋଲି ଆଶା କରାଯାଉଛି।
ଭାରତ ବାୟୋଟେକ ଏହାର କୋଭିଡ୍-୧୯ ଟିକା କୋଭାକ୍ସିନର ପ୍ରତ୍ୟେକ ଡୋଜର ମୂଲ୍ୟ ରାଜ୍ୟ ସରକାରଙ୍କ ପାଇଁ ୬୦୦ ଟଙ୍କା ଓ ବେସରକାରୀ ମେଡିକାଲ ଲାଗି ୧,୨୦୦ ଟଙ୍କା ଧାର୍ଯ୍ୟ କରିଥିଲା। ସେହିଭଳି କୋଭିଶିଲ୍ଡ ଡୋଜ ପିଛା ରାଜ୍ୟ ସରକାର ଓ ବେସରକାରୀ ମେଡିକାଲ ପାଇଁ ଯଥାକ୍ରମେ ୪୦୦ ଏବଂ ୬୦୦ ଟଙ୍କା ଧାର୍ଯ୍ୟ କରିଥିଲା ବିଶ୍ୱର ସବୁଠୁ ବଡ଼ ଟିକା ପ୍ରସ୍ତୁତିକାରୀ କମ୍ପାନୀ ଏସ୍ଆଇଆଇ।
