ରସୁଲପୁର,୧୦ା୬(ଡି.ଏନ.ଏ.): ରସୁଲପୁର ବ୍ଲକ୍ ନରସିଂହପୁର ପଞ୍ଚାୟତ ଅଧୀନ ହରିପୁର ଗ୍ରାମର ଏକ ଶ୍ମଶାନ ଜମି ଜବରଦଖଲ ହୋଇଛି। ସର୍ବସାଧାରଣଙ୍କ ବ୍ୟବହାର ନିମନ୍ତେ ଉଦ୍ଦିଷ୍ଟ ଉକ୍ତ ଜମିକୁ ଗ୍ରାମର କେତେଜଣ ବ୍ୟକ୍ତି ଜୋରଜବରଦସ୍ତ ନିଜ ଅକ୍ତିଆକରକୁ ନେଇଯିବାକୁ ଉଦ୍ୟମ ଚଳାଇଛନ୍ତି। ପ୍ରଶାସନର ନୀରବତା ଯୋଗୁ ସେମାନେ ଉକ୍ତ ଜମି ଉପରେ ଏକ ଘର ନିର୍ମାଣ କରୁଛନ୍ତି। ତେଣୁ ଉକ୍ତ ନିର୍ମାଣ କାର୍ଯ୍ୟ ତୁରନ୍ତ ବନ୍ଦ କରିବା ସହ ଜମିକୁ ଜବରଦଖଲ କରିଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି।
ଜବର ଦଖଲ ହୋଇଥିବା ଜମି ହାଲ ପ୍ଲଟ ନଂ.୨୦୭୪, ସର୍ବସାଧାରଣ ଖାତା ନଂ.୮୪୬ କିସମ ଶ୍ମଶାନ ରହିଛି। ଘର ନିର୍ମାଣ ସମ୍ପର୍କରେ ଗ୍ରାମବାସୀ ନରସିଂହପୁର ରାଜସ୍ବ ନିରୀକ୍ଷକ ଓ ରସୁଲପୁର ତହସିଲଦାରଙ୍କ ଦୃଷ୍ଟି ଆକର୍ଷଣ କରିବା ସହ ଜିଲାପାଳଙ୍କୁ ଅବଗତ କରାଇଛନ୍ତି। ହେଲେ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାରେ ଟାଳଟୁଳନୀତି ଅବଲମ୍ବନ କରାଯାଉଛି। ଜବରଦଖଲକାରୀ ରାତି ଅଧିଆ ଗୃହ ନିର୍ମାଣ କରୁଛନ୍ତି। ସେମାନେ ତ୍ୱରିତ ଉପାୟରେ ନିର୍ମାଣ କାର୍ଯ୍ୟ ଶେଷ କରିବାକୁ ପ୍ରୟାସ କରୁଛନ୍ତି। ତେବେ ଏ ଦିଗରେ ପ୍ରଶାସନ ପକ୍ଷରୁ ସନ୍ତୋଷଜନକ ପଦକ୍ଷେପ ଗ୍ରହଣ କରା ନ ଗଲେ ଗ୍ରାମବାସୀ ଆନ୍ଦୋଳନକୁ ଓହ୍ଲାଇବେ ବୋଲି କହିଛନ୍ତି।
