ନୂଆଦିଲ୍ଲୀ,୨୪।୧୨ : ଆଗାମୀ ଜନଗଣନାରେ ଅନ୍ୟ ପଛୁଆ ବର୍ଗ (ଓବିସି) ପାଇଁ ଜାତି ଭିତ୍ତିକ ଜନଗଣନା ଲାଗି ନିର୍ଦ୍ଦେଶ ଲୋଡିଥିବା ଆଦେବନରେ ସୁପ୍ରିମକୋର୍ଟ କେନ୍ଦ୍ର ତଥା ଅନ୍ୟ ପକ୍ଷକାରମାନଙ୍କୁ ଜବାବ ତଲବ କରିଛନ୍ତି। ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦଚୂଡ଼ ଏବଂ ବିଚାରପତି ପି.ଏସ୍.ନରସିଂହାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଓବିସିଙ୍କ ପାଇଁ ଜାତି ଭିତ୍ତିକ ଜନଗଣନା ଦାବି ଉପରେ କେନ୍ଦ୍ର ସରକାର, ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟ ତଥା ଅନ୍ୟମାନଙ୍କୁ ନୋଟିସ ଜାରି କରି ପ୍ରତିକ୍ରିୟା ଲୋଡିଛନ୍ତି।
ଏହି ପ୍ରସଙ୍ଗରେ ଯୁକ୍ତି ଶୁଣିବା ପରେ କୋର୍ଟ ଅନ୍ୟ ଏକ ସମାନ ମାମଲା ସହିତ ତାଲିକାଭୁକ୍ତ କରିଛନ୍ତି।
ସୂଚନାନୁସାରେ, ଆଡଭୋକେଟ କୃଷ୍ଣ କହ୍ନେୟା ପାଲ ଏହି ମାମଲାରେ ସର୍ବୋଚ୍ଚ ନ୍ୟାୟାଳୟଙ୍କ ନିକଟରେ ଆବେଦନ କରିଥିଲେ। ଏଥିରେ ସେ କହିଥିଲେ ଯେ ଜାତି ଭିତ୍ତିକ ସର୍ଭେ ଏବଂ ଜାତି ଭିତ୍ତିକ ଜନଗଣନା ଅଭାବରୁ ସରକାର ପଛୁଆ ବର୍ଗର ସମସ୍ତ ବିଭାଗ ସହିତ କଲ୍ୟାଣ ଯୋଜନାର ଲାଭ ବାଣ୍ଟିବାକୁ ଅସମର୍ଥ। ଏହି ଶ୍ରେଣୀଗୁଡ଼ିକରେ ଓବିସି ଗୁରୁତ୍ୱପୂର୍ଣ୍ଣ ।
ଏହା ସହିତ ସେ ଆବେଦନରେ ଯୁକ୍ତି ଦର୍ଶାଇଥିଲେ ଯେ ଉପଯୁକ୍ତ ତଥ୍ୟର ଅଭାବରେ ସଠିକ ନୀତି ପ୍ରସ୍ତୁତ ହୋଇପାରିବ ନାହିଁ। ୨୦୧୮ ରେ ତତ୍କାଳୀନ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ ରାଜନାଥ ସିଂ ଓବିସି ଜନଗଣନା ଘୋଷଣା କରିଥିଲେ। ସେ କହିଥିଲେ ଯେ୨୦୨୧ ଜନଗଣନା ସମୟରେ ଓବିସି ଜନସଂଖ୍ୟାର ଜନଗଣନା ତଥ୍ୟ ପୃଥକ ଭାବରେ ସଂଗ୍ରହ କରାଯିବ। ଏହା ସତ୍ତ୍ୱେ କେନ୍ଦ୍ର ସରକାର ୨୦୧୭ ରେ ପ୍ରସ୍ତୁତ ରୋହିନୀ ଆୟୋଗର ରିପୋର୍ଟ ଉପସ୍ଥାପନ କରିନାହାଁନ୍ତି।
